ប្រជាពលរដ្ឋ២នាក់ រស់នៅជាប់បឹងតាមោក ដែលត្រូវបានតុលាការចេញដីកាកោះហៅ បានចូលទៅបំភ្លឺនៅសាលាដំបូងរាជធានីភ្នំពេញ នៅថ្ងៃអង្គារនេះ ក្រោយពួកគេប្រមូលផ្ដុំតវ៉ាទាមទារឱ្យមានដំណោះស្រាយរឿងដីធ្លី។
កាលពីថ្ងៃទី១៤ ខែមិថុនា ឆ្នាំ២០២២ តំណាងអយ្យការអមសាលាដំបូងរាជធានីភ្នំពេញ លោក ទុង រតនា បានកោះហៅតំណាងពលរដ្ឋចំនួន៧នាក់ រួមមាន អ្នកស្រី ប្រាក់ សុភា, អ្នកស្រី ខេន សាអយ, អ្នកស្រី ផន សុខុម, អ្នកស្រី គង់ តឿ, អ្នកស្រី ផន សុំ, អ្នកស្រី តាន់ ខ្ទី និងអ្នកស្រី អំ ភឿន ឱ្យចូលទៅបំភ្លឺចំពោះតុលាការ នៅថ្ងៃទី២ ទី៣ ទី៤ និងថ្ងៃទី៩ ខែសីហា ឆ្នាំ២០២២ ក្រោមបទចោទ «រារាំង ញុះញង់ បង្កើតសកម្មភាពអនាធិបតេយ្យតាមដងផ្លូវសាធារណៈ» ទៅតាមបណ្ដឹងរបស់លោក មាស សម្បូរ ដែលពលរដ្ឋប្រាប់ថា ជាប្រធានសន្តិសុខខណ្ឌព្រែកព្នៅ។
ការកោះហៅតំណាងពលរដ្ឋទាំង៧នាក់នេះធ្វើឡើងក្រោយពីពួកគេនាំគ្នាតវ៉ាប្រឆាំងមិនឱ្យអាជ្ញាធរចាក់ដីលុបបឹងតាមោក ដោយថាប៉ះពាល់ដល់កន្លែងអាស្រ័យផល និងការតវ៉ាទាមទារសុំការអភិវឌ្ឍនៅនឹងកន្លែង ក្រោយអាជ្ញាធរថា ពួកគាត់រស់នៅលើដីចំណីផ្លូវដោយខុសច្បាប់។
នៅព្រឹក និងរសៀលថ្ងៃអង្គារនេះ ពលរដ្ឋចំនួន២នាក់ ក្នុងចំណោម៧នាក់ ត្រូវចូលឆ្លើយបំភ្លឺនៅសាលាដំបូងរាជធានីភ្នំពេញ ក្នុងនោះមានអ្នកស្រី ប្រាក់ សុភា និងអ្នកស្រី ផល សុខុម។
តំណាងប្រជាពលរដ្ឋ ២៥០គ្រួសារ រស់នៅជាប់បឹងតាមោក ក្នុងសង្កាត់សំរោងត្បូង ខណ្ឌព្រែកព្នៅ រាជធានីភ្នំពេញ អ្នកស្រី ប្រាក់ សុភា បានឱ្យដឹងបន្ទាប់ពីចូលឆ្លើយបំភ្លឺថា បើតាមដីការបស់តុលាការ គឺដើមបណ្ដឹងបានប្ដឹងតំណាងពលរដ្ឋចំនួន១៦នាក់ទៅតុលាការ ក្នុងនោះមាន ៧នាក់បានផ្ដិតមេដៃទទួលដីការួច។ អ្នកស្រីចាត់ទុកការកោះហៅតំណាងពលរដ្ឋទៅបំភ្លឺនេះ ថាជារឿងអយុត្តិធម៌ ខណៈដែលពួកគាត់គ្រាន់តែតវ៉ាទាមទារឱ្យមានដំណោះស្រាយដីធ្លីសម្រាប់ពលរដ្ឋ ២៥០គ្រួសារ ស្មើនឹង១០៨ខ្នងផ្ទះ និងការពារដីធ្លីផ្ទះសម្បែងដែលខ្លួនធ្លាប់រស់នៅ បែរជាត្រូវជាប់បណ្ដឹងនៅតុលាការទៅវិញ។
