មន្ត្រីជាន់ខ្ពស់ក្រសួងរ៉ែ និងថាមពល បានអះអាងថា ប្រេងឆៅ [ប្រេងកាត] ដែលគេលួចដឹកចេញពីកម្ពុជាកាលពីពាក់កណ្ដាលឆ្នាំមុន ត្រូវបានគេបញ្ជូនត្រលប់មកដល់ប្រទេសថៃវិញហើយ ខណៈកម្ពុជាកំពុងតស៊ូមតិតាមផ្លូវច្បាប់ជាមួយភាគីពាក់ព័ន្ធបន្ថែមទៀត ដើម្បីយកប្រេងទាំងនោះមកចែកប្រយោជន៍គ្នាតាមកិច្ចព្រមព្រៀង។
ការអះអាងនេះ ក្រោយភាគីម្ចាស់កប៉ាល់ MT Strovolos ផ្ទុកប្រេងកម្ពុជាជិត៣០ម៉ឺនប៉ារែល ឬស្មើជាង៤០លានលីត្រនេះ ហើយបើគិតជាទឹកប្រាក់មានតម្លៃប្រមាណ២០លានដុល្លារអាមេរិក ត្រូវបានរដ្ឋាភិបាលកម្ពុជាចោទថាលួចដឹកគេចចេញពីដែនសមុទ្រកម្ពុជាទៅកាន់ប្រទេសថៃ រួចបន្តទៅប្រទេសឥណ្ឌូនេស៊ី និងប្រទេសបង់ក្លាដេស កាលពីពាក់កណ្ដាលឆ្នាំមុននោះ។
ក្នុងសន្និសីទសារព័ត៌មាន ស្តីពី «សមិទ្ធផលសម្រេចបានរយៈពេល៥ឆ្នាំកន្លងមករបស់ក្រសួងរ៉ែ និងថាមពល» ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នាព្រឹកថ្ងៃអង្គារនេះ រដ្ឋលេខាធិការក្រសួងរ៉ែ និងថាមពល លោក ម៉េង សក្តិធារ៉ា បានថ្លែងថា ប្រេងឆៅកម្ពុជាជិត៣០ម៉ឺនបារ៉ែលត្រូវបានគេដឹកយកមករក្សាទុកនៅក្នុងប្រទេសថៃ។ ជាមួយគ្នានេះ លោកថា មន្ត្រីជំនាញរបស់ក្រសួងរ៉ែកំពុងធ្វើការតាមនីតិវិធីច្បាប់ក្នុងការទាមទារយកប្រេងនោះមកចែកជាប្រយោជន៍គ្នា អាចនៅដំណាច់ខែកញ្ញា ឆ្នាំ២០២២ ខាងមុខនេះ។
លោកថ្លែងថា៖ «ក្រៅពីវិធានការច្បាប់ដែលយើងបានអនុវត្តកន្លងមក យើងបានចរចាឡើងវិញអំពីការបែងចែកផលប្រយោជន៍ [ប្រេងជិត៣០ម៉ឺនបារ៉ែលនោះ] ត្រូវបានបែងចែកឱ្យម្ចាស់បំណុល [ក្រុមហ៊ុន KrisEnergy] ខ្លះ ត្រូវបែងចែកឱ្យម្ចាស់កប៉ាល់ខ្លះ ដើម្បីទូទាត់ថ្លៃកប៉ាល់ដែលគេបានជួល ហើយសល់ប៉ុន្មានមកឱ្យយើង។ ការចរចានេះជាការតស៊ូវែងឆ្ងាយ ដើម្បីធ្វើយ៉ាងណាឱ្យយើងទទួលបានផលប្រយោជន៍ច្រើន»។
លោកបន្ថែមថា៖ «លទ្ធផលនៃការចរចានេះ យើងនឹងរាយការណ៍ជូនសម្ដេចតេជោ ដើម្បីស្នើសុំការឯកភាព ប៉ុន្តែយើងទាមទារបានជារួម គឺ៧០ភាគរយនៃប្រេងទាំងអស់ ហើយ២៦ភាគរយសម្រាប់ទូទាត់ទៅឱ្យថ្លៃកប៉ាល់ និង៤ភាគរយសម្រាប់ម្ចាស់បំណុលក្រុមហ៊ុន KrisEnergy ដែលក្ស័យធនទៅហើយនោះ»។
