កម្មករប្រមាណ៤០នាក់ ធ្វើការនៅរោងចក្រ ជីងសឹង ស្ថិតក្នុងភូមិក្រាំងស្វាយ ឃុំព្រែកកំពឹស សង្កាត់ដង្កោ រាជធានីភ្នំពេញ បាននាំគ្នាប្រមូលផ្ដុំតវ៉ានៅមុខរោងចក្រ នៅថ្ងៃព្រហស្បតិ៍នេះ ដើម្បីទាមទារឱ្យក្រសួងពាក់ព័ន្ធ និងថៅកែរោងចក្រ ដោះស្រាយវិវាទការងារទៅតាមច្បាប់ ក្រោយរោងចក្របានបញ្ឈប់កម្មករដោយពុំប្រាប់ពីមូលហេតុនិងផ្ដល់ប្រាក់អត្ថប្រយោជន៍ផ្សេងៗដល់កម្មករ។
អ្នកស្រី នុត ផល្លី អះអាងថាបានធ្វើការនៅរោងចក្រ ជីងសឹង រយៈពេល៣ឆ្នាំមកហើយ បានឱ្យដឹងថា ថ្មីៗនេះ ក្រោយពីមានការស្នើសុំបង្កើតសហជីពនៅក្នុងរោងចក្រ តែថៅកែមិនព្រមមក ភាគីរោងចក្របានបញ្ឈប់កម្មករជាបន្តបន្ទាប់ដោយពុំប្រាប់ពីមូលហេតុនោះទេ ហើយក៏មិនទាន់បើកប្រាក់ឈ្នួលចុងក្រោយ (ខែកក្កដា) នៅឡើយដែរ។
ករណីនេះ អ្នកស្រីបានទាមទារឱ្យខាងរោងចក្រដោះស្រាយជូនកម្មករទៅតាមច្បាប់ស្ដីពីការងារ បើទោះថៅកែរោងចក្រមិនទទួលយកពួកគេវិញក៏ដោយ។
អ្នកស្រីថា៖ «ចង់ឱ្យពួកគាត់ដោះស្រាយទៅតាមច្បាប់ការងារ។ ខាងរោងចក្រ បើគាត់ឱ្យធ្វើការវិញក៏ធ្វើ! បើអត់ធ្វើ បញ្ឈប់ពួកខ្ញុំ ត្រូវគិតទៅតាមច្បាប់ការងារ ពួកខ្ញុំធ្វើការបានប៉ុន្មានឆ្នាំ គិតឱ្យប៉ុណ្ណឹងមក»។
បើតាមអ្នកស្រី នុត ផល្លី ដំបូងឡើយ កម្មករដែលធ្វើការនៅរោងចក្របោកកក់ និងជ្រលក់ពណ៌ក្រណាត់ ជីងសឹង នេះ មានចំនួនជាង៥០នាក់ ប៉ុន្តែបច្ចុប្បន្ននៅសល់ជាង៤០នាក់ប៉ុណ្ណោះ ដោយសារថៅកែបានបញ្ឈប់ពួកគេពីការងារ។ អ្នកស្រីបន្តថា កម្មករនៅរោងចក្រនេះមានអតីតភាពការងារចន្លោះពី៣ឆ្នាំដល់១០ឆ្នាំ។
កម្មករម្នាក់ទៀត លោក ផេង ពៅ បម្រើការងារនៅរោងចក្រ ជីងសឹង អស់រយៈពេល៤ឆ្នាំមកហើយ និយាយថា ករណីថៅកែបញ្ឈប់កម្មករជាបន្តបន្ទាប់នេះ គឺមានចេតនារើសអើងសហជីព ខណៈរោងចក្រនេះដំណើរការអាជីវកម្ម ដោយបានគាបសង្កត់កម្មករ និងមិនគោរពច្បាប់ស្តីពីការងារ។ លោកថា ថៅកែបានបញ្ឈប់ពួកគាត់ពីការងារ ហើយបានប្រកាសជ្រើសរើសកម្មករថ្មីឱ្យចូលបម្រើការងារវិញ។
បើតាមលោក ផេង ពៅ ករណីថៅកែបញ្ឈប់ពួកគាត់ពីការងារនេះ គឺមិនបានជូនដំណឹងត្រឹមត្រូវទៅតាមច្បាប់ស្តីពីការងារឡើយ។
លោកបន្ថែមថា៖ «ពេលដែលដូរប្រធានរោងចក្រមកថ្មីហ្នឹង គឺគាត់បានគាបសង្កត់មកលើកម្មករ គាត់ប្រើកម្មករដោយស្រែកសម្លុតមកលើកម្មករ សូម្បីតែប្រធានក៏គាត់ប្រើដោយមិនដឹងខ្យល់អីទាំងអស់។ គាត់អត់មានគោរពច្បាប់ស្ដីពីការងារទេ។ ដល់ពេលយើងនាំគ្នាបង្កើតសហជីពក្នុងរោងចក្រ គេបញ្ឈប់ពួកយើងម្តង៤នាក់ ម្តង៥នាក់ ហើយពេលខាងសហជីពយកឯកសារបង្កើតសហជីពដាក់ជូន គាត់មិនទទួលទេ»។
