មេបញ្ជាការកងរាជអាវុធហត្ថខេត្តកំពង់ធំបានឱ្យដឹងថា មន្ត្រីរបស់ខ្លួនចំនួន១១នាក់ត្រូវបានឃាត់ខ្លួនទុកនៅបន្ទាយជាបណ្តោះអាសន្នដើម្បីស៊ើបអង្កេតបន្ត ពាក់ព័ន្ធករណីបង្ក្រាបទីតាំងល្បែងស៊ីសងតាមអនឡាញមួយកន្លែងដែលបណ្ដាលឱ្យអនុប្រធានភូមិម្នាក់ស្លាប់។
ការឃាត់ខ្លួនមន្ត្រីកងរាជអាវុធហត្ថខេត្តជាង១០នាក់នេះ ក្រោយអនុប្រធានភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ លោក សួង ឌ័ន ត្រូវបានក្រុមគ្រួសារអះអាងថា បានស្លាប់ដោយសារថប់ដង្ហើមក្នុងពេលបញ្ជូនគាត់ទៅបញ្ជាការដ្ឋានខេត្ត ក្រោយមន្ត្រីកងរាជអាវុធហត្ថស្រុកបានចាប់ខ្លួន និងសង្កត់កលោក។
មេបញ្ជាការកងរាជអាវុធហត្ថខេត្តកំពង់ធំ លោក ហង្ស ថុល ប្រាប់វីអូឌីថា មកទល់ពេលនេះកម្លាំងបញ្ជាការដ្ឋានខេត្តបានឃាត់ខ្លួនមន្ត្រីកងរាជអាវុធហត្ថចំនួន ១១នាក់រួចមកហើយ ដែលពួកគេត្រូវបានឃាត់ឱ្យនៅក្នុងបន្ទាយជាបណ្តោះអាសន្នសិន ដោយរង់ចាំឱ្យកម្លាំងអធិការកិច្ចលើផ្ទៃប្រទេសស្រាវជ្រាវបន្ត។
លោកថា៖ «អាកម្លាំងដែលចេញទៅធ្វើការហ្នឹងហី!ឥឡូវ ឃាត់នៅហ្នឹងអត់ឱ្យទៅណានោះទេ ឱ្យនៅក្នុងបន្ទាយឯណោះ។ ១១នាក់ឯណោះអ្នកដែលធ្វើនោះ អត់ដាក់គុកទេ តែឱ្យគាត់នៅបន្ទាយសិន។ វិធានការ ឥឡូវនេះគឺថាអធិការកិច្ចគេធ្វើការសិន។ បើកាលណាធ្វើហើយ ស្រាវជ្រាវទៅឃើញមានទោស អាហ្នឹងគេដាក់គុកទៅ ប៉ុន្តែការស្រាវជ្រាវ វាមិនប្រាកដថា សុទ្ធតែដូចកាសែតចុះនោះទេ ពួកអ្នកចុះនោះចុះតាមតែគ្នាទេ»។
ទាក់ទិនករណីនេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍ថា កម្លាំងបញ្ជាការដ្ឋានខេត្តកំពង់ធំ ចាប់ជនសង្ស័យ៤នាក់ដាក់ក្នុងរថយន្ត ហើយបន្ទាប់មកឃើញជនសង្ស័យម្នាក់ឈ្មោះ សួង ឌ័ន មានអាការៈមិនស្រួល ក៏បានបញ្ជូនជនសង្ស័យរូបនោះទៅមន្ទីរពេទ្យ តែពេលទៅដល់ក៏បានស្លាប់បាត់បង់ជីវិតតែម្ដង។
