ព្រឹទ្ធសភា នៅថ្ងៃសុក្រនេះ បានឯកភាពទាំងស្រុងលើសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០ ដោយឥតកែប្រែ ក្រោមសំឡេង៥៧ លើ៥៧សំឡេង។
សេចក្ដីប្រកាសព័ត៌មាន ស្ដីពីលទ្ធផលនៃការបើកសម័យប្រជុំលើកទី៩ ព្រឹទ្ធសភា នីតិកាលទី៤ ចុះថ្ងៃទី០៥ ខែសីហា ឆ្នាំ២០២២នេះ ឱ្យដឹងថា ក្រោយពីសមាជិកព្រឹទ្ធសភាចំនួន២រូបបានឡើងមានយោបល់រួចមក អង្គប្រជុំព្រឹទ្ធសភាបានពិនិត្យនិងឱ្យយោបល់ឯកភាពទាំងស្រុងលើសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០ទាំងមូល ដោយឥតកែប្រែចំនួន៥៧សំឡេងនៃចំនួនសមាជិកព្រឹទ្ធសភាទាំងមូល។
សេចក្ដីប្រកាសព័ត៌មានដដែលបន្តថា សេចក្ដីព្រាងច្បាប់ធម្មនុញ្ញស្ដីពីវិសោធនកម្មលើកទី១០ បានតាក់តែងឡើងយ៉ាងលម្អិត ដែលធានាបាននូវភាពត្រឹមត្រូវនៃការគោរពគោលការណ៍គ្រឹះនៃរបបរាជានិយមអាស្រ័យដោយរដ្ឋធម្មនុញ្ញ ដែលជារបបដឹកនាំប្រទេសបែបសភានិយម។
ប្រភពដដែលបន្តទៀតថា សេចក្ដីព្រាងច្បាប់នេះក៏ជាការលើកកម្ពស់នូវគោលការណ៍នៃលទ្ធិប្រជាធិបតេយ្យ សេរីពហុបក្ស ដែលប្រជាជនកម្ពុជាមានឆន្ទៈ និងប្រើសិទ្ធិអំណាចរបស់ខ្លួន តាមរយៈការបោះឆ្នោតជ្រើសរើសតំណាងរាស្រ្តដែលប្រព្រឹត្តទៅជារៀងរាល់៥ឆ្នាំម្ដង ប្រកបដោយលក្ខណៈសេរី ត្រឹមត្រូវ និងយុត្តិធម៌ ស្របតាមគោលការណ៍ដែលមានចែងក្នុងរដ្ឋធម្មនុញ្ញ ព្រមទាំងច្បាប់ និងបទដ្ឋានគតិយុត្តជាធរមានរបស់ជាតិ។
កាលពីព្រឹកថ្ងៃទី២៨ ខែកក្កដា ឆ្នាំ២០២២ រដ្ឋសភាបានអនុម័តទាំងស្រុងលើសេចក្តីព្រាងវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម ដោយសំឡេង១០៥លើ១០៦សំឡេង។
យ៉ាងណាមិញ តាមរយៈសេចក្តីថ្លែងការណ៍រួមរបស់ក្រុមអង្គការសង្គមស៊ីវិលជាង១០០ស្ថាប័ន ចុះថ្ងៃទី២៧ ខែកក្កដា ឆ្នាំ២០២២ បានលើកឡើងថា ការធ្វើវិសោធនកម្មរដ្ឋធម្មនុញ្ញនេះអាចនឹងធ្វើឱ្យប៉ះពាល់ដល់ស្ថិរភាពអំណាចរដ្ឋ និងអំណាចនីតិប្រតិបត្តិ ការគោរពសិទ្ធិសេរីភាពពលរដ្ឋខ្មែរដែលបានចារឹកនៅក្នុងរដ្ឋធម្មនុញ្ញ។
មួយវិញទៀត តាមរយៈសេចក្ដីថ្លែងការណ៍របស់ APHR កាលពីថ្ងៃទី២៧ ខែកក្កដា ក៏បានសម្ដែងការព្រួយបារម្ភចំពោះការស្នើឱ្យមានការធ្វើវិសោធនកម្មរដ្ឋធម្មនុញ្ញដោយរដ្ឋាភិបាលលោកនាយករដ្ឋមន្រ្តី ហ៊ុន សែន ដោយពួកគេចាត់ទុកថា វាជាការសម្លាប់លទ្ធិប្រជាធិបតេយ្យនៅក្នុងប្រទេសនេះ។
តែយ៉ាងណា រដ្ឋមន្ត្រីក្រសួងយុត្តិធម៌ លោក កើត រិទ្ធ បានឡើងការពារសេចក្ដីព្រាងច្បាប់ស្នើកែរដ្ឋធម្មនុញ្ញ ក្នុងកិច្ចប្រជុំរដ្ឋសភា ថាការស្នើធ្វើវិសោធនកម្មលើកទី១០នៃរដ្ឋធម្មនុញ្ញនាពេលនេះ មិនបានកាត់បន្ថយតួនាទី សិទ្ធិតំណាងរាស្ត្រ ក្នុងប្រព័ន្ធរបបសភានិយម ដូចការលើកឡើងរបស់គណបក្សក្រៅរដ្ឋាភិបាលមួយចំនួននោះឡើយ។
លោកថា ការស្នើកែនេះជាការបំពេញភាពខ្វះចន្លោះរដ្ឋធម្មនុញ្ញដើម និងបង្ការភាពជាប់គាំងស្ថាប័នកំពូលរបស់ជាតិ ក្រោយការបោះឆ្នោត ដើម្បីការពារផលប្រយោជន៍រួម ហើយមិនបានប៉ះពាល់ដល់គោលការណ៍តុល្យភាពអំណាច ដែលមានចែងកំណត់ក្នុងរដ្ឋធម្មនុញ្ញឆ្នាំ១៩៩៣ រហូតបច្ចុប្បន្ននេះផងដែរ។
ក្នុងន័យនេះ រដ្ឋមន្ត្រីរូបនេះបញ្ជាក់ថា សិទ្ធិអំណាចរបស់តំណាងរាស្ត្រក្នុងការដាក់សំណួរឬអញ្ជើញសមាជិករដ្ឋាភិបាលមកសាកសួរ តាមមាត្រា៩៦ និង៩៨ថ្មី រួមទាំងការធ្វើញត្តិបន្ទោសឬទម្លាក់រដ្ឋាភិបាល នៅតែអាចធ្វើបាន តាមមតិភាគច្រើនដាច់ខាតនៃសមាជិកសភាទាំងមូល៕
