ផ្លូវដីក្រហមមួយខ្សែមានប្រវែងជិត២០គីឡួម៉ែត្រ ស្ថិតនៅឃុំដារ ស្រុកមេមត់ ខេត្តត្បូងឃ្មុំ មានជង្ហុកធំៗ ទឹកដក់លើផ្លូវ មានភក់ជ្រាំ និងរអិលខ្លាំងផង ដោយបញ្ហានេះបង្កផលលំបាកដល់ការធ្វើដំណើររបស់ប្រជាពលរដ្ឋនៅតំបន់នោះ ពិសេសក្នុងរដូវវស្សា។
អ្នកភូមិដែលមានផ្ទះនៅតាមបណ្ដោយផ្លូវមួយនេះត្អូញត្អែរថា នៅពេលរដូវវស្សាចូលមកដល់ ពួកគេពិបាកធ្វើដំណើរ ហើយសិស្សានុសិស្សត្រូវខកខានទៅសាលា និងបង្កផលប៉ះពាល់ដល់ការប្រកបមុខរបរផ្សេងៗរបស់ពលរដ្ឋ ជាដើម។
ពលរដ្ឋរស់នៅភូមិដារ ខេត្តត្បូងឃ្មុំ លោក ផាត សុភ័ស វ័យ២៥ឆ្នាំ បានប្រាប់ថា លោកមានកូនអាយុ៦ឆ្នាំម្នាក់ កំពុងសិក្សានៅថ្នាក់បឋម ហើយលោកតែងតែឌុបកូនយកទៅសាលារៀនដោយឆ្លងកាត់ផ្លូវមួយខ្សែនេះ ប៉ុន្តែលោកថា នៅពេលរដូវភ្លៀងចូលមកដល់ កូនរបស់លោកបានខកខានទៅសាលា ដោយសារតែផ្លូវរអិលខ្លាំងពិបាកធ្វើដំណើរ។
លោក ផាត សុភ័ស និយាយថា៖ «ថ្ងៃណាទៅ ខកទៅ! ថ្ងៃណាភ្លៀងរាងតិចទៅ ជួនវាមកទៅ! ភ្លៀងខ្លាំងជូន[កូន]មកអត់កើត ផ្លូវវាពិបាក ពិបាកជិះ[ម៉ូតូ និងកង់]»។
លោក ផាត សុភ័ស ជាពលរដ្ឋរស់នៅក្នុងភូមិដារ រយៈពេល៧ឆ្នាំមកហើយនោះ បានបន្តថា ផ្លូវនេះខូចជិត១០ឆ្នាំមកហើយ ដោយលោកមិនទាន់ឃើញអាជ្ញាធរមកជួសជុលនៅឡើយទេ។
លោក ផាត សុភ័ស ថា ៖«ឮតែគេថាធ្វើផ្លូវៗ! [មិន] ដឹងថ្ងៃណាគេមកធ្វើផង យូរឆ្នាំហើយ»។
យ៉ាងណាក្ដី បុរសវ័យ២៥ឆ្នាំរូបនេះបានស្នើទៅកាន់អាជ្ញាធរស្ថាបនាផ្លូវជនបទមួយខ្សែនេះឱ្យបានលឿន ដើម្បីបង្កភាពងាយស្រួលក្នុងការធ្វើដំណើរប្រចាំថ្ងៃរបស់ពលរដ្ឋ។
លោកស្នើថា៖ «ចង់ឱ្យគេធ្វើផ្លូវហ្នឹងឱ្យស្អាត ស្រណុកជិះទៅធ្វើការ ធ្វើអី»។
