អង្គការធ្វើការផ្នែកសិទ្ធិមនុស្សមួយ បានរកឃើញថា ការផ្ដល់ប្រាក់កម្ចីមិនផ្លូវការ កំពុងដាក់គោលដៅលើស្រ្តីខ្មែរ នៅលើបណ្ដាញសង្គមហ្វេសប៊ុក និងតេឡេក្រាម ហើយការប្រើប្រាស់កម្ចីអនឡាញនេះ អាចទាញស្ដ្រីទាំងនោះឱ្យធ្លាក់ក្នុងបំណុលវ័ណ្ឌក និងការជំរិតទារប្រាក់ តាមរយៈការប្រើប្រាស់រូបភាព និងវីដេអូអាក្រាតរបស់ជនរងគ្រោះ។
ក្នុងរបាយការណ៍របស់អង្គការលីកាដូ កាលពីថ្ងៃទី០១ ខែសីហា ឆ្នាំ២០២២នេះ ឱ្យដឹងថា កាលពីឆ្នាំមុន អង្គការនេះ បានផ្ដល់សេវាមួយចំនួនដល់ស្ត្រី ៣នាក់ ដែលរងការបៀតបៀនដោយអ្នកផ្ដល់កម្ចីមិនផ្លូវការ ក្នុងនោះស្ត្រីម្នាក់ៗជួបប្រទះរឿងរ៉ាវស្រដៀងគ្នា។
របាយការណ៍បន្តថា ដំបូងឡើយ ស្រ្ដីទាំង៣រូបនេះ បានខ្ចីប្រាក់ប្រមាណ ៥០ដុល្លារ ពីក្រុមហ៊ុនដែលផ្សព្វផ្សាយនៅលើហ្វេសប៊ុក ដើម្បីផ្គត់ផ្គង់ការចំណាយប្រចាំថ្ងៃ ឬព្យាបាលជំងឺ ប៉ុន្ដែក្រោយពីស្រ្ដីទាំងនោះ បានទទួលប្រាក់កម្ចីតូចៗហើយ ពួកគាត់បានប្រឈមនឹងអត្រាការប្រាក់ដ៏ខ្ពស់ និងភាពមិនច្បាស់លាស់នៃលក្ខខណ្ឌកម្ចី ដែលនាំឱ្យមានការកើនឡើងបន្ទុកបំណុល។ បន្ទាប់មកអ្នកផ្ដល់ប្រាក់កម្ចីថ្មី បានចាប់ផ្ដើមទាក់ទងទៅកាន់ជនរងគ្រោះតាមរយៈកម្មវិធីតេឡេក្រាម ដើម្បីស្នើផ្ដល់កម្ចីថ្មីទៀត ហើយក្រោយមកទៀត ក្រុមទាំងនេះ ក៏បានចាប់ផ្ដើមទាក់ទងទៅមិត្តភក្ដិ និងក្រុមគ្រួសាររបស់ស្រ្ដីទាំង ៣នាក់នោះ ដើម្បីដាក់សម្ពាធឱ្យមានការបង់សងត្រឡប់។
ប្រភពដដែល បន្តទៀតថា បន្ទាប់ពីនេះ នៅពេលសម្ពាធនៃអត្រាការប្រាក់ឈានដល់ចំណុចធ្ងន់ធ្ងរ មានក្រុមថ្មីមួយទៀតដែលបានដាក់ឈ្មោះថា Loanly បានស្នើផ្ដល់កម្ចីក្នុងទំហំធំមួយ ឬគ្រប់គ្រាន់សម្រាប់ស្ត្រីម្នាក់ៗយកទៅសងបំណុលតូចៗទាំងនោះ។ ប៉ុន្តែជាដំបូង ក្រុមហ៊ុននេះ មានលក្ខខណ្ឌដោយទាមទារឱ្យស្ត្រីទាំងនេះផ្ញើរូបភាព ឬវីដេអូអាក្រាតកាយឱ្យពួកគេជាថ្នូរមុនបានប្រាក់កម្ចី តាមរយៈកម្មវិធីតេឡេក្រាម ដោយភ្ជាប់ជាមួយទីតាំង និងឯកសារសម្គាល់ខ្លួន។
