ប្រជាពលរដ្ឋជិត១ ០០០គ្រួសារ នៅខេត្តកោះកុង ដែលអះអាងថាកំពុងមានជម្លោះដីធ្លីជាមួយក្រុមហ៊ុនរបស់លោកឧកញ៉ា លី យ៉ុងផាត់ បានរកកិច្ចអន្តរាគមន៍ពីមេឃុំឡើងថ្មី ឱ្យជួយដោះស្រាយវិវាទដីធ្លី ក្រោយជម្លោះនេះអូសបន្លាយជាង១០ឆ្នាំមកហើយ។
ពលរដ្ឋប្រមាណ១០០នាក់ មកពីសហគមន៍៨៤៣ និងសហគមន៍១២៩ តំណាងឱ្យពលរដ្ឋជិត១ ០០០គ្រួសារ នៅថ្ងៃទី២ ខែសីហា ឆ្នាំ២០២២នេះ បាននាំគ្នាយកញត្តិទៅដាក់នៅសាលាឃុំកណ្ដោល ស្រុកបទុមសាគរ ដើម្បីស្នើមេឃុំដែលទើបឡើងតំណែងថ្មី ជួយដោះស្រាយបញ្ហាដីធ្លីជូនពួកគេ។
លោក ឈឹម សាផាន ដែលអះអាងថាជាតំណាងពលរដ្ឋសហគមន៍៨៤៣ ប្រាប់វីអូឌីនៅថ្ងៃអង្គារនេះថា ប្រជាពលរដ្ឋ៨៤៣គ្រួសារ និងមានដីសរុប១ ៧២៧,៦ហិកតា ស្ថិតក្នុងស្រុកបទុមសាគរ ស្រុកស្រែអំបិល និងស្រុកថ្មបាំង ខេត្តកោះកុង ត្រូវបានក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់លោកឧកញ៉ា លី យ៉ុងផាត់ សមាជិកព្រឹទ្ធសភា ឈូសឆាយរំលោភយកអស់តាំងពីឆ្នាំ២០០៦។
តំណាងពលរដ្ឋរូបនេះបន្តថា ដីនោះពួកគេបានកាន់កាប់និងចូលអាស្រ័យផលតាំងពីឆ្នាំ១៩៧៩ ហើយអ្នកខ្លះទៀតបានកាន់កាប់នៅឆ្នាំ២០០០ ដោយពលរដ្ឋខ្លះបានធ្វើស្រែ និងពលរដ្ឋខ្លះបានធ្វើចម្ការដោយដាំដំណាំហូបផ្លែផ្សេងៗសម្រាប់ចិញ្ចឹមជីវិត ដោយពុំមានអាជ្ញាធរណាទៅហាមឃាត់ ឬរារាំងឡើយ។
លោក ឈឹម សាផាន បន្ថែមថា អ្នកភូមិយកញត្តិទៅដាក់នៅសាលាឃុំកណ្តោល ដោយសង្ឃឹមថា មេឃុំដែលទើបឡើងតំណែងថ្មីរូបនោះនឹងជួយដោះស្រាយដីធ្លីជូនពួកគាត់។
លោកបន្ថែមថា៖ «យើងបានបោះឆ្នោតជូនគាត់ហើយ គាត់បានកាន់តំណែងហើយ អ៊ីចឹងយើង[ដាក់]ញត្តិឱ្យគាត់ជួយទទួលដឹងឮថាពួកយើងមិនទាន់ទទួលបានការដោះស្រាយទេ សុំឱ្យជួយដោះស្រាយជូនពួកយើង»។
អ្នកស្រី ឈឺន គី ដែលអះអាងថាជាតំណាងពលរដ្ឋនៅសហគមន៍១២៩ បាននិយាយថា ក្រុមពួកគាត់ ១២៩គ្រួសារ មានដីសរុបទំហំ ២៤៧ហិកតា នៅភូមិធ្នង់ ឃុំកណ្ដោល ស្រុកបទុមសាគរ ត្រូវបានក្រុមហ៊ុនរបស់លោកឧកញ៉ា លី យ៉ុងផាត់ ឈូសឆាយ និងរំលោភយកអស់តាំងពីឆ្នាំ២០០៦ ដោយមិនបានដោះស្រាយសំណងផលប៉ះពាល់ជូនពួកគាត់ឡើយ។
អ្នកស្រីបន្ថែមថា៖ «ក្រុមហ៊ុនបានឈូសឆាយដីពលរដ្ឋយើងនៅភូមិធ្នង់ហ្នឹង ជាដីដែលយើងបានអាស្រ័យផលជាយូរឆ្នាំមកហើយ។ នៅឆ្នាំ២០០៦ហ្នឹង ក្រុមហ៊ុនចម្ការអំពៅបានឈូសឆាយផលដំណាំរបស់ពួកយើងអស់ ហើយអាជ្ញាធរបានដោះស្រាយឱ្យបានតែមួយចំនួនតូចដែលជាសាច់ញាតិរបស់ពួកគាត់ប៉ុណ្ណោះ តែពលរដ្ឋរាប់រយគ្រួសារទៀតមិនបានដោះទេ»។