ផ្លូវជនបទដែលខូចនេះមានទទឹងជិត១០ម៉ែត្រ មានចម្ងាយពីទីរួមខេត្តត្បូងឃ្មុំប្រមាណ៥០គីឡូម៉ែត្រ និងមានពលរដ្ឋធ្វើដំណើរទៅមកជាហូរហែ។ ចំណែកនៅសងខាងផ្លូវវិញ មានចម្ការអ្នកស្រុកដាំដំណាំជាច្រើនប្រភេទ រួមមាន ដំឡូង ម្រេច កៅស៊ូ ចេក ម្នាស់ ជាដើម ហើយមានផ្ទះអ្នកភូមិ លក់ដូរភេសជ្ជៈ ចំណីអាហារ គ្រឿងទេសផ្សេងៗផងដែរ។
កំពុងអង្គុយលក់ចេកចៀននៅមុខផ្ទះ អ្នកស្រី សែន សម្ផស្ស វ័យ៦៥ឆ្នាំ ជាពលរដ្ឋរស់នៅភូមិដារ បានលើកឡើងថា នាពេលកន្លងមក ដោយសារតែស្ថានភាពផ្លូវពិបាកធ្វើដំណើរ អ្នកភូមិក៏បានប្រមូលថវិកាដើម្បីទិញដីចាក់លុបជង្ហុកធំៗដែលមាននៅលើផ្លូវ ប្រមាណ២០ឡាន រួចមកហើយ ដោយក្នុងមួយឡានត្រូវចំណាយថវិកា ៧០ ០០០រៀល។
អ្នកស្រី សែន សម្ផស្ស ថា៖ «ប្រជាជននឹកឃើញពិបាកពេកទៅ ខ្លះអត់ឱ្យចេញ[លុយ] ខ្លះអត់ចេញមួយរៀលទេ ខ្លះគេមានចិត្ត គេមកហុចលុយឱ្យខ្ញុំអ៊ីចឹងទៅ»។
ស្លៀកក្រមា អត់ពាក់អាវ ពលរដ្ឋមួយរូបទៀត លោក ទុន ធី វ័យ៧៥ឆ្នាំ និយាយថា បើនៅរដូវប្រាំង ផ្លូវនេះមិនសូវបង្កផលលំបាកដល់អ្នកដំណើរនោះទេ តែលោកថា បើរដូវវស្សាចូលមកដល់វិញ គឺអ្នកដំណើរមិនអាចឆ្លងកាត់បានទេ ព្រោះមានភក់ច្រើន និងរអិលខ្លាំង។
លោក ទុន ធី បន្ថែមថា៖ «អ៊ុំអាណិតតែកូនសិស្សទេ ខែភ្លៀង អត់ដល់សាលារៀន ត្រលប់ទៅវិញ។ វាសុទ្ធតែភក់ ទៅម៉េចរួច! ចូលសាលាម៉េចបាន! ត្រលប់ទៅវិញ។ ឱ្យតែខែភ្លៀង តិចក៏៣ [ទៅ] ៤នាក់ដែរ ត្រលប់ទៅវិញ»។
បុរសវ័យចំណាស់រូបនេះចាត់ទុកថា ផ្លូវមួយខ្សែនេះមានសារៈសំខាន់ខ្លាំងចំពោះប្រជាពលរដ្ឋនៅតំបន់នោះ។
លោក ទុន ធី៖ «ផ្លូវនេះគឺផ្លូវសេដ្ឋកិច្ច តាំងពីដំឡូង តាំងពីម្រេច តាំងពីប៉ុន្មានភូមិ [ដឹក] តាមផ្លូវតែមួយហ្នឹង»។
ទិន្នន័យសៀវភៅសារពើភណ្ឌផ្លូវជនបទខេត្តត្បូងឃ្មុំ បោះពុម្ពលើកទី២ ក្នុងឆ្នាំ២០២០ បានឱ្យដឹងថា ផ្លូវជនបទនៅក្នុងខេត្តត្បូងឃ្មុំមានប្រវែងសរុប ជាង២ពាន់គីឡូមេត្រ (២ ៤៥៨,០១២គីឡូម៉ែត្រ) ក្នុងនោះបានបែងចែកផ្លូវជា៨ប្រភេទ រួមមាន ក្រួសក្រហម បេតុង កៅស៊ូ១ជាន់ កៅស៊ូ២ជាន់ ដីស ល្បាយកម្ទេចថ្មភ្នំ ល្បាយក្រួសអាចម៍ផ្កាយ និងខ្សាច់ភ្នំ។