របាយការណ៍អង្គការលីកាដូ បន្ថែមថា នៅពេលស្រ្ដីទាំងនោះ មានអារម្មណ៍ថាជាប់ក្នុងអន្ទាក់ និងរងការបៀតបៀនពីអ្នកផ្ដល់ប្រាក់កម្ចីតូចៗ ហើយបានយល់ព្រមស្នើសុំកម្ចី និងទាញយកកម្មវិធី Loanly ដែលអាចឱ្យក្រុមហ៊ុនចូលមើលបញ្ជីទំនាក់ទំនងនៅក្នុងទូរសព្ទរបស់ជនរងគ្រោះបាន។ ជាមួយគ្នានេះ ស្ត្រីម្នាក់ៗ បានទទួលប្រាក់តែប៉ុន្មានរយដុល្លារប៉ុណ្ណោះតាមរយៈសេវាផ្ទេរប្រាក់អ៊ីម៉ាន់នី (eMoney) គឺតិចជាងចំនួនដែលក្រុមហ៊ុន Loanly បានសន្យា ដោយអះអាងថា ចំណែកផ្សេងទៀតនៃប្រាក់កម្ចី ត្រូវបានកាត់ជាថ្លៃសេវា។
ប្រភពដដែល គូសបញ្ជាក់ថា បន្ទាប់ពីស្រ្ដីទាំងនេះ ព្រមទទួលកម្ចីនេះហើយ ក្រុមហ៊ុន Loanly បានចាប់ផ្ដើមយុទ្ធនាការដាក់សម្ពាធឱ្យបង់សង ដោយគំរាមបញ្ចេញរូបភាព និងវីដេអូអាក្រាតរបស់អ្នកដែលខ្ចីប្រាក់ទាំងនោះនៅលើអ៊ីនធឺណិត ឬទូរសព្ទឥតឈប់ឈរ ទៅកាន់ជនរងគ្រោះ គ្រួសារ មិត្តភក្ដិ និងសហការីរបស់អ្នកទាំងនោះ ដោយប្រើប្រាស់លេខទូរសព្ទប្លែកៗជាច្រើន។
លើសពីនេះទៅទៀត ក្រុមហ៊ុននេះ បានគំរាមបង្ហោះរូបភាព និងវីដេអូអាក្រាតទាំងនោះ ជាសាធារណៈ រួមទាំងរូបភាពគ្រួសាររបស់ជនរងគ្រោះនៅលើហ្វេសប៊ុក ដោយចោទប្រកាន់អ្នកទាំងនោះអំពីការបោកប្រាស់ និងជាមនុស្សកុហកជាដើម។
ក្រៅពីនេះ ក្រុមហ៊ុន Loanly បានបដិសេធក្នុងការផ្ដល់ព័ត៌មានជាក់លាក់ទៅកាន់ស្ត្រីរងគ្រោះអំពីចំនួនប្រាក់សរុបដែលពួកគេបានជំពាក់ និងបានទុកពេលឱ្យបង់សងត្រឹមតែប៉ុន្មានថ្ងៃប៉ុណ្ណោះ មុនពេលមានការធ្វើទុក្ខបុកម្នេញជាថ្មីទៀត។
លីកាដូ បញ្ជាក់ថា៖ «ស្ត្រីទាំងនេះលើកឡើងពីការទទួលរងផលប៉ះពាល់ធ្ងន់ធ្ងរពីការគំរាមកំហែងជាបន្តបន្ទាប់ទាំងនេះ រួមមានការគិតចង់ធ្វើអត្តឃាត ជំងឺធ្លាក់ទឹកចិត្ត ភាពភ័យខ្លាច និងការព្រួយបារម្ភចំពោះការងារ អាពាហ៍ពិពាហ៍ ឬសុវត្ថិភាពកូនៗរបស់ពួកគេ»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ប្រាប់វីអូឌីនៅថ្ងៃអង្គារនេះថា ករណីស្រី្ដ៣នាក់ ដែលរងការបៀតបៀនដោយអ្នកផ្ដល់កម្ចីមិនផ្លូវការនេះ បានកើតឡើងកាលពីពាក់កណ្ដាលឆ្នាំ២០២១ ដោយពួកគាត់មានភាពក្លាហានចេញមុខ និងបានប្ដឹងប្រឆាំងលើអ្នកដែលធ្វើការឆបោកផ្ដល់ប្រាក់កម្ចី និងការគំរាមចាប់ជំរិតតាមរយៈការប្រើប្រាស់រូបអាក្រាតរបស់ពួកគេនៅលើប្រព័ន្ធអនឡាញ។ ជាមួយគ្នានេះ លោកថា មានស្រ្តីជាជនរងគ្រោះដោយសាររឿងនេះជាច្រើននាក់ទៀត ប៉ុន្ដែពួកគេមិនទាន់ហ៊ានប្រឈមនឹងបញ្ហានេះ។
