សាលាដំបូងរាជធានីភ្នំពេញ នៅថ្ងៃព្រហស្បតិ៍នេះ បានផ្ដន្ទាទោសអតីតស្នងការរងនគរបាលខេត្តកំពង់ឆ្នាំងម្នាក់ឱ្យជាប់ពន្ធនាគាររយៈពេល៤ឆ្នាំ ពីបទ ទន្រ្ទានព្រៃលិចទឹកដោយខុសច្បាប់ជុំវិញបឹងទន្លេសាបចន្លោះឆ្នាំ២០១១ ដល់ឆ្នាំ២០២១។
លោកចៅក្រម លិ សុខា បានប្រកាសសាលក្រមផ្ដន្ទាទោសអតីតស្នងការរងនគរបាលខេត្តកំពង់ឆ្នាំង លោក ស៊ុំ សុជាតិ អាយុ៥២ឆ្នាំ ឱ្យជាប់ពន្ធនាគារ៤ឆ្នាំ និងពិន័យជាប្រាក់ចំនួន៥០លានរៀល (ស្មើប្រមាណ១២ ៥០០ដុល្លារ)។
លោកចៅក្រម សុខា ក៏បានសម្រេចឱ្យមានការរឹបអូសយកប្រាក់ចំនួន៥០៨ ៩៨៨ដុល្លារ ពីលោក សុជាតិ ផងដែរ។ លោកចៅក្រមមានប្រសាសន៍ថា លោក សុជាតិ មានសិទ្ធិប្ដឹងឧទ្ធរណ៍។
លោក សុជាតិ ត្រូវបានចោទប្រកាន់ពីបទ «បំផ្លិចបំផ្លាញ ការគៃបន្លំ ការទន្ទ្រានកាន់កាប់ព្រៃលិចទឹកដោយខុសច្បាប់ ការមិនប្រកាសទ្រព្យសម្បត្តិ និងបំណុល និងការសម្អាតប្រាក់» តាមក្រមព្រហ្មទណ្ឌនៃច្បាប់ស្តីពីជលផល ច្បាប់ប្រឆាំងអំពើពុករលួយ និងច្បាប់ប្រឆាំងការសម្អាតប្រាក់។
ការចាប់ខ្លួនលោក សុជាតិ ត្រូវបានធ្វើឡើងជាផ្នែកមួយនៃការបង្ក្រាបការទន្ទ្រានព្រៃលិចទឹកបឹងទន្លេសាប កាលពីចុងឆ្នាំមុន។
ភ្លាមៗបន្ទាប់ពីលោកនាយករដ្ឋមន្ត្រី ហ៊ុន សែន បានបង្ហោះនៅលើទំព័រហ្វេសប៊ុករបស់លោកថា មានការកាប់បំផ្លាញព្រៃឈើយ៉ាងអនាធិបតេយ្យនៅក្នុងតំបន់អភិរក្ស កងរាជអាវុធហត្ថ និងមន្ត្រីខេត្តបានបើកប្រតិបត្តិការដណ្ដើមយកមកវិញនូវផ្ទៃដីរាប់ម៉ឺនហិកតា។
នៅពេលនោះ លោក សុជាតិ បានប្រគល់ផ្ទៃដីចំនួន៦៧៥ហិកតាមកឱ្យរដ្ឋវិញ។ ទោះយ៉ាងណា លោកត្រូវបានចាប់ខ្លួនពីបទទន្ទ្រានយកដី។
លោក ចាន់ សុជាតិ ដែលជាមេធាវីការពារក្ដីឱ្យលោក ស៊ុំ សុជាតិ មានប្រសាសន៍ថា កូនក្ដីរបស់លោកបានកាន់កាប់ផ្ទៃដីទាំងនេះមែន ប៉ុន្តែគាត់បានប្រគល់ដីនោះមកឱ្យរដ្ឋវិញហើយ បន្ទាប់ពីលោកនាយករដ្ឋមន្រ្តី ហ៊ុន សែន ប្រកាស។
លោកថា៖ «ខ្ញុំគិតថា តុលាការគួរតែផ្ដល់ឱ្យគាត់នូវស្ថានសម្រាលទោស»។
លោកបន្ថែមទៀតថា លោកនឹងពិភាក្សាអំពីការប្ដឹងឧទ្ធរណ៍ជាមួយកូនក្តីរបស់លោក។
មន្ត្រីនគរបាលខេត្តកំពង់ឆ្នាំងម្នាក់ទៀត គឺលោក កែវ ណារុន ក៏ត្រូវបានចាប់ខ្លួនក្នុងពេលតំណាលគ្នានឹងលោក សុជាតិ ដែរ។ ទោះបីយ៉ាងណា អតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន ដែលត្រូវបានចោទប្រកាន់ថាបានរំលោភយកដីជាង២ ០០០ហិកតាជុំវិញបឹងទន្លេសាប ហាក់ដូចជាគេចវេះពីការកាត់ទោស នៅពេលដែលអង្គភាពប្រឆាំងអំពើពុករលួយបានបិទសំណុំរឿងរបស់ខ្លួនប្រឆាំងនឹងរូបលោកកាលពីខែមុន៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Four Years in Jail for Police Official Who Grabbed Tonle Sap Forests