មេឃុំដារ លោក ម៉ៅ ចយ បានទទួលស្គាល់ថា នៅមូលដា្ឋនរបស់លោកពិតជាមានផ្លូវមួយខ្សែប្រវែងជិត២០គីឡូម៉ែត្រពិបាកធ្វើដំណើរពិតមែន ហើយថាលោកក៏បានដាក់សំណើទៅកាន់ថ្នាក់ខេត្តរួចហើយដែរ ក្នុងអំឡុងខែមេសាកន្លងទៅ ដោយថា នៅថ្នាក់ឃុំមិនមានកញ្ចប់ថវិកាគ្រប់គ្រាន់ដើម្បីស្ថាបនានោះទេ។
លោក ម៉ៅ ចយ ថ្លែងថា៖ «អាជ្ញាធរអត់មានលទ្ធភាពធ្វើទេ ព្រោះផ្លូវនេះជាផ្លូវមួយខ្នាតធំ ទាល់ខាងក្រសួងទើបគេមានថវិកាសម្រាប់ធ្វើ។ បើថា ឱ្យឃុំធ្វើ ឃុំមានតែលុយមូលនិធិឃុំ ធ្វើតែផ្លូវតូចៗ ភ្ជាប់ពីភូមិមួយទៅភូមិមួយ បានតែផ្លូវលំតូចៗ»។
ទោះជាយ៉ាងណា លោក ម៉ៅ ចយ បន្ថែមថា មន្រ្តីជំនាញបានមកសិក្សាវាស់វែងផ្លូវនេះដើម្បីជួសជុលរួចរាល់ហើយដែរ តែលោកមិនទាន់អាចបញ្ជាក់ច្បាស់លាស់ពីពេលវេលាដែលត្រូវចុះអនុវត្តគម្រោងសាងសង់នេះនៅឡើយទេ។
បើតាមមេឃុំដាររូបនេះបានឱ្យដឹងថា ផ្លូវដែលបង្កការរំខានឬផលប៉ះពាល់ដល់ការធ្វើដំណើររបស់ប្រជាពលរដ្ឋនេះ មានប្រវែងសរុប១៨គីឡូម៉ែត្រ និងទទឹងផ្លូវ៨ម៉ែត្រ ដោយតភ្ជាប់ពីផ្លូវជាតិលេខ៧ ទៅភូមិស្ពាន ស្ថិតនៅឃុំដារ ឆ្លងកាត់ភូមិស្រែជ្រាំ ភូមិមែកពុក ភូមិកងកេង ភូមិដារ ហើយមានផ្ទះប្រជាពលរដ្ឋរាប់រយគ្រូសារកំពុងរស់នៅ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ថ្លែងថា ករណីដែលផ្លូវមួយចំនួននៅទីជនបទពិបាកធ្វើដំណើរក្នុងឃុំដារ ស្រុកមេមត់ គឺពិតជាបានបង្កការខាតបង់ដល់សេដ្ឋកិច្ចជាតិ រាំងស្ទះដល់ការដឹកជញ្ជូនផលិតផលកសិកម្ម ការដោះដូរទំនិញផ្សេងៗ ឬការប្រកបរបរចិញ្ចឹមជីវិតរបស់ប្រជាពលរដ្ឋ។
ពាក់ព័ន្ធបញ្ហានេះ លោកជំរុញឱ្យអាជ្ញាធរគួរជួសជុលផ្លូវដែលពលរដ្ឋលើកឡើងនេះ ដោយថាជាភារកិច្ចនិងការទទួលខុសត្រូវរបស់រដ្ឋាភិបាល។