ទោះជាយ៉ាងណា លោក ម៉េង សក្តិធារ៉ា អះអាងថា ករណីលួចដឹកប្រេងឆៅចេញពីដែនសមុទ្រកម្ពុជាទៅក្រៅប្រទេសនោះ មិនជាប់ពាក់ព័ន្ធឬមិនមានការគប់គិតជាមួយមន្ត្រីរដ្ឋាភិបាលណាមួយនោះឡើយ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ថ្លែងថា ការលើកឡើងរបស់មន្ត្រីក្រសួងរ៉ែ និងថាមពល ថាមិនមានមន្ត្រីរដ្ឋាភិបាលរូបណាជាប់ពាក់ព័ន្ធឬការគប់គិតគ្នាលួចនាំប្រេងទៅក្រៅប្រទេសនោះ ទំនងជាសាធារណជនមិនជឿនោះទេ ដោយសារកម្ពុជាធ្លាប់រងការរិះគន់ជុំវិញរឿងបក្ខពួក និងអំពើពុករលួយ ជាដើម។
ចំណែកវិធានការរបស់រដ្ឋាភិបាលដែលធ្វើការងារតាមនីតិវិធីច្បាប់ក្នុងការទាមទារយកប្រេងឆៅមកវិញនោះ ជារឿងល្អ ដើម្បីស្ដារមុខមាត់រដ្ឋាភិបាលលើឆាកអន្តរជាតិ និងជាគំរូល្អ កុំឱ្យអ្នកវិនិយោគផ្សេងៗទៀតដែលមករកស៊ីនៅកម្ពុជាប្រព្រឹត្តអំពើល្មើសច្បាប់បែបនេះបន្តទៀត ។
លោកមានប្រសាសន៍ថា៖ «បើសិនជាយើងមិនបានទាមទារ យើងមិនបានធ្វើឱ្យហ្មត់ចត់ទេ អាចធ្វើឱ្យប្រជាពលរដ្ឋគេអស់ទំនុកចិត្ត ហើយទី២ អាចធ្វើឱ្យក្រុមហ៊ុនរកស៊ី គេអាចធ្វើតាមអំពើចិត្តបន្តទៀត ឬអ្នកដែលមានឱកាសប៉ុនប៉ងលួច ចេះតែលួចតទៅទៀត ព្រោះគ្មានទោស ចេះតែមានអ្នកលួចហើយ។ ប៉ុន្តែបើកាលណាមានទោស យើងអាចទាមទារ យើងអាចបង្អាក់សកម្មភាពនោះបាន កុំឱ្យកើតឡើង ហើយយើងយកវាត្រលប់មកវិញបាន វាផ្តល់ផលប្រយោជន៍ដល់ប្រទេសកម្ពុជាយើង ហើយវាជាមុខមាត់កម្ពុជាលើឆាកអន្តរជាតិដែរ»។
កាលពីខែមិថុនា ឆ្នាំ២០២១ កន្លងទៅនេះ ក្រុមហ៊ុន គ្រីស អែនណឺជី (KrisEnergy) ដែលមានទីតាំងនៅប្រទេសសិង្ហបុរី បានប្រកាសពីការក្ស័យធនរបស់ខ្លួនដោយសារជាប់បំណុល និងថាប្រេងដែលបូមបាននៅប្លុកអេ(A) ក្នុងដែនសមុទ្រកម្ពុជា មានចំនួនតិចតួច មិនគ្រប់គ្រាន់ដូចការរំពឹងទុក។
នៅខែមិថុនាដដែលនោះ ប្រេងឆៅជិត៣០ម៉ឺនបារ៉ែលនោះក៏បាត់ដំណឹងពីកម្ពុជា។ ក្រោយមក នៅខែសីហា ឆ្នាំ២០២១ រដ្ឋាភិបាលឥណ្ឌូនេស៊ីបានប្រកាសថាខ្លួនបានរឹបអូសនាវាដឹកប្រេងមួយគ្រឿងឈ្មោះ MT Strovolos ដែលមានផ្ទុកប្រេងឆៅជិត៣០ម៉ឺនបារ៉ែល និងមាននាវិកនៅលើកប៉ាល់នោះជាង១០នាក់ផងដែរ។
កាលពីថ្ងៃទី៣០ ខែកញ្ញា ឆ្នាំ២០២១ ក្រសួងរ៉ែ និងថាមពល បានចេញសេចក្ដីប្រកាសព័ត៌មានមួយជុំវិញបច្ចុប្បន្នភាពនាវា MT Strovolos និងក្រុមនាវិកដែលត្រូវបានចាប់ខ្លួន ពាក់ព័ន្ធករណីដែលរដ្ឋាភិបាលចោទថាបានលួចប្រេងឆៅរបស់កម្ពុជា។
ក្រសួងរ៉ែ អះអាងថា ប្រេងឆៅទាំងអស់នោះគឺជាទ្រព្យសម្បត្តិរបស់កម្ពុជាគ្រប់ពេលវេលាទាំងអស់ ហើយការលួចឬការរំលោភបំពានកម្មសិទ្ធិលើប្រេងឆៅដោយម្ចាស់នាវា អ្នកគ្រប់គ្រង និងក្រុមនាវិកនៃនាវា MT Strovolos និងបក្ខពួករបស់គេ គឺជាបទល្មើសក្រោមច្បាប់កម្ពុជា៕
