ព្រឹទ្ធសភាគ្រោងបើកកិច្ចប្រជុំពិនិត្យ និងឱ្យយោបល់លើសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០ នៅថ្ងៃទី០៥ ខែសីហា ស្អែកនេះ ក្រោយរដ្ឋសភាបានអនុម័តកាលពីពេលថ្មីៗនេះ។
សេចក្ដីប្រកាសព័ត៌មាន ស្តីពី «លទ្ធផលនៃកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា» ចុះថ្ងៃទី០៤ ខែសីហា ឆ្នាំ២០២២នេះ ឱ្យដឹងថា បន្ទាប់ពីបានពិនិត្យនិងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភាបានកំណត់យកថ្ងៃទី០៥ ខែសីហា ឆ្នាំ២០២២នេះ ក្នុងការបើកសម័យប្រជុំលើកទី៩ ព្រឹទ្ធសភា នីតិកាលទី៤ ដើម្បីពិនិត្យហើយឱ្យយោបល់លើសេចក្ដីព្រាងច្បាប់រដ្ឋធម្មនុញ្ញ ស្ដីពីវិសោធនកម្មមាត្រា១៩ថ្មី(មួយ) មាត្រា៨៩ថ្មី មាត្រា៩៨ថ្មី មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ថ្មី និងមាត្រា៤ថ្មី នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតីនៃស្ថាប័នជាតិ។
អ្នកនាំពាក្យព្រឹទ្ធសភា លោក ម៉ម ប៊ុននាង មានប្រសាសន៍ប្រាប់វីអូឌីនៅថ្ងៃពុធម្សិលមិញថា ព្រឹទ្ធសភាបានទទួលសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០ ពីរដ្ឋសភា កាលពីថ្ងៃទី១ ខែសីហា។ លោកបន្តថា គណៈកម្មាធិការអចិន្ត្រៃយ៍ព្រឹទ្ធសភានឹងស្ដាប់នូវរបាយការណ៍លម្អិតដែលគណៈកម្មការជំនាញរាយការណ៍ នៅថ្ងៃនេះ ដើម្បីពិនិត្យថាតើទម្រង់សេចក្តីព្រាងច្បាប់វិសោធនកម្មនេះស្របនឹងច្បាប់រដ្ឋធម្មនុញ្ញ និងរបបប្រជាធិបតេយ្យសេរីពហុបក្សដែរឬយ៉ាងណា។
គួរបញ្ជាក់ថា រដ្ឋសភាបានអនុម័តទាំងស្រុងលើសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០ ដែលរដ្ឋាភិបាលបានស្នើឡើង កាលពីថ្ងៃទី២៨ ខែកក្កដា ឆ្នាំ២០២២ បើទោះបីជាគណបក្សនៅក្រៅរដ្ឋាភិបាលចំនួន៤ និងក្រុមអង្គការសង្គមស៊ីវិលជាង១០០ស្ថាប័ន បានបង្ហាញក្ដីបារម្ភថា ការស្នើនេះនឹងកាត់បន្ថយអំណាចសភា និងប៉ះពាល់ដល់ប្រព័ន្ធសភានិយមអាស្រ័យធម្មនុញ្ញក្ដី។
តែយ៉ាងណា រដ្ឋមន្ត្រីក្រសួងយុត្តិធម៌ លោក កើត រិទ្ធ បានឡើងការពារសេចក្ដីព្រាងច្បាប់ស្នើកែរដ្ឋធម្មនុញ្ញ ក្នុងកិច្ចប្រជុំរដ្ឋសភាថា ការស្នើធ្វើវិសោធនកម្មលើកទី១០នៃរដ្ឋធម្មនុញ្ញនាពេលនេះ មិនបានកាត់បន្ថយតួនាទី សិទ្ធិតំណាងរាស្ត្រ ក្នុងប្រព័ន្ធរបបសភានិយម ដូចការលើកឡើងរបស់គណបក្សក្រៅរដ្ឋាភិបាលមួយចំនួននោះឡើយ។
លោកថា ការស្នើកែនេះជាការបំពេញភាពខ្វះចន្លោះរដ្ឋធម្មនុញ្ញដើម និងបង្ការភាពជាប់គាំងស្ថាប័នកំពូលរបស់ជាតិក្រោយការបោះឆ្នោត ដើម្បីការពារផលប្រយោជន៍រួម ហើយមិនបានប៉ះពាល់ដល់គោលការណ៍តុល្យភាពអំណាចដែលមានចែងកំណត់ក្នុងរដ្ឋធម្មនុញ្ញឆ្នាំ១៩៩៣ រហូតបច្ចុប្បន្ននេះផងដែរ។
ក្នុងន័យនេះ រដ្ឋមន្ត្រីរូបនេះបញ្ជាក់ថា សិទ្ធិអំណាចរបស់តំណាងរាស្ត្រក្នុងការដាក់សំណួរឬអញ្ជើញសមាជិករដ្ឋាភិបាលមកសាកសួរ តាមមាត្រា៩៦ និង៩៨ថ្មី រួមទាំងការធ្វើញត្តិបន្ទោសឬទម្លាក់រដ្ឋាភិបាល នៅតែអាចធ្វើបាន តាមមតិភាគច្រើនដាច់ខាតនៃសមាជិកសភាទាំងមូល៕