លោក យង់ គិមអេង៖ «ភារកិច្ចអាជ្ញាធរគួរសម្រួលរឿងអស់ហ្នឹងដែរ ព្រោះរដ្ឋយកពន្ធពីប្រជាពលរដ្ឋ ក៏ត្រូវជួយសម្រួលផ្លូវ ជួយសម្រួលអីឱ្យបានស្រួល ដើម្បីគាត់អាចធ្វើដំណើរប្រកបរបររកស៊ីបានងាយឆាប់រហ័ស»។
លោកនាយករដ្ឋមន្ត្រី ហ៊ុន សែន ក្នុងពិធីបើកការដ្ឋានសាងសង់ផ្លូវល្បឿនលឿន ភ្នំពេញ-ព្រះសីហនុ ក្នុងឆ្នាំ២០១៩ កន្លងទៅ បានថ្លែងថា រដ្ឋាភិបាលបានកំណត់យកការកសាងផ្លូវជាចំណុចអាទិភាពមួយរបស់រដ្ឋាភិបាលដើម្បីអភិវឌ្ឍប្រទេស ដោយលោកលើកឡើងជាពាក្យស្លោកថា «មានផ្លូវគឺមានសង្ឃឹម»។
លោកថ្លែងយ៉ាងដូច្នេះថា៖ «អាទិភាពបួនដែលខ្ញុំបានប្រកាសតាំងពីឆ្នាំ១៩៨៧ ដែលមានរយៈពេលមកដល់ពេលនេះ គឺមានរយៈពេល៣២ឆ្នាំ គឺនៅតែត្រឹមត្រូវ គឺខ្ញុំបានលើកថា អាទិភាពវិនិយោគនៅពេលនោះប្រើពាក្យ៤ គឺទឹក ផ្លូវ ភ្លើង មនុស្ស! ឥលូវយើងដូរមុំមកជាមនុស្សទៅជាទី១។ អ៊ីចឹងរកលុយធ្វើផ្លូវ រកលុយធ្វើប្រឡាយទឹក រកលុយតភ្ជាប់អគ្គិសនី»។
ត្រលប់មកអ្នកដំណើរម្នាក់ដែលតែងតែធ្វើដំណើរស្ទើរតែរាល់ថ្ងៃ ដើម្បីទៅចម្ការរបស់គាត់នៅជាប់បណ្ដោយផ្លូវដែលខូចស្ថិតនៅឃុំដារឯណោះវិញ អ្នកស្រី អ៊ី ចាន់ធី ប្រាប់ថា អ្នកស្រីធ្លាប់បានឮអាជ្ញាធរសន្យាជួសជុលផ្លូវនេះជាច្រើនដងមក តែក្រោយមកស្ថានភាពផ្លូវនៅដដែល។
យ៉ាងណា ស្ត្រីវ័យ៥៥ឆ្នាំរូបនេះបានស្នើទៅអាជ្ញាធរឱ្យស្ថាបនាផ្លូវនេះឱ្យបានឆាប់ ដើម្បីបានជួយសម្រួលដល់ការធ្វើដំណើរប្រជាពលរដ្ឋដែលត្រូវការប្រើប្រាស់ផ្លូវនេះជាចាំបាច់។
អ្នកស្រី អ៊ី ចាន់ធី និយាយថា៖ «ថ្នាក់លើគេធ្វើម៉េចឱ្យប្រជាជនស្រួល ចាក់កៅស៊ូក៏ដោយ ចាក់អីក៏ដោយ ឱ្យតែស្រួលស្រណុក។ យើងដើរគ្រប់តែគ្នាទៅ មិនដើរតែខ្ញុំទេ ដើរគ្រប់តែគ្នា អ្នកចូលផ្លូវហ្នឹង។ ឧស្សាហ៍ឮគេដែរ គេថាយូរមកហើយថាឱ្យតែជាប់ឆ្នោត គេធ្វើហើយ»៕
