ប្រធានាធិបតីអាមេរិក លោក ចូ បៃឌិន (Joe Biden) បានថ្លែងថ្កោលទោសការសម្លាប់បុរសមូស្លីម៤នាក់ នៅក្នុងរដ្ឋញូមិចស៊ីកូ (New Mexico) ដែលនគរបាលនិយាយថាអាចជារឿងពាក់ព័ន្ធនឹងឧក្រិដ្ឋកម្មប្រឆាំងវណ្ណៈ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី៧ ខែសីហា ឆ្នាំ២០២២។
លោក បៃឌិន បាននិយាយនៅលើបណ្ដាញសង្គម Twitter កាលពីថ្ងៃអាទិត្យថា៖ «ខ្ញុំមានការខឹងសម្បា និងសោកស្ដាយចំពោះការសម្លាប់បុរសមូស្លីមដ៏គួរឱ្យរន្ធត់ ចំនួន៤នាក់ នៅទីក្រុង Albuquerque»។
លោកបន្តទៀតថា៖ «ខណៈដែលយើងរង់ចាំការស៊ើបអង្កេតពេញលេញ ការអធិដ្ឋានរបស់ខ្ញុំគឺស្ថិតនៅជាមួយក្រុមគ្រួសារជនរងគ្រោះ ហើយរដ្ឋបាលរបស់ខ្ញុំឈរយ៉ាងរឹងមាំជាមួយសហគមន៍មូស្លីម។ ការវាយប្រហារដ៏គួរឱ្យស្អប់ខ្ពើមទាំងនេះមិនគួរកើតមាននៅសហរដ្ឋអាមេ
រិកឡើយ»។
នគរបាលក្នុងទីក្រុង Albuquerque ដែលជាទីក្រុងធំបំផុតរបស់រដ្ឋញូមិចស៊ីកូ (New Mexico) បាននិយាយកាលពីថ្ងៃសៅរ៍ថា ពួកគេកំពុងស៊ើបអង្កេតករណីឃាតកម្មលើបុរសមូស្លីមចំនួន៤នាក់ ដែលឥឡូវនេះពួកគេសង្ស័យថាជាប់ពាក់ព័ន្ធនឹងឃាតកម្មលើកទី៤ កាលពីឆ្នាំមុន។
នគរបាលទីក្រុង Albuquerque បាននិយាយនៅក្នុងសេចក្តីថ្លែងការណ៍មួយថា ពួកគេបានរកឃើញជនរងគ្រោះចុងក្រោយកាលពីយប់ថ្ងៃសុក្រ។ ស្ថានីយ៍ទូរទស្សន៍ KOB4 បានរាយការណ៍ថា សាកសពរបស់ជនរងគ្រោះត្រូវបានរកឃើញនៅជិតការិយាល័យសេវាគ្រួសារលូធឺរ៉ែន (Lutheran Family Services) ដែលផ្តល់ជំនួយដល់ជនភៀសខ្លួន។
នគរបាលមិនបានកំណត់អត្តសញ្ញាណបុរសនោះទេ ប៉ុន្តែបាននិយាយថា គាត់មានអាយុជាង២០ឆ្នាំ ជាពលរដ្ឋមូស្លីម មានដើមកំណើតមកពីអាស៊ី។
នគរបាលបាននិយាយថា៖ «អ្នកស៊ើបអង្កេតជឿថា ឃាតកម្មកាលពីថ្ងៃសុក្រអាចទាក់ទងនឹងឃាតកម្មថ្មីៗចំនួន៣លើបុរសមូស្លីមមកពីអាស៊ីខាងត្បូងផងដែរ»។
ជនរងគ្រោះ២នាក់មុន គឺជាបុរសមូស្លីមមកពីប្រទេសប៉ាគីស្ថាន។ ម្នាក់អាយុ២៧ឆ្នាំ ហើយសាកសពរបស់គាត់ត្រូវបានរកឃើញនៅថ្ងៃទី១ ខែសីហា និងម្នាក់ទៀតអាយុ៤១ឆ្នាំ ត្រូវបានរកឃើញនៅថ្ងៃទី២៦ ខែកក្កដា។
សេចក្តីថ្លែងការណ៍បាននិយាយថា ឥឡូវនេះ ក្រុមអ្នកស៊ើបអង្កេតកំពុងស៊ើបអង្កេតថាតើឃាតកម្មទាំងនេះជាប់ពាក់ព័ន្ធនឹងការស្លាប់របស់បុរសមូស្លីមមកពីប្រទេសអាហ្វហ្គានីស្ថានដែលត្រូវបានសម្លាប់កាលពីថ្ងៃទី៧ ខែវិច្ឆិកា ឆ្នាំ២០២១ នៅខាងក្រៅហាងដែលគាត់បានបើកជាមួយបងប្រុសរបស់គាត់ នៅទីក្រុង Albuquerque ដែរឬទេ។
នគរបាលបានទទូចឱ្យអ្នកដែលដឹងព័ត៌មានអំពីឃាតកម្មនេះទូរសព្ទទៅបណ្ដាញទូរសព្ទបន្ទាន់ (Hotline) ហើយបាននិយាយថា FBI បានជួយក្នុងការស៊ើបអង្កេត។
អភិបាលរដ្ឋញូមិចស៊ីកូ (New Mexico) លោកស្រី មិចឈែល លូចាន់ គ្រីស្យ៉ាម (Michelle Lujan Grisham) បានសម្តែងការខឹងសម្បាចំពោះឃាតកម្មនោះ ដោយថា «មិនអាចអត់ឱនបាន» ហើយបាននិយាយថា លោកស្រីកំពុងបញ្ជូនមន្រ្តីនគរបាលរដ្ឋបន្ថែមទៅទីក្រុង Albuquerque ដើម្បីជួយក្នុងការស៊ើបអង្កេត។
អ្នកស្រីបន្ថែមថា៖ «យើងនឹងបន្តធ្វើអ្វីគ្រប់យ៉ាងដែលយើងអាចធ្វើបាន ដើម្បីគាំទ្រសហគមន៍មូស្លីមនៅទីក្រុង Albuquerque និងរដ្ឋញូមិចស៊ីកូ [New Mexico]»។
ក្រុមប្រឹក្សាទំនាក់ទំនងអាមេរិក-អ៊ីស្លាម ដែលជាក្រុមការពារសិទ្ធិពលរដ្ឋមូស្លីមធំជាងគេនៅសហរដ្ឋអាមេរិក បានផ្តល់រង្វាន់ចំនួន១០ ០០០ដុល្លារដល់អ្នកដែលផ្តល់ព័ត៌មានអំពីឃាតក។
មានភាពតានតឹងកាន់តែខ្លាំងឡើងក្នុងសហគមន៍មូស្លីមនៅទីក្រុង Albuquerque។
លោក តាហឺ ហ្គូបា (Tahir Gauba) នាយកផ្នែកកិច្ចការសាធារណៈ នៃមជ្ឈមណ្ឌលអ៊ីស្លាមនៅរដ្ឋញូមិចស៊ីកូ (New Mexico) បានប្រាប់កាសែត Albuquerque Journal ថា៖ «ឥឡូវនេះ ពលរដ្ឋមូស្លីមចាប់ផ្ដើមភ័យស្លន់ស្លោ»៕