ប្រធានរដ្ឋបាលរោងចក្រ ជីង សឹង លោក សុខ ពិសី ប្រាប់វីអូឌីថា រោងចក្រព្យួរការងារកម្មករ គឺមិនបានបញ្ឈប់កម្មករនោះទេ។ លោកថា ការព្យួរការងារកម្មករនេះ ដោយសាររោងចក្រអស់អីវ៉ាន់សម្រាប់ឱ្យកម្មករធ្វើ ហើយថា ខាងរោងចក្រក៏បានជូនដំណឹងទៅក្រសួងការងារ អំពីមូលហេតុនៃការព្យួរការងារកម្មករនេះដែរ។
លោកបន្ថែមថា៖ «ខាងខ្ញុំអត់មានការងារឱ្យកម្មករធ្វើ អ៊ីចឹងហើយបានយើងព្យួរការងារពួកគាត់ ដោយសារខាងភ្ញៀវគេអត់មានអីវ៉ាន់ឱ្យមកខាងយើងធ្វើដែរ។ អ៊ីចឹងអត់ដឹងថាកម្មករគាត់តវ៉ារឿងអីដែរ»។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្ដុះបណ្ដាលវិជ្ជាជីវៈ លោក វង្ស សុវណ្ណ មានប្រសាសន៍ថា លោកមិនទាន់បានដឹងរឿងនេះនៅឡើយ ដោយសារលោកជាប់កាន់ករណីផ្សេង។ លោកបានបង្វែរឱ្យទៅសួរអ្នកនាំពាក្យក្រសួងការងារ លោក ហេង សួរ វិញ។
វីអូឌី មិនអាចសុំការឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ នៅថ្ងៃព្រហស្បតិ៍នេះ។
បើតាមកម្មករ នៅម៉ោង២រសៀលនេះ តំណាងក្រសួងការងារបានជួបជាមួយតំណាងកម្មករ តំណាងរោងចក្រ ដើម្បីសម្របសម្រួលរកដំណោះស្រាយ។
ប្រធានសហព័ន្ធសហជីពឯករាជ្យ លោក រី សិទ្ធីណែត មានប្រសាសន៍ថា កន្លងមក មានថៅកែរោងចក្រជាច្រើនបានបញ្ឈប់កម្មករពីការងារ ដោយសារពួកគេចងក្រងបង្កើតសហជីពនៅក្នុងសហគ្រាសដែលពួកគេបម្រើការងារ។ លោកថា ទង្វើនេះបានរំលោភច្បាប់និងសិទ្ធិកម្មករធ្ងន់ធ្ងរ ហើយមិនត្រូវបានខាងក្រសួងការងារមានវិធានការទៅលើថៅកែឡើយ។
លោកបន្ថែមថា៖ «ជាទូទៅ និយោជកមិនចង់ឱ្យមានសហជីពនៅក្នុងរោងចក្រទេ ព្រោះកាលណាតែមានសហជីព គឺសហជីព គេត្រូវបណ្ដុះបណ្ដាលឱ្យគាត់ចេះច្បាប់ការងារ ច្បាប់សហជីព និងអនុសញ្ញាអន្តរជាតិផ្សេងៗ។ កាលណាតែពួកគាត់ចេះច្បាប់សហជីពឬច្បាប់ការងារ មានន័យថា ថៅកែមិនអាចកេងប្រវ័ញ្ច ជិះជាន់ និងរំលោភសិទ្ធិរបស់ពួកគាត់កើតទៀតទេ»។
កាលពីថ្ងៃទី៤ ខែមេសា ឆ្នាំ២០២២ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) បានឱ្យដឹងថា មានរោងចក្រចំនួន២៣ទីតាំង ដែលមានកម្មករសរុប១ ៤០៨នាក់ បានរងគ្រោះដោយការបញ្ឈប់ពីការងារ បន្ទាប់ពីពួកគេប្រើប្រាស់សិទ្ធិក្នុងការបង្កើតសហជីពក្នុងសហគ្រាស និងគ្រឹះស្ថានដែលពួកគេកំពុងធ្វើការ ខណៈរោងចក្រខ្លះទៀតត្រូវបានបិទទ្វារ ដោយសារថៅកែមិនបានទូទាត់ប្រាក់ជូនកម្មករតាមច្បាប់ស្តីពីការងារ។
មួយទៀតនោះ សហជីពថា សំណុំរឿងមួយចំនួនដែលក្រុមប្រឹក្សាអាជ្ញាកណ្ដាលបានដោះស្រាយ និងសម្រេចឱ្យកម្មករឈ្នះហើយ គឺមិនត្រូវបានថៅកែ អនុវត្តតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាលឡើយ ដែលករណីនេះ សហជីពចាត់ទុកថា ជាការរំលោភសិទ្ធិមនុស្សធ្ងន់ធ្ងរ និងជាការកេងប្រវ័ញ្ចកម្លាំងពលកម្មកម្មករ ដែលត្រូវបានហាមឃាត់ដោយច្បាប់៕