ជាមួយគ្នានេះ លោក អំ សំអាត លើកឡើងថា មកទល់ពេលនេះ ជនរងគ្រោះទាំងនោះ មិនទាន់ទទួលបានយុត្តិធម៌ តាមរយៈការដាក់បណ្ដឹងទៅកាន់អាជ្ញាធរនោះទេ ដោយអាជ្ញាធរមិនទាន់ចាត់វិធានចំពោះការឆបោកនេះនៅឡើយ។ លោកថា ការណ៍នេះបង្កផលប៉ះពាល់ដល់ជនរងគ្រោះ ដែលធ្វើឱ្យពួកគេបាត់បង់ទំនុកចិត្ត មិនហ៊ានប្រឈមមុខ ហើយការបោកប្រាស់នេះនឹងកាន់តែបន្តកើនឡើង។
លោកថា៖ «ការយឺតយ៉ាវក្នុងការចំណាត់ការរបស់អាជ្ញាធរនឹងធ្វើឱ្យប៉ះពាល់ទៅដល់ជនរងគ្រោះ ទី១ គឺទំនុកចិត្តនៅក្នុងការប្ដឹង គឺការខ្វះភាពក្លាហាន ហើយទី២ ធ្វើឱ្យអ្នកផ្សេងទៀត[ជនរងគ្រោះ]គាត់រារែកក្នុងការចេញមុខក្នុងការប្ដឹង ពីព្រោះអ្នកប្ដឹងមុនហ្នឹង មិនទាន់មានភាពយុត្តិធម៌សម្រាប់គាត់។ ហើយទី៣ កាលណាយឺតយ៉ាវអីចឹង វានឹងបន្តឱ្យអ្នកដែលប្រព្រឹត្តនូវទង្វើទាំងអស់ហ្នឹងបន្តទៅមុខទៀត ដែលធ្វើឱ្យមានអ្នករងគ្រោះនឹងកាន់តែច្រើន»។
ប្រធាននាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ លោក ជា ពៅ បានឱ្យដឹងថា លោកមិនទាន់ទទួលបានពាក្យបណ្ដឹងណាមួយពីករណីកម្ចីអនឡាញនេះទេ រួមទាំងបណ្តឹងរបស់ស្ត្រីទាំង៣នាក់ ដែលបានលើកឡើងនៅក្នុងរបាយការណ៍របស់អង្គការលីកាដូ។ តែយ៉ាងណា លោកថា ឱ្យតែមានពាក្យបណ្ដឹង ក្រសួងនឹងចាត់ការតាមផ្លូវច្បាប់។
លោកថា៖ «តែមានពាក្យបណ្ដឹង គឺយើងចាត់ការតាមផ្លូវច្បាប់ហើយ តែបើគាត់មករាយការណ៍យើងអត់ចាត់ការផ្លូវច្បាប់ទេ ព្រោះអីមិនមែនជាគតិយុត្តិបានទេ អាហ្នឹងគ្រាន់តែរាយការណ៍»។
តែយ៉ាងណា បើតាមរបាយការណ៍របស់អង្គការលីកាដូ ស្ត្រីទាំង៣នាក់នេះ បានដាក់ពាក្យបណ្ដឹងជាផ្លូវការរួចហើយ ទៅនាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ ដោយមានភ្ជាប់ភស្តុតាងជាច្រើនផងដែរ។ តែគិតមកទល់ពេលនេះ នាយកដ្ឋានមួយនេះ នៅមិនទាន់បានចាត់វិធានការលើនរណាម្នាក់ក្នុងរឿងនេះនៅឡើយទេ។
