យុវតីម្នាក់អាយុ១៧ឆ្នាំ ជាជនជាតិខ្មែរ ធ្វើការជាអ្នកបកប្រែភាសាចិន នៅក្រុមហ៊ុនរ៉ែមាស ក្នុងខេត្តក្រចេះ បានស្លាប់ដោយសារឆក់ខ្សែភ្លើង ក្រោយសមត្ថកិច្ចរកឃើញជនរងគ្រោះដេកនៅលើព្រីភ្លើង។
យោងតាមនគរបាលខេត្តបានឱ្យដឹងថា ក្រុមមន្រ្តីបានរកឃើញយុវតីនេះ កាលពីព្រឹកថ្ងៃពុធ នៅក្នុងបន្ទប់ជួលរបស់នាង។
នគរបាលបាននិយាយថា យុវតីរូបនេះបានដេកនៅលើព្រីភ្លើងដែលនាងដាក់នៅលើគ្រែ ដើម្បីសាកថ្មទូរសព្ទបណ្ដើរ និងលេងបណ្ដើរនៅពេលយប់។
នគរបាលបានបន្ថែមទៀតថា នាងធ្វើការឱ្យក្រុមហ៊ុនរ៉ែមាសចិនមួយនៅឃុំក្បាលដំរី ស្រុកសំបូរ។
នគរបាលនិយាយថា៖ «ការធ្វើកោសលវិច័យរបស់នគរបាល និងការពិនិត្យសាកសពដោយគ្រូពេទ្យនៅកន្លែងកើតហេតុ បានបញ្ជាក់ច្បាស់ថា នាងបានស្លាប់ដោយសារឆក់ខ្សែភ្លើង»។