អ្នកស្រីថា៖ «វាឈឺចាប់ វាអយុត្តិធម៌បំផុត […] ពួកខ្ញុំអត់មានប៉ះពាល់ពាក្យអសុរោះណាមួយទៅលើអាជ្ញាធរដែនដីខណ្ឌទេ អ៊ីចឹងខ្ញុំសូមបដិសេធការចោទ ដែលអាជ្ញាធរចោទពួកខ្ញុំ ខ្ញុំអត់មានបានប្រមាថទៅលើអាជ្ញាធរ មានតែលើកដៃសំពះសុំថាប្រជាពលរដ្ឋគ្រាន់តែសុំកុំឱ្យមានការរុះផ្ទះប្រជាពលរដ្ឋទេ ព្រោះប្រជាពលរដ្ឋរស់នៅលើហ្នឹងតាំងពីឆ្នាំ១៩៩០មកហើយ រឿងអីដែលត្រូវឱ្យពលរដ្ឋរុះចេញ? អ៊ីចឹងពលរដ្ឋទាំងអស់គ្នាអត់មានអ្នកណាញុះញង់អ្នកណាទេ»។
កណីនេះ អ្នកស្រី ប្រាក់ សុភា បានស្នើដល់ព្រះរាជអាជ្ញាអមសាលាដំបូងរាជធានីភ្នំពេញ ទម្លាក់ចោលបទចោទទៅលើតំណាងប្រជាពលរដ្ឋទាំង ៧រូបនោះ។
វីអូឌី មិនអាចសុំការបញ្ជាក់ជុំវិញករណីនេះពីលោក មាស សម្បូរ ដែលពលរដ្ឋអះអាងថាជាប្រធានសន្តិសុខខណ្ឌព្រែកព្នៅ បានទេ នៅព្រឹកថ្ងៃអង្គារនេះ។
ប៉ុន្តែអភិបាលខណ្ឌព្រែកព្នៅ លោក សុខ សម្បត្តិ ប្រាប់វីអូឌីកាលពីថ្ងៃទី២២ ខែមិថុនា ឆ្នាំ២០២២ ថាពលរដ្ឋទាំងនោះបានរស់នៅលើចំណីផ្លូវលេខ១៣០ ដោយខុសច្បាប់ ដែលផ្លូវនេះ រដ្ឋាភិបាលមានគម្រោងពង្រីកឱ្យបាន៥០ម៉ែត្រ។ លោកថា អាជ្ញាធរមិនអាចឱ្យពលរដ្ឋទាំងនោះអភិវឌ្ឍនៅនឹងកន្លែងបានឡើយ។
លោកបន្តថា កន្លងមក អាជ្ញាធរខណ្ឌ និងរដ្ឋបាលរាជធានីភ្នំពេញ បានសម្របសម្រួលដោះស្រាយជាច្រើនដងហើយ ដោយសុំដោះដូរដីឱ្យពលរដ្ឋទៅកន្លែងផ្សេងដែលរៀបចំដោយអាជ្ញាធរ ស្ថិតក្នុងភូមិសំរោងត្បូងដូចគ្នា និងចេញបណ្ណកម្មសិទ្ធិស្របច្បាប់ជូនពលរដ្ឋថែមទៀត ប៉ុន្តែពលរដ្ឋទាំងនោះមិនព្រមទទួលយកការដោះស្រាយនេះ ដែលធ្វើឱ្យការដោះស្រាយអូសបន្លាយយូរបែបនេះ៕
