អភិបាល​ខេត្តព្រះសីហនុ​ព្រមាន​ដក​អាជ្ញាបណ្ណ​ពី​អាជីវកម្ម​កាស៊ីណូ​ណា​ដែល​មាន​បទល្មើស​កើតឡើង

បុរសពីរនាក់ធ្វើដំណើរតាមបណ្ដោយផ្លូវមួយក្នុងខេត្តព្រះសីហនុ ថ្ងៃទី២៧ ខែមិថុនា ឆ្នាំ២០១៩។ (វណ្ណ វិចារ)

ជនជាតិចិន៤រូប ដែលក្នុងនោះ ៣រូបមានមុខរបរជាអ្នកគ្រប់គ្រងក្នុងកាស៊ីណូមួយកន្លែង ត្រូវបានតុលាការចោទប្រកាន់ពីបទឃាតកម្ម ទាក់ទង​ករណីបាញ់សម្លាប់បុរស២នាក់ជាជនជាតិចិនដូចគ្នា នៅក្រុងព្រះសីហនុ កាលពីចុងខែកក្កដាកន្លងទៅ។

អ្នកនាំពាក្យ​សាលាដំបូងខេត្តព្រះសីហនុ លោក លី ចាន់ដារ៉ា បានឱ្យដឹងនៅថ្ងៃចន្ទម្សិលមិញថា ប្រធានផ្នែកគ្រប់គ្រងទីតាំងកាស៊ីណូ​ «តុង​ហ្វា​ង ​ប៉ា​លីរិ​ន (Tong Fang Palirin)» ទាំង៣នាក់នោះ ត្រូវបានចោទប្រកាន់ពីបទ «សមគំនិតក្នុងករណីឃាតកម្ម និងលាក់បាំងភស្តុតាង» ខណៈដែលជនសង្ស័យមួយរូបទៀតត្រូវបានចោទប្រកាន់ពីបទ «មនុស្សឃាត និងកាន់កាប់អាវុធខុសច្បាប់»។

លោកបន្តថា ពួកគេបច្ចុប្បន្នត្រូវបានឃុំខ្លួនជាបណ្ដោះអាសន្ននៅពន្ធនាគារខេត្ត។

យោងតាមរបាយការណ៍របស់សមត្ថកិច្ចបានឱ្យដឹងថា ករណីបាញ់ប្រហារពីសំណាក់ជនជាតិចិនដូចគ្នានេះ បានកើតឡើងកាលពីយប់ថ្ងៃទី៣០ ខែកក្កដា ក្នុងសង្កាត់លេខ២ ដោយក្នុងនោះ​បណ្ដាលឱ្យជនជាតិចិន២នាក់បានស្លាប់បាត់បង់ជីវិត។

យោងតាមអ្នកនាំពាក្យ​សាលាខេត្ត​ព្រះសីហនុ លោក ​ឃាង ភារម្យ បានបញ្ជាក់​ថា ការ​បាញ់​ប្រហារបណ្ដាលឱ្យមានអ្នកស្លាប់បាត់បង់ជីវិត​នេះ ​គឺអាច​កើត​ឡើង​ដោយសារតែបញ្ហា​ជម្លោះ​រឿង​បំណុល។

ទាក់ទិន​ករណីនេះ លោក​​បន្ថែម​ថា អភិបាលខេត្តព្រះសីហនុ លោក គួច ចំរើន បានប្រកាសថា នឹង​មិន​អត់​ឱន​ចំពោះ​រាល់បទ​ល្មើស​ដែលកើតឡើងនៅ​កាស៊ីណូ​ក្នុងខេត្ត​ព្រះសីហនុ​​ឡើយ។

លោកបន្តថា៖ «បន្ទាប់ពីមានករណីបាញ់ប្រហារនានាកើតឡើង គណៈបញ្ជាការឯកភាពរដ្ឋបាលខេត្តបានដាក់វិធានការយ៉ាងតឹងរ៉ឹងលើកាស៊ីណូ និងទីតាំងអាជីវកម្មទាំងឡាយ ដើម្បីទប់ស្កាត់ការបាញ់ប្រហារ ការបង្ខាំង ការប្រើប្រាស់គ្រឿងញៀន និងបទល្មើសផ្សេងៗទៀត។ អាជ្ញាធរខេត្តក៏​នឹង​បិទ​អាជីវកម្ម និង​ស្នើ​រាជ​រដ្ឋាភិបាល​ចេញ​គោលការណ៍​ដក​អាជ្ញាបណ្ណ​ពី​អាជីវកម្ម​ទាំងឡាយណានៅ​ខេត្ត​ព្រះសីហនុដែលមានបទល្មើសកើតឡើងផងដែរ»។

យោងតាមលោក លី ចាន់ដារ៉ា ជនជាប់ចោទជាជនជាតិចិនទាំង៤នាក់ខាងលើនេះ រួមមាន ឈ្មោះ Ding PingPing ភេទស្រី អាយុ៣៥ឆ្នាំ មានមុខរបរជាអ្នកគ្រប់គ្រងកាស៊ីណូ, ឈ្មោះ Xu WeiWei ភេទប្រុស អាយុ៣៥ឆ្នាំ ជាអ្នកគ្រប់គ្រងកាមេរ៉ាសុវត្ថិភាពនៅកាស៊ីណូ, ឈ្មោះ Du Jian Bo ភេទប្រុស អាយុ៤២ឆ្នាំ ជាអ្នកគ្រប់គ្រងសន្តិសុខប្រចាំកាស៊ីណូ និងចុងក្រោយ ​ឈ្មោះ Zheng Yingfei អាយុ៣៧ឆ្នាំ ដែលជាជនដៃដល់៕


បកប្រែនិងសម្រួលចេញពីអត្ថបទដើមភាសាអង់គ្លេស៖ Briefs: Governor Talks Tough After Casino Killings, Love Party Appoints New Leaders

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered