រដ្ឋមន្ត្រីការបរទេសឥណ្ឌូនេស៊ី បានពិភាក្សាអំពីករណីប្រតិបត្តិការឆបោកដែលពលរដ្ឋឥណ្ឌូនេស៊ីបានចាញ់បោក នៅក្នុងជំនួបជាមួយអគ្គស្នងការនគរបាលជាតិកម្ពុជា ហើយក៏បានជួបជាមួយពលរដ្ឋឥណ្ឌូនេស៊ីរាប់សិបនាក់ដែលត្រូវបានជួយសង្គ្រោះពីទីតាំងឆបោកក្នុងខេត្តព្រះសីហនុផងដែរ។
លោកស្រី រីតណូ ម៉ាស៊ូឌី (Retno Marsudi) រដ្ឋមន្ត្រីការបរទេសឥណ្ឌូនេស៊ី កំពុងនៅកម្ពុជា ដើម្បីចូលរួមកិច្ចប្រជុំរដ្ឋមន្រ្តីការបរទេសអាស៊ានក្នុងសប្ដាហ៍នេះ។
បើយោងតាមការបង្ហោះនៅលើបណ្ដាញសង្គម លោកស្រីបានជួបជាមួយអគ្គស្នងការនគរបាលជាតិ លោក នេត សាវឿន កាលពីថ្ងៃអង្គារ និងបានពិភាក្សាអំពីការបង្ខាំងពលរដ្ឋឥណ្ឌូនេស៊ីក្នុងប្រតិបត្តិការឆបោកដែលកំពុងមានការកើនឡើងទូទាំងប្រទេស រហូតដល់ក្លាយជាមជ្ឈមណ្ឌលនៃការជួញដូរមនុស្ស ពលកម្មដោយបង្ខំ និងការធ្វើទារុណកម្ម។
បើយោងតាមការបង្ហោះនៅលើបណ្ដាញសង្គមរបស់ក្រសួងការបរទេសឥណ្ឌូនេស៊ី បានឱ្យដឹងថា៖ «មានកិច្ចពិភាក្សាដ៏រលូនជាមួយអគ្គស្នងការនគរបាលជាតិ នៅរាជធានីភ្នំពេញ។ យើងបានពិភាក្សាអំពីកិច្ចសហប្រតិបត្តិការក្នុងការដោះស្រាយបញ្ហាការជួញដូរពលរដ្ឋឥណ្ឌូនេស៊ី ដោយក្រុមហ៊ុនឆបោកតាមអ៊ីនធឺណិត និងវិធានការទប់ស្កាត់ការជួញដូរមនុស្ស»។
សេចក្ដីថ្លែងការណ៍របស់ក្រសួងការបរទេសឥណ្ឌូនេស៊ី បានចង្អុលបង្ហាញថា ករណីទាំងនេះបានកើតឡើងតាំងពីឆ្នាំ២០២១ ហើយថា ភាគីទាំង២ បានពិភាក្សាអំពីប្រតិបត្តិការរួមគ្នានាពេលអនាគត និងយន្តការដើម្បីជួយជនរងគ្រោះ។
លោកស្រីក៏បានជួបជាមួយពលរដ្ឋឥណ្ឌូនេស៊ីចំនួន៦២នាក់ដែលជាជនរងគ្រោះពី «អំពើឆបោក និងការជួញដូរ» និងត្រូវបានជួយសង្គ្រោះពីប្រតិបត្តិការឆបោកនៅខេត្តព្រះសីហនុ។
ស្ថានទូតឥណ្ឌូនេស៊ីប្រចាំនៅកម្ពុជា មិនបានផ្ដល់ការឆ្លើយតបចំពោះសំណើសុំការអត្ថាធិប្បាយចំពោះករណីនេះឡើយ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន មានប្រសាសន៍ថា លោក នេត សាវឿន និងលោកស្រី រីតណូ ម៉ាស៊ូឌី (Retno Marsudi) បានពិភាក្សាអំពីការចែករំលែកព័ត៌មាន និងការដោះស្រាយបញ្ហាឧក្រិដ្ឋកម្មឆ្លងដែនក្នុងកិច្ចប្រជុំកាលពីថ្ងៃទី២ ខែសីហា។
លោកមិនបានផ្ដល់ព័ត៌មានលម្អិតអំពីពលរដ្ឋឥណ្ឌូនេស៊ី ៦២នាក់ ដែលត្រូវបានជួយសង្គ្រោះកាលពីសប្តាហ៍មុននោះទេ ដោយលោកគ្រាន់តែនិយាយថា ពួកគេកំពុងត្រូវបានរៀបចំបញ្ជូនទៅស្ថានទូត ហើយវាជាបញ្ហាផ្ទៃក្នុងដែលត្រូវបានដោះស្រាយដោយអ្នកជំនាញ។
លោកថា នគរបាលក៏បានទទួលសំណើស្រដៀងគ្នានេះពីប្រទេសផ្សេងទៀតឱ្យជួយបង្ក្រាបបទល្មើសឆ្លងដែន ហើយថាកម្ពុជាក៏បានប្រើបណ្ដាញស្រដៀងគ្នានេះ ដើម្បីជួយពលរដ្ឋខ្មែរនៅក្រៅប្រទេស។
លោកបន្តថា៖ «យើងត្រូវតែឆ្លើយតប ព្រោះយើងមានគោលដៅដូចគ្នា។ កងកម្លាំងអនុវត្តច្បាប់ត្រៀមខ្លួនរួចជាស្រេច ដើម្បីប្រយុទ្ធប្រឆាំងនឹងបទល្មើសនេះ»។
លោក ឆាយ គឹមឃឿន បានថ្លែងទៀតថា នគរបាលកំពុងព្យាយាមអស់ពីសមត្ថភាព ដើម្បីការពារពលករបរទេស និងទប់ស្កាត់ការងារដោយបង្ខំលើពលរដ្ឋមិនមែនជានិវាសនជនទាំងអស់ដែលកំពុងធ្វើការនៅក្នុងប្រទេសកម្ពុជា។
មន្ត្រីនគរបាលកម្ពុជា បាននិយាយសម្រាលចំពោះការរំលោភបំពានដែលត្រូវបានរាយការណ៍នៅក្នុងប្រតិបត្តិការឆបោកក្នុងប្រទេស រួមទាំងការកាត់បន្ថយពលកម្មដោយបង្ខំ និងការបង្ខាំងដោយសារកិច្ចសន្យា ឬវិវាទការងារ៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Indonesian Foreign Minister Talks Scam Compounds With Police Chief