មេឃុំកណ្ដោលដែលទើបឡើងកាន់តំណែងថ្មី លោក ហ៊យ សំណាង មានប្រសាសន៍ថា លោកមិនបានទទួលយកញត្តិពីប្រជាពលរដ្ឋនោះទេ ក្រោមហេតុផលថា កន្លងមក ពលរដ្ឋបានដាក់ញត្តិនោះនៅរដ្ឋបាលខេត្តកោះកុង និងក្រសួងរៀបចំដែនដីរួចហើយ ហើយរដ្ឋបាលខេត្ត និងក្រសួង ក៏បានចេញលិខិតបដិសេធ មិនដោះស្រាយជូនពលរដ្ឋទាំងនោះជាច្រើនដងហើយដែរ។
លោកបន្ថែមថា៖ «រឿងនេះ គេដោះស្រាយហើយៗ គេចេញសេចក្ដីជូនដំណឹងមិនដោះស្រាយប៉ុនណាប៉ុនណី បើសិនយើងនៅទទួលញត្តិ ឬទទួលការដោះស្រាយជូនពួកគាត់ មានន័យថា យើងមិនគោរពតាមសេចក្តីជូនដំណឹងរបស់សាលាខេត្តហើយ»។
អភិបាលស្រុកបទុមសាគរ លោក ហាក់ ឡេង មានប្រសាសន៍ថា អាជ្ញាធរស្រុកមិនអាចដោះស្រាយទៀតបានទេ ព្រោះករណីនេះ ខាងក្រសួងរៀបចំដែនដី និងអាជ្ញាធរពាក់ព័ន្ធ បានដោះស្រាយឱ្យចប់យូរហើយ។ លោកថា ពលរដ្ឋទាំងនោះមកទាមទារម្តងទៀតតែប៉ុណ្ណោះ។
លោកបន្ថែមថា៖ «ការងារនេះ ក្រសួងគេដោះស្រាយចប់យូរអស់ហើយ។ រឿងចាស់ទេ! ប៉ុន្តែពួកគាត់ចេះតែមកតវ៉ាទាមទារទៀត»។
កាលពីថ្ងៃទី២១ ខែកញ្ញា ឆ្នាំ២០២០ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្ដីប្រកាសព័ត៌មានមួយ ដោយបដិសេធមិនដោះស្រាយជូនក្រុមពលរដ្ឋ ៨៤៣គ្រួសារនេះទេ ក្រោមហេតុផលថា ក្រសួងបានដោះស្រាយជូនពួកគេរួចរាល់ហើយ។
ជុំវិញជម្លោះដីធ្លីនេះ មន្រ្តីសម្របសម្រួលអង្គការការពារសិទ្ធិមនុស្ស លីកាដូ ប្រចាំខេត្តកោះកុង លោក ហ៊ួរ អ៊ីន ធ្លាប់បានស្នើឱ្យអាជ្ញាធរពាក់ព័ន្ធស៊ើបអង្កេត និងស្រាវជ្រាវឱ្យបានច្បាស់លាស់ និងមានតម្លាភាព ថាតើពលរដ្ឋទាំងនោះពិតជាទទួលបានការដោះស្រាយរួច ឬយ៉ាងណា ដោយមិនត្រូវច្រានចោលសំណើរបស់ពួកគេនោះទេ។
លោកបន្ថែមថា៖ «បើសិនជាពួកគាត់ពិតជាប្រជាពលរដ្ឋដែលបានរងផលប៉ះពាល់ដីស្រែដីចម្ការ ដោយសារក្រុមហ៊ុនរំលោភយកមែន អាជ្ញាធរមិនបាច់គិតថាពួកគាត់ជាអ្នកតវ៉ាមុនឬអ្នកតវ៉ាក្រោយទេ បើសិនជាពួកគាត់ជាជនរងគ្រោះពិតប្រាកដ គួរតែមានដំណោះស្រាយណាមួយសមរម្យជូនពួកគាត់ដែរ ដើម្បីឈានទៅរកការដោះស្រាយបញ្ចប់ជម្លោះដីធ្លីនៅក្នុងខេត្តកោះកុង»។
តំណាងពលរដ្ឋ លោក ឈឹម សាផាន ឱ្យដឹងថា ស្របពេលដែលមានការតវ៉ាជម្លោះដីធ្លីជាមួយក្រុមហ៊ុនរបស់លោកឧកញ៉ា លី យ៉ុងផាត់ នេះ គឺមានតំណាងពលរដ្ឋចំនួន១៦នាក់ហើយកំពុងជាប់បណ្តឹងនៅតុលាការ ក្រោមបទចោទ «បង្កចលាចល និងធ្វើឱ្យខូចសណ្ដាប់ធ្នាប់សាធារណៈ»៕