លោកប្រធានាធិបតី ចូ បៃឌិន បានឱ្យដឹងនៅថ្ងៃចន្ទម្សិលមិញថា សហរដ្ឋអាមេរិកបានសម្លាប់មេដឹកនាំអាល់កៃដាមួយរូបឈ្មោះ អាយមែន អាល ហ្សាវ៉ាហ៊ីរី (Ayman al-Zawahiri) នៅក្នុងការវាយប្រហារមួយនៅប្រទេសអាហ្វហ្គានីស្ថាន កាលពីចុងសប្ដាហ៍កន្លងទៅ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងពីសេតវិមាន ប្រធានាធិបតីអាមេរិក លោក ចូ បៃឌិន (Joe Biden) ដែលទើបតែជាសះស្បើយពីជំងឺកូវីដ-១៩ ថ្លែងថា៖ «បច្ចុប្បន្ន យុត្តិធម៌ត្រូវបានផ្ដល់ជូនហើយ ខណៈមេដឹកនាំភេរវករនេះលែងមានតទៅទៀតហើយ។ មិនថាត្រូវចំណាយរយៈពេលយូរ ឬក៏អ្នកសម្ងំលាក់ខ្លួននៅកន្លែងណានោះទេ ប្រសិនបើអ្នកគំរាមកំហែងដល់ប្រជាជនរបស់យើង សហរដ្ឋអាមេរិកនឹងស្វែងរកអ្នក ហើយនឹងកម្ចាត់អ្នកចេញ»។
លោកបន្ថែមថា មេដឹកនាំអាល់កៃដារូបនេះក៏ជាមេខ្លោងនៅពីក្រោយ ឬចូលរួមចំណែកយ៉ាងសំខាន់ក្នុងការវាយប្រហារលើនាវា USS Cole ដែលបានសម្លាប់នាវិកអាមេរិកអស់ចំនួន១៧នាក់ កាលពីឆ្នាំ២០០០ និងស្ថានទូតអាមេរិកនៅក្នុងប្រទេសកេនយ៉ា និងតង់ហ្សានី ផងដែរ។
យោងតាមមន្ត្រីសហរដ្ឋអាមេរិកមួយរូបដែលសុំមិនបញ្ចេញឈ្មោះ បានបញ្ជាក់ថា លោក អាយមែន អាល ហ្សាវ៉ាហ៊ីរី បានស្លាប់បន្ទាប់ពីរងនូវការវាយប្រហារដោយយន្ដហោះដ្រូន (drone) របស់អាមេរិក នៅក្នុងរដ្ឋធានីកាប៊ុល ប្រទេសអាហ្វហ្គានីស្ថាន នៅវេលាម៉ោងប្រមាណជា៦និង១៨នាទីព្រឹក (0148 GMT) កាលពីថ្ងៃអាទិត្យកន្លងទៅ។
ប្រភពដដែលបន្តថា៖ «លោក អាយមែន អាល ហ្សាវ៉ាហ៊ីរី បានបន្តបង្កការគំរាមកំហែងយ៉ាងសកម្មដល់បុគ្គល ផលប្រយោជន៍ និងសន្តិសុខជាតិរបស់សហរដ្ឋអាមេរិក។ ការស្លាប់របស់បុគ្គលរូបនេះ គឺផ្តល់ផលប៉ះពាល់យ៉ាងធ្ងន់ធ្ងរដល់ក្រុមអាល់កៃដាទាំងមូល ដែលនឹងធ្វើឱ្យប្រតិបត្តិការរបស់ក្រុមពួកគេចុះខ្សោយផងដែរ»។
គួរបញ្ជាក់ថា មេដឹកនាំអាល់កៃដា ដែលមានសញ្ជាតិអេហ្ស៊ីបរូបនេះ ក៏ជាបុគ្គលមួយរូបដែលពាក់ព័ន្ធក្នុងហេតុការណ៍ភេរវកម្មទៅលើអគារភ្លោះ នៅក្រុងញូវយ៉ក កាលពីថ្ងៃទី១១ ខែកញ្ញា ឆ្នាំ២០០១ ដែលបានសម្លាប់មនុស្សជិត៣ ០០០នាក់ផងដែរ៕
