យោងតាមការចុះផ្សាយដោយទីភ្នាក់ងារសារព័ត៌មាន Reuters បានឱ្យដឹងថា ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) បានធ្វើដំណើរចាកចេញពីទឹកដីនៃកោះតៃវ៉ាន់ហើយកាលពីថ្ងៃពុធម្សិលមិញ ខណៈលោកស្រីថា ឥទ្ធិពលរបស់ចិនពិតជាមិនអាចរារាំងមេដឹកនាំពិភពលោកទាំងឡាយពីការធ្វើដំណើរទៅកាន់កោះមួយនេះឡើយ។
ថ្លែងក្នុងសេចក្ដីថ្លែងការណ៍មួយបន្ទាប់ពីការចាកចេញរបស់ខ្លួន លោកស្រី ផេឡូស៊ី បានលើកឡើងថា៖ «ជារឿងគួរឱ្យសោកស្ដាយមួយ ដែលតៃវ៉ាន់ត្រូវបានរារាំងមិនឱ្យចូលរួមក្នុងកិច្ចប្រជុំជាសកលធំៗ ក្នុងនោះរួមមានមហាសន្និបាតប្រចាំឆ្នាំរបស់អង្គការសុខភាពពិភពលោក ដែលធ្វើឡើងកាលពីពេលថ្មីៗនេះផងដែរ ដោយសារតែការជំទាស់ដោយបក្សកុម្មុយនីស្តចិន [Chinese Communist Party]»។
ទោះជាយ៉ាងណា លោកស្រីបន្ថែមថា៖ «ខណៈដែលពួកគេ [ចិន] អាចរារាំងតៃវ៉ាន់ពីការបញ្ជូនមេដឹកនាំទាំងឡាយរបស់ដែនកោះនេះទៅកាន់វេទិកាពិភពលោក ប៉ុន្តែពួកគេមិនអាចរារាំងមេដឹកនាំពិភពលោក ឬនរណាម្នាក់ពីការធ្វើដំណើរទៅកាន់តៃវ៉ាន់ដើម្បីបង្ហាញពីការគោរពលទ្ធិប្រជាធិបតេយ្យ និងការប្តេជ្ញាចិត្តក្នុងការបន្តកិច្ចសហប្រតិបត្តិការបានឡើយ»។
គួរបញ្ជាក់ថា លោកស្រី ណានស៊ី ផេឡូស៊ី បានធ្វើដំណើរទៅដល់កោះតៃវ៉ាន់ កាលពីយប់ថ្ងៃអង្គារកន្លងទៅ បន្ទាប់ពីចាកចេញពីប្រទេសសិង្ហបុរី និងម៉ាឡេស៊ី។
ក្នុងដំណើរទស្សនកិច្ចរយៈពេលប្រមាណជា១៩ម៉ោង ក្នុងទីក្រុងតៃប៉ិ កោះតៃវ៉ាន់ របស់ប្រធានសភាអាមេរិករូបនេះ លោកស្រីក៏បានទៅកាន់សភាតៃវ៉ាន់ ជួបជាមួយនឹងប្រធានាធិបតី លោកស្រី សៃ អ៊ីងវេន (Tsai Ing-wen), អតីតសកម្មជនធានអានម៉ិន (Tiananmen) អ្នកលក់សៀវភៅហុងកុងមួយរូបដែលត្រូវបានឃុំខ្លួនដោយចិន និងសកម្មជនតៃវ៉ាន់ដែលទើបដោះលែងដោយប្រទេសចិនផងដែរ។
យោងតាមសារព័ត៌មានក្នុងស្រុក លោកស្រី ណានស៊ី ផេឡូស៊ី បច្ចុប្បន្នបានធ្វើដំណើរទៅដល់ប្រទេសកូរ៉េខាងត្បូងហើយ បន្ទាប់ពីចាកចេញពីកោះតៃវ៉ាន់ ខណៈគោលដៅបន្ទាប់នៃដំណើរទស្សនកិច្ចក្នុងទ្វីបអាស៊ីរបស់លោកស្រី គឺត្រូវបានរំពឹងថានឹងទៅកាន់ប្រទេសជប៉ុន៕