លោកថា ៖« មេបញ្ជាការកងរាជអាវុធហត្ថខេត្តកំពង់ធំបានរាយការណ៍មកថា ពាក់ពន័្ធនឹងជនសង្ស័យ៤រូប កំពុងតែប្រព្រឹត្តល្បែងស៊ីសងតាមអនឡាញ ពេលដែលកំពុងតែដឹកជនសង្ស័យមកបញ្ជាការដ្ឋានកងរាជអាវុធហត្ថ ក៏មានជនសង្ស័យម្នាក់ គាត់ថាគាត់មិនស្រួលខ្លួន កងរាជអាវុធហត្ថក៏បានជួយសម្រួលដង្ហើមហើយ ក៏ប៉ុន្ដែបុគ្គលនោះ ទៅដល់មន្ទីរពេទ្យគឺស្លាប់តែម្ដង»។
លោក បន្ដថា៖ « ប៉ុន្ដែនៅថ្ងៃទី៧[ខែសីហា]នេះ ក៏យើងទទួលបានព័ត៌មានបង្ហោះហ្វេសប៊ុកមួយ ប្រហែលជាកូនរបស់គាត់ ថាឪពុករបស់គាត់ត្រូវកងរាជអាវុធហត្ថសង្កត់កបណ្ដាលឱ្យស្លាប់»។
ជាមួយគ្នានេះ លោក អេង ហ៊ី ឱ្យដឹងថា ក្រោយពីទទួលបានករណីនេះ លោក សៅ សុខា មេបញ្ជាការលើកងរាជអាវុធហត្ថលើផ្ទៃប្រទេស បញ្ជាឱ្យស៊ើបអង្កេតដោយបង្កើតឱ្យមានក្រុមការងារចំពោះកិច្ចមួយរបស់កងរាជអាវុធហត្ថលើផ្ទៃប្រទេសដើម្បីស្រាវជ្រាវលើព័ត៌មាននេះ។
អ្នកនាំពាក្យដដែលអះអាងថា ការស៊ើបអង្កេតលើករណីនេះ ដោយឱ្យមេបញ្ជាការខេត្តកំពង់ធំឃាត់ខ្លួនបុគ្គលពាក់ព័ន្ធដែលចុះទៅបង្រ្កាបករណីនេះទាំងអស់ឱ្យនៅបន្ទាយសិន ដើម្បីស្រាវជ្រាវបន្ថែមទៀត។
លោកថា ៖ « ពេលទៅធ្វើប្រតិបត្តិការនោះ គឺសុំឱ្យមេបញ្ជាការខេត្តកំពង់ធំនោះ គឺធ្វើការឃាត់បុគ្គលទាំងនោះនៅបន្ទាយទាំងអស់ ដើម្បីយើងធ្វើការរក្សាភស្តុតាងជាមួយនឹងសាក្សី ដែលនេះជាជំហានដំបូងទៅតាមបទបញ្ជារបស់ឯកឧត្តម នាយឧត្តមសេនីយ៍ សៅ សុខា»។
ទោះបីជាយ៉ាងនេះក្តី កញ្ញា ឌិន នារតី ប្រាប់វីអូឌីនៅថ្ងៃអង្គារនេះថា នៅពេលឪពុករបស់គាត់ គឺលោក សួង ឌ័ន ត្រឡប់មកពីប្រជុំម៉ោង៥ល្ងាច បានចូលហាងកាហ្វេមួយដែលមានហ្គេមឡូតូអនឡាញដែលមានចុះអាជ្ញាបណ្ណត្រឹមត្រូវ។ ប៉ុន្ដែក្រោយមក ក៏មានក្រុមប៉េអឹមមកពីខាងស្រុកបារាយណ៍ពីររថយន្តចុះមកដេញចាប់ឪពុករបស់នាង នឹងបញ្ចូនទៅបញ្ជាការដ្ឋានខេត្តកំពង់ធំ។