ជាមួយគ្នានេះ ស្ត្រីម្នាក់ដែលត្រូវបានធ្វើទុក្ខបុកម្នេញដោយអ្នកផ្ដល់ប្រាក់កម្ចីអនឡាញ បានលើកឡើងនៅក្នុងរបាយការណ៍របស់អង្គការលីកាដូថា៖ «សូមសំណូមពរដល់ខាងនាយកដ្ឋានប្រឆាំងបទល្មើសបច្ចេកវិទ្យា សូមឱ្យខាងបងៗខាងនាយកដ្ឋាន ជួយពន្លឿននូវពាក្យបណ្ដឹងរបស់ខ្ញុំដែលបានដាក់ និងក៏ដូចជាពាក្យបណ្ដឹងជនរងគ្រោះទាំងអស់ដែលគាត់បានដាក់»។
ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី មានប្រសាសន៍ថា សន្ទុះនៃការឆបោកតាមរយៈប្រព័ន្ធអនឡាញ មានការកើនឡើងចាប់តាំងពីមានការផ្ទុះឡើងនៃជំងឺកូវីដ-១៩ ដោយក្រុមមនុស្សមួយចំនួន បានបង្កើតជាភ្នាក់ងារកម្ចីតាមអនឡាញ ដែលងាយស្រួលក្នុងការស្នើសុំប្រាក់កម្ចី។ លោកបន្តថា ភាគច្រើននៃក្រុមរកស៊ីខុសច្បាប់ទាំងនោះ បានដាក់ការប្រាក់ខ្ពស់ ដែលធ្វើឱ្យប៉ះពាល់ដល់ប្រជាពលរដ្ឋ។
ករណីនេះ លោកបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ មុននឹងដាក់ពាក្យសុំប្រាក់កម្ចីនៅតាមគ្រឹះស្ថានផ្តល់ប្រាក់កម្ចី ជាពិសេសតាមរយៈប្រព័ន្ធអនឡាញ។
លោកថា៖ «អញ្ចឹងខ្ញុំសុំយកឱកាសនេះសំណូមពរដល់ប្រជាពលរដ្ឋយើង ប្រសិនបើបងប្អូនមានការលំបាកខ្វះខាត ត្រូវការដើមទុន ត្រូវការឥណទានហ្នឹង! សូមចៀសផុត ចៀសឱ្យឆ្ងាយពីពួកកម្ចីអនឡាញខុសច្បាប់ទាំងអស់នេះ។ ងាកទៅគ្រឹះស្ថានផ្លូវការដែលបងប្អូនស្គាល់ ដែលគេមានអាជ្ញាប័ណ្ណពីធនាគារជាតិនៃកម្ពុជាហ្នឹង ដើម្បីស្នើសុំធ្វើការកម្ចី ដែលជាទូទៅកម្ចីពួកគាត់មានការប្រាក់សមរម្យ ហើយយន្តការច្បាស់លាស់ក្នុងការការពារអតិថិជន»។
បើតាមរបាយការណ៍របស់អង្គការសិទ្ធិមនុស្សលីកាដូ កាលពីឆ្នាំមុន អង្គការមួយនេះ ក៏បានស្នើទៅក្រុមហ៊ុនហ្វេសប៊ុក និងអាជ្ញាធរពាក់ព័ន្ធ ចាត់វិធានការ ដើម្បីបញ្ឈប់ការរំលោភសិទ្ធិមនុស្សនៅលើប្រព័ន្ធអនឡាញ។ ជាមួយគ្នានេះ លីកាដូ ក៏បានស្នើទៅនាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ ធ្វើការស៊ើបអង្កេតឱ្យបានហ្មត់ចត់ និងឆាប់រហ័ស ដើម្បីធានាយុត្តិធម៌ដល់ជនរងគ្រោះ ស្របតាមច្បាប់ជាធរមាន៕
