យោងតាមប្រព័ន្ធផ្សព្វផ្សាយឥណ្ឌូនេស៊ី ឱ្យដឹងថា ស្ថានទូតឥណ្ឌូនេស៊ីបានជួយសង្គ្រោះពលរដ្ឋរបស់ខ្លួនចំនួន៦២នាក់ពីកន្លែងឃុំខ្លួនក្នុងឧស្សាហកម្មឆបោកនៅខេត្តព្រះសីហនុ កាលពីចុងសប្ដាហ៍កន្លងទៅនេះ។
ដោយដកស្រង់សម្ដីពីក្រសួងការបរទេសឥណ្ឌូនេស៊ី ទស្សនាវដ្ដីឥណ្ឌូនេស៊ី Tempo បានលើកឡើងថា ពលរដ្ឋឥណ្ឌូនេស៊ីចំនួន៥៥នាក់ត្រូវបានសង្រ្គោះកាលពីថ្ងៃសៅរ៍ និង៧នាក់ទៀតកាលពីថ្ងៃអាទិត្យ ដោយមានកិច្ចសហការពីនគរបាលកម្ពុជា។
ប្រភពដដែលបន្តទៀតថា ជនរងគ្រោះពីការជួញដូរមនុស្សនឹងត្រូវបានសម្ភាស និងទទួលការប្រឹក្សាផ្លូវចិត្ត មុនពេលបញ្ជូនត្រលប់ទៅប្រទេសឥណ្ឌូនេស៊ីវិញ នៅយប់ថ្ងៃអាទិត្យ។
ទស្សនាវដ្ដីនេះបន្ថែមទៀតថា ជនរងគ្រោះចំនួន៥៥នាក់ដែលត្រូវបានសង្រ្គោះកាលពីថ្ងៃសៅរ៍ មានបុរស៤៧នាក់ និងស្ត្រី៨នាក់។
ទស្សនាវដ្ដីនេះ បានផ្ដល់ជាទីតាំង (កូអរដោនេ 10°37’33.0″N 103°30’08.7”E) នៃទីកន្លែងឧស្សាហកម្មឆបោកក្នុងខេត្តព្រះសីហនុ ដែលជនរងគ្រោះត្រូវបានឃុំខ្លួន។ កូអរដោនេនេះបង្ហាញទីតាំងមួយក្បែរផ្លូវសន្តិភាព ក្នុងសង្កាត់លេខ៣។ ប្រភពដដែលនេះបន្តទៀតថា ករណីនេះត្រូវបានលាតត្រដាង ក្រោយមានអ្នកបញ្ចេញមតិយោបល់ (comment) នៅលើទំព័រហ្វេសប៊ុករបស់អភិបាលខេត្តចាវ៉ា ភាគកណ្ដាល (Central Java)។
អាជ្ញាធរកម្ពុជាបានចាត់ទុកការជួញដូរពលករបរទេសថា ជាប្រតិបត្តិការឆបោកក្នុងប្រទេស បើទោះបីជាមានរបាយការណ៍ជាបន្តបន្ទាប់ក៏ដោយ។ មន្ត្រីនគរបាលនៅជិតព្រំដែនវៀតណាម ក្នុងខេត្តកំពត និងខេត្តព្រះសីហនុ បានប្រាប់អ្នករាយការណ៍ព័ត៌មានកាលពីដើមឆ្នាំនេះថា ពលករមិនត្រូវបានអនុញ្ញាតឱ្យលាឈប់ពីការងារ ដោយសារតែកិច្ចសន្យាការងាររបស់ពួកគេទេ។
ទោះជាយ៉ាងណា ជនរងគ្រោះដែលត្រូវបានជួយសង្គ្រោះ បាននិយាយថា ពួកគេត្រូវបានវាយដំ និងធ្វើទារុណកម្ម ប្រសិនបើពួកគេបដិសេធមិនធ្វើការនៅអង្គការឆបោកនេះ នៅក្នុងបរិវេណដែលបង្អួចមានរនាំងបិទជិត និងព័ទ្ធដោយរបងលួស។
គួរបញ្ជាក់ថា កាលពីខែមុន ខណៈសហរដ្ឋអាមេរិកបានទម្លាក់ចំណាត់ថ្នាក់ការជួញដូរមនុស្សរបស់កម្ពុជា ដោយសារតែមានអំពើឆបោកកើនឡើង មន្ត្រីជាន់ខ្ពស់ផ្នែកប្រឆាំងការជួញដូរមនុស្សរបស់កម្ពុជា បានហៅការទម្លាក់ចំណាត់ថ្នាក់នេះថា «អយុត្តិធម៌» ដោយសារតែរដ្ឋាភិបាលបានខិតខំប្រយុទ្ធប្រឆាំងនឹងការជួញដូរមនុស្សក្នុងទម្រង់ផ្សេងៗគ្នា ក្នុងនោះ អង្គការមិនមែនរដ្ឋាភិបាល និងរដ្ឋាភិបាល បានផ្តោតជាចម្បងលើការជួញដូរពលករខ្មែរទៅក្រៅប្រទេស។
ទោះយ៉ាងណា ពលករបរទេសនិយាយថា មានមនុស្សរាប់ពាន់នាក់កំពុងធ្វើការក្នុងឧស្សាហកម្មឆបោកនៅក្នុងប្រទេសកម្ពុជា ដើម្បីប្រព្រឹត្តអំពើឆបោកជាសកល ដែលជារឿយៗផ្ទុយពីឆន្ទៈរបស់ពួកគេ។
ស្ថានទូតឥណ្ឌូនេស៊ី មិនទាន់បានផ្ដល់ការឆ្លើយតបចំពោះបញ្ហានេះនៅឡើយទេ៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Briefs: 62 Indonesians Rescued From Scams, New District Governors