កញ្ញា ឱ្យដឹងទៀតថា ប៉េអឹមដេញចាប់ឪពុករបស់នាងជិត១០០ម៉ែត្រ ហើយសង្កត់កទៅខាងក្រោយ ធ្វើឱ្យឪពុករបស់គាត់ពិបាកដកដង្ហើម។ កញ្ញា បន្ថែមថា អំឡុងពេលនៅក្នុងរថយន្តបញ្ជូនទៅខេត្ត ឪពុករបស់នាងក៏បានសុំមន្ត្រីកងរាជអាវុធហត្ថឱ្យដោះខ្នោះដៃដោយសារថប់ដង្ហើម ប៉ុន្ដែប៉េអឹមមិនព្រមដោយថា គាត់យកលេស ហើយឪពុករបស់ខ្លួនក៏បានដាច់ខ្យល់នៅក្នុងរថយន្តសមត្ថកិច្ចតែម្តង។
កញ្ញាថា ៖«មានឡានប៉េអឹមពីរឡានចុះមកក៏ដេញ ប្រផាប់ប្រភីង អ៊ីចឹងហា ហើយក៏គាត់រត់ រត់ប្រហែលជា៨០ ម៉ែត្រ បន្ទាប់មកគេចាប់ ចាប់គាត់ហើយក្រៀកកន្លែងកគាត់ទៅខាងក្រោយ ធ្វើឱ្យគាត់លក្ខណស្លាក់ខ្យល់ គាត់ពិបាកដកដង្ហើម ហើយជិះក្នុងឡានក៏គាត់សុំអង្វរគេដែរ ថាដោះខ្នោះខ្ញុំទៅ ខ្ញុំពិបាកដកដង្ហើមណាស់។ ដល់ពេលទៅក៏ខាងក្រុមប៉េអឹមថាពុកខ្ញុំយកលេស អត់ដោះខ្នោះអត់យកទៅពេទ្យ។ អ៊ីចឹង រហូតធ្វើឱ្យគាត់ដាច់ខ្យល់នៅពាក់កណ្ដាលផ្លូវនៅផ្លូវ១០២»។
កញ្ញា បន្ដថា មន្ត្រីកងរាជអាវុធហត្ថ ក៏បានយកឪពុករបស់នាងទៅពេទ្យ ស្រុកបារាយណ៍ ប៉ុន្ដែពេទ្យមិនបានធ្វើកោសល្យវិច័យឡើយ ដោយសារគាត់បានដាច់ខ្យល់ទៅហើយ។ កញ្ញបន្ដទៀតថា ប៉ូលិសបានធ្វើកំណត់ហេតុថា ឪពុករបស់នាងស្លាប់ដោយសារគាំងបេះដូង ប៉ុន្ដែ កញ្ញា មិនជឿថា ឪពុករបស់នាងស្លាប់ដោយគាំងបេះដូង ដូចការអះអាងនោះឡើយ។
កញ្ញា ឌិន នារតី លើកឡើងថា៖«ជាក់ស្ដែង ខ្ញុំថាមិនមែនដោយជំងឺទេ ដោយសារជនដៃដល់ហ្នឹងបង ដល់ថ្នាក់ធ្វើក្រៀកកគាត់ដល់ថ្នាក់ហ្នឹងពេក»។
មកដល់ពេលនេះ កូនស្រីអនុប្រធានភូមិរូងរូបនេះ ក៏មិនទាន់ដឹងថា មានមូលហេតុអ្វីបានជាប៉េអឹមមកចាប់ឪពុកខ្លួនឡើយ ប៉ុន្ដែកញ្ញាស្នើឱ្យជួយរកយុត្តិធម៌ជូនឪពុកនាងក្នុងករណីនេះ។
អ្នកសម្របសម្រួលនៃអង្គការការពារសិទ្ធិមនុស្សលីកាដូប្រចាំខេត្តកំពង់ធំ លោក ស៊ឹមខុនបញ្ញារ៉ា ប្រាប់វីអូឌីនៅរសៀលថ្ងៃអង្គារនេះថា លោកទើបទទួលបានដំណឹងពីករណីនេះ។ ដូច្នេះលោកពុំទាន់អាចផ្ដល់ព័ត៌មានជាក់លាក់បានឡើយ ប៉ុន្ដែយ៉ាងណា អង្គការលីកាដូប្រចាំខេត្តមួយនេះ កំពុងស៊ើបអង្កេតលើករណីនេះបន្ថែមទៀតផងដែរ៕