កូដករណាហ្គាវើលដ៍មួយចំនួន នៅថ្ងៃព្រហស្បតិ៍នេះ បន្តប្រមូលផ្ដុំគ្នាជាថ្មីទៀតនៅម្ដុំនាគបាញ់ទឹក ក្បែរក្រុមហ៊ុន ដើម្បីទាមទារឱ្យរដ្ឋាភិបាលជំរុញទៅក្រុមហ៊ុនពន្លឿនការដោះស្រាយបញ្ចប់វិវាទការងារជូនពួកគេ ខណៈជម្លោះនេះបានអូសបន្លាយពេលជាងមួយឆ្នាំមកហើយ។
កញ្ញា សុខ រតនា ជាកូដករណាហ្គាវើលដ៍ បានប្រាប់អ្នកសារព័ត៌មាននៅកន្លែងប្រមូលផ្ដុំថា ដើមចមដែលនាំឱ្យពួកគាត់នាំគ្នាបន្តការតវ៉ាទាមទារបែបអហិង្សាជាថ្មីទៀត ដោយសាររយៈពេលជាងមួយឆ្នាំហើយ ក្រុមហ៊ុនណាហ្គាវើលដ៍នៅតែមិនទាន់ដោះស្រាយជូនពួកគាត់ស្របតាមច្បាប់ការងារនៅឡើយ។
ករណីនេះ កញ្ញាស្នើទៅរដ្ឋាភិបាលនិងស្ថាប័នពាក់ព័ន្ធជំរុញទៅក្រុមហ៊ុនពន្លឿនការដោះស្រាយបញ្ចប់វិវាទការងារជូនពួកគេឱ្យបានឆាប់ បើពុំដូច្នោះទេ ពួកគេនៅតែបន្តធ្វើកូដកម្មរហូតមានដំណោះស្រាយ។
កញ្ញាបន្តថា៖ «យើងមកនេះចង់ឱ្យទម្លាក់បទចោទមកលើកូដករនិងសហជីពទាំង១៤នាក់ និងទី២ ស្នើសុំឱ្យក្រុមហ៊ុនណាហ្គាចេញមកដោះស្រាយវិវាទការងារជូនពួកយើងដោយសន្តិវិធី ដើម្បី[បញ្ចប់]វិវាទការងារនេះ។ បើក្រុមហ៊ុនអត់មានដំណោះស្រាយ [កូដករ]នឹងបន្តទាមទាររហូតមានដំណោះស្រាយ»។
កូដករម្នាក់ទៀត លោក ណាន់ ជីវ័ន្ត ក៏បានស្នើទៅរដ្ឋាភិបាលនិងស្ថាប័នពាក់ព័ន្ធ ជាពិសេសក្រសួងការងារ អនុវត្តតួនាទីរបស់ខ្លួនដោយតម្លាភាព និងមិនលម្អៀងទៅរកក្រុមនិយោជកដែលមានលុយមានអំណាច និងមិនបានគោរពតាមច្បាប់កម្ពុជា។
លោកបន្តថា បើមិនពន្លឿនដោះស្រាយបញ្ចប់វិវាទការងាររវាងក្រុមហ៊ុនណាហ្គាវើលដ៍ជាមួយនឹងកូដករទេ នឹងធ្វើឱ្យពួកគេកាន់តែប្រឈមនឹងបញ្ហាវិបត្តិសេដ្ឋកិច្ចក្នុងគ្រួសារ។
លោកនិយាយថា៖ «ការអូសបន្លាយក្នុងការដោះស្រាយបញ្ចប់វិវាទការងារនេះ ធ្វើឱ្យពួកគាត់ជួបនឹងបញ្ហាសេដ្ឋកិច្ចគ្រួសារ ដោយសារចេញតវ៉ាត្រូវចំណាយលើសាំង ញ៉ាំអាហារ និងបច្ចុប្បន្នកំពុងជាប់បំណុលធនាគារច្រើនមែនទែន»។
កូដករក្រុមហ៊ុនណាហ្គាវើលដ៍ ដែលមានទីតាំងនៅជាប់របងរដ្ឋសភា ក្នុងរាជធានីភ្នំពេញ បានកម្រើកការតវ៉ារបស់ខ្លួនចាប់ពីថ្ងៃទី៩ ខែមេសា ឆ្នាំ២០២១ ក្រោយពីក្រុមហ៊ុននេះបានជូនដំណឹងពីគម្រោងបញ្ឈប់បុគ្គលិក១ ៣២៩នាក់ជាទ្រង់ទ្រាយធំ ក្រោមហេតុផលជួបវិបត្តិហិរញ្ញវត្ថុដោយសារតែការរីករាលដាលនៃជំងឺកូវីដ-១៩។
ក៏ប៉ុន្តែសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានសម្អាងហេតុផ្ទុយពីនេះ ដោយពួកគេចាត់ទុកការបញ្ឈប់នេះថាជាចេតនារបស់ថៅកែដែលចង់លុបបំបាត់សហជីពឯករាជ្យ ផ្ទុយពីច្បាប់ការងារ និងអនុសញ្ញារួមរបស់អង្គការពលកម្មអន្តរជាតិ (ILO) ដែលកម្ពុជាបានផ្ដល់សច្ចាប័ន ខណៈអ្នកដែលត្រូវបញ្ឈប់ទាំងនោះភាគច្រើនជាមេដឹកនាំសហជីព សកម្មជនសហជីព និងប្រតិភូបុគ្គលិក ជាដើម៕
