អង្គការសហប្រជាជាតិ (UN) បានលើកឡើងនៅក្នុងរបាយការណ៍ស្រាវជ្រាវមួយ ដោយកត់សម្គាល់ពីសម្ពាធតាមប្រព័ន្ធយុត្តិធម៌ព្រហ្មទណ្ឌ និងការយាយីលើស្ត្រីថា «ប្រព័ន្ធផ្សព្វផ្សាយនៅកម្ពុជាកំពុងស្ថិតនៅក្នុងស្ថានភាពគ្រោះថ្នាក់»។
របាយការណ៍ដែលមានចំណងជើងថា «ស្ថានភាពសេរីភាពសារព័ត៌មាននៅកម្ពុជា» បានពិនិត្យលើការវិវត្តក្នុងវិស័យសារព័ត៌មាន និងបានគូសបញ្ជាក់ពីក្ដីកង្វល់របស់អ្នកសារព័ត៌មានក្នុងប្រទេស ដូចដែលពួកគេបានប្រាប់តាមរយៈកិច្ចសម្ភាសន៍ ក្នុងសិក្ខាសាលា និងការស្ទង់មតិ។
ការិយាល័យសិទ្ធិមនុស្សរបស់អង្គការសហប្រជាជាតិ បានបន្តថា ខ្លួនបានចងក្រងឯកសារករណីអ្នកកាសែតចំនួន២៣ករណីដែលប្រឈមមុខនឹងការចោទប្រកាន់ពីបទល្មើសព្រហ្មទណ្ឌ ចាប់តាំងពីខែមករា ឆ្នាំ២០១៧ ហើយថាការឆ្លើយតបចំពោះការស្ទង់មតិពីអ្នកកាសែតចំនួន៣៥នាក់ បានបង្ហាញថា ពួកគេបានប្រឈមមុខនឹងការជ្រៀតជ្រែកក្នុងការងាររបស់ពួកគេ។
របាយការណ៍នេះក៏បានលើកឡើងពីក្តីបារម្ភអំពីប្រព័ន្ធផ្សព្វផ្សាយភាគច្រើនដែលគាំទ្ររដ្ឋាភិបាល និងគ្រប់គ្រងដោយអ្នកជំនួញនិងឥស្សរជននយោបាយក្នុងប្រទេស។ របាយការណ៍នេះថែមទាំងបានបង្ហាញការផ្សព្វផ្សាយមួយអំពីការតវ៉ារបស់បុគ្គលិកកាស៊ីណូណាហ្គាវើលដ៍ និងរបៀបដែលបណ្តាញសារព័ត៌មាន Fresh News ដែលគាំទ្ររដ្ឋាភិបាល «ជ្រើសរើសរូបថតដោយមានបំណងមួលបង្កាច់ក្រុមបាតុករ»។
ចេញផ្សាយកាលពីល្ងាចថ្ងៃពុធ របាយការណ៍នេះបានសរសេរថា «សារព័ត៌មានឯករាជ្យដែលរិះគន់រដ្ឋាភិបាលកំពុងប្រឈមនឹងការរឹតត្បិតលើសេរីភាពបញ្ចេញមតិ ខណៈប្រព័ន្ធផ្សព្វផ្សាយដែលគាំទ្ររដ្ឋាភិបាលដែលរាយការណ៍តែចំណុចល្អៗអំពីវិធានការរបស់អាជ្ញាធរ អាចចូលទៅកាន់តំបន់ហាមឃាត់ដោយសេរី»។
របាយការណ៍នេះបន្តទៀតថា «មិនសូវមានវត្តមានស្ត្រីនៅក្នុងវិស័យសារព័ត៌មាននៅក្នុងប្រទេសកម្ពុជាឡើយ គឺមានប្រហែលជា ១០% ហើយនេះអាចជាផ្នែកមួយនៃការចាត់ថ្នាក់សង្គមចំពោះស្ត្រី»។
អ្នកសារព័ត៌មានជាស្ត្រីចំនួន១៨នាក់ ដែលខ្លះត្រូវបានស្ទង់មតិ និងខ្លះទៀតត្រូវបានសម្ភាស បាននិយាយថា ពួកគេបានប្រឈមមុខនឹងការរើសអើងយេនឌ័រ ឬអំពើហិង្សា។ មាន៣នាក់បាននិយាយថា ពួកគេត្រូវបានបៀតបៀនដោយផ្ទាល់ដោយមន្ត្រីជាបុរសក្នុងអំឡុងពេលបំពេញការងារ ថែមទាំងមានអ្នកសារព័ត៌មានម្នាក់ត្រូវបានមន្ត្រីសន្តិសុខហែកអាវរបស់គាត់។
យោងតាមរបាយការណ៍នេះ ការឆ្លើយតបរបស់រដ្ឋាភិបាល គឺថាក្រសួងព័ត៌មានគាំទ្រអ្នកសារព័ត៌មានជាស្ត្រី ប៉ុន្តែក្រសួងមិនដែលបានទទួលពាក្យបណ្តឹងពីអ្នកសារព័ត៌មានជាស្ត្រីដែលរងគ្រោះពីការបៀតបៀនឡើយ៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Briefs: Women ‘Hugely Under-Represented’ in Media, Boeng Tamok Questioning Delayed