អាជ្ញាធរបាននិយាយនៅថ្ងៃអង្គារនេះថា មនុស្សយ៉ាងហោចណាស់៨នាក់បានស្លាប់នៅក្នុងនិងជុំវិញទីក្រុងសេអ៊ូលរបស់ប្រទេសកូរ៉េខាងត្បូង ត្រឹមតែរយៈពេលមួយយប់ បន្ទាប់ពីភ្លៀងធ្លាក់ខ្លាំងបានផ្ដាច់ចរន្តអគ្គិសនី បណ្ដាលឱ្យបាក់ដី និងលិចផ្លូវថ្នល់និងផ្លូវក្រោមដី។ នេះបើយោងតាមការចេញផ្សាយរបស់បណ្ដាញសារព័ត៌មាន Reuters នៅថ្ងៃទី៩ ខែសីហា ឆ្នាំ២០២២នេះ។
យោងតាមរដ្ឋបាលឧតុនិយមកូរ៉េ (KMA) បានឱ្យដឹងថា ផ្នែកភាគខាងត្បូងនៃទីក្រុងសេអ៊ូលត្រូវបានភ្លៀងជន់លិចកម្ពស់១០០មីលីម៉ែត្រ ក្នុងមួយម៉ោង កាលពីល្ងាចថ្ងៃចន្ទ ដោយផ្នែកខ្លះនៃទីក្រុងមានកម្ពស់ទឹកភ្លៀងរហូតដល់១៤១,៥មីលីម៉ែត្រ ដែលជាជំនន់ទឹកភ្លៀងខ្លាំងបំផុតមិនធ្លាប់មាននៅក្នុងប្រទេសកូរ៉េ ក្នុងរយៈពេលជាច្រើនទសវត្សរ៍កន្លងមកនេះ។
លីម ណាយ៊ុង (Lim Na-kyung) អាយុ៣១ឆ្នាំ ជាបុគ្គលិកការិយាល័យបានរៀបរាប់ពីភាពភ័យខ្លាចរបស់នាង នៅល្ងាចថ្ងៃចន្ទ ដោយនិយាយថាស្ថានភាពនេះបានរំឭកនាងអំពីឈុតមួយក្នុងខ្សែភាពយន្តរឿង «កប៉ាល់ទីតានិក» ឆ្នាំ១៩៩៧។
ទិន្នន័យបានបង្ហាញថា អគារយ៉ាងហោចណាស់ចំនួន៧៦៥ខ្នងត្រូវបានបំផ្លាញ ខណៈផ្លូវល្បឿនលឿននិងផ្លូវថ្នល់ចំនួន៥២ខ្សែត្រូវបានបិទ។ មានជនរងគ្រោះប្រហែល៣៩១នាក់នៅតាមតំបន់ធំៗក្នុងទីក្រុងសេអ៊ូល ដែលភាគច្រើនត្រូវស្នាក់នៅតាមសាលារៀនក្នុងតំបន់ និងកន្លែងហាត់ប្រាណ ខណៈ៣៩៩នាក់ផ្សេងទៀតត្រូវបានជម្លៀសជាបណ្តោះអាសន្នទៅកាន់មជ្ឈមណ្ឌលសហគមន៍ និងសាលារៀន៕
