រដ្ឋាភិបាលរុស្ស៊ីបានផ្ដល់កញ្ចប់តេស្តរកវីរុសអុតស្វា (Monkeypox Test Kits) ចំនួន៥០០ឯកតាដល់កម្ពុជា ដើម្បីទប់ស្កាត់ការឆ្លងរាលដាលនៃជំងឺអុតស្វា។
ពិធីប្រគល់និងទទួលកញ្ចប់តេស្តរកវីរុសអុតស្វានេះបានធ្វើឡើងនៅទីស្ដីការក្រសួងសុខាភិបាល នៅថ្ងៃទី០៤ ខែសីហា ឆ្នាំ២០២២ ម្សិលមិញ ដោយមានការចូលរួមពីរដ្ឋមន្រ្តីក្រសួងសុខាភិបាលកម្ពុជា លោក ម៉ម ប៊ុនហេង និងឯកអគ្គរដ្ឋទូតរុស្ស៊ីប្រចាំនៅកម្ពុជា លោក អាណាតូលី បូរ៉ាវីក (Anatoly Borovik) ព្រមទាំងមន្ត្រីពាក់ព័ន្ធជាច្រើនរូបទៀត។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ត្រូវបានទីភ្នាក់ងារទូរទស្សន៍ជាតិកម្ពុជា បានស្រង់ប្រសាសន៍មកផ្សព្វផ្សាយថា ការផ្ដល់ជំនួយកញ្ចប់តេស្តរកវីរុសអុតស្វានេះជាការរួមចំណែកបម្រុង ក៏ដូចជាទប់ស្កាត់ពីការរីករាលដាលនៃជំងឺអុតស្វា។ លោកបន្តថា ជំនួយនេះដែរក៏ជាបង្ហាញពីសាមគ្គីភាពរបស់រដ្ឋាភិបាលនិងប្រជាជនរុស្សីជាមួយរដ្ឋាភិបាលនិងប្រជាជនកម្ពុជា ខណៈពិភពលោកទាំងមូលកំពុងជួបនឹងបញ្ហាប្រឈមជាច្រើន។
គួរបញ្ជាក់ថា រហូតមកដល់ពេលនេះ កម្ពុជាបានរកឃើញករណីជំងឺអុតស្វាតែ១ករណីប៉ុណ្ណោះ ហើយជាករណីនាំចូល។ មន្ត្រីសុខាភិបាលកម្ពុជាបានបញ្ជាក់ថា ក្រសួងបានត្រៀមលក្ខណៈជានិច្ច ដើម្បីឆ្លើយតបបន្ទាន់ ក្នុងករណីមានការផ្ទុះឡើងជំងឺអុតស្វាជាយថាហេតុ៕