រាជរដ្ឋាភិបាលបានសម្រេចកាត់ផ្ទៃដីសមុទ្រទំហំ៦០០ហិកតាក្នុងខេត្តកំពត ឱ្យទៅក្រុមហ៊ុនឯកជនមួយដើម្បីអភិវឌ្ឍកំពង់ផែថ្មីមួយក្នុងតម្លៃទុនវិនិយោគប្រមាណ១,៧ពាន់លានដុល្លារ។
យោងតាមអនុក្រឹត្យមួយរបស់រាជរដ្ឋាភិបាល ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី៦ ខែមេសា និងបានចេញផ្សាយជាសាធារណៈក្នុងសប្ដាហ៍នេះ បានឱ្យដឹងថា ផ្ទៃដីសមុទ្រទំហំ៦០០ហិកតា ស្ថិតក្នុងសង្កាត់ព្រែកត្នោត ក្រុងបូកគោ ត្រូវបានធ្វើអនុបយោគឱ្យក្រុមហ៊ុន «កំពត ឡូជីស្ទិក អេន ផត (Kampot Logistics and Port)» ដែលត្រូវបានបង្កើតឡើងកាលពីខែមីនា ឆ្នាំមុន។
ថ្លែងក្នុងពិធីបើកការដ្ឋានសាងសង់កំពង់ផែនេះ កាលពីខែឧសភាកន្លងទៅ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ក៏បានបញ្ជាក់ថា ការវិនិយោគកំពង់ផែក្នុងទំហំទឹកប្រាក់ចំនួន១,៧ពាន់លានដុល្លារនេះ រួមមានទាំងមជ្ឈមណ្ឌលភស្តុភារ និងតំបន់សេដ្ឋកិច្ចពិសេសមួយផងដែរ ដើម្បីជួយបំពេញបន្ថែមទៅលើកំពង់ផែដែលមានស្រាប់ ដូចជា កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ។
ជាមួយគ្នានេះ លោកបន្តថា ក្នុងករណីរាជរដ្ឋាភិបាលអភិវឌ្ឍគម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ កំពង់ផែនេះនឹងដើរតួនាទីយ៉ាងសំខាន់សម្រាប់លើកដាក់ ផ្ទេរ ទំនិញចេញ-ចូល ទៅកាន់ទីផ្សារអន្តរជាតិ។ លោកបន្តថា គម្រោងនេះនឹងនាំមកនូវភាពងាយស្រួល និងប្រសិទ្ធភាពខ្ពស់ដល់ពាណិជ្ជករ និងអ្នកវិនិយោគ នៅក្នុងការនាំចេញផលិតផលកសិកម្ម ឧស្សាហកម្ម និងនេសាទ ទៅលក់នៅទីផ្សារនៅក្នុងតំបន់ និងពិភពលោកផងដែរ។
យោងតាមរដ្ឋមន្ត្រីក្រសួងសាធារណការដដែល គម្រោងវិនិយោគកំពង់ផែដែលមានជម្រៅទឹកប្រមាណ១៥ម៉ែត្រមួយនេះ ចែកចេញជា៣ដំណាក់កាល។ ក្នុងនោះ ដំណាក់កាលទី១ គឺចាយទុនប្រមាណ២០០លានដុល្លារអាមេរិក គ្រោងនឹងបញ្ចប់នៅក្នុងឆ្នាំ២០២៥ខាងមុខ ខណៈដំណាក់កាលបន្ទាប់នឹងត្រូវប្រើប្រាស់ដើមទុនវិនិយោគសរុបប្រមាណ១ ៥០០លានដុល្លារអាមេរិក។
លោកបន្តថា៖ «ក្រុមហ៊ុនគឺទទួលបានផ្ទៃដីទំហំធំ៦០០ហិកតា ដូច្នេះហើយពួកគេអាចប្រែក្លាយទីតាំងនេះជាតំបន់សេដ្ឋកិច្ចពិសេស តំបន់ពាណិជ្ជកម្មបាន»។
ទាក់ទិនករណីនេះ ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានថ្លែងឱ្យដឹងនៅថ្ងៃអង្គារម្សិលមិញថា រូបលោកមិនមានព័ត៌មានលម្អិតអំពីគម្រោងនេះទេ។
ទោះជាយ៉ាងណា ទាក់ទងនឹងសំណួរអំពីដំណើរការលទ្ធកម្មនៃគម្រោង ថាតើអ្នកអភិវឌ្ឍន៍អាចនឹងមានទំនាក់ទំនងស្និទ្ធស្នាលជាមួយមន្ត្រីបក្សកាន់អំណាច ឬយ៉ាងណានោះ ប្រធានអង្គភាពអ្នកនាំពាក្យរូបនេះថា៖ «នេះជាគោលការណ៍។ ដូច្នេះហើយ វាមិនផ្អែកលើទំនាក់ទំនងនោះទេ។ វាអាស្រ័យលើគុណភាពនិងសមត្ថភាពរបស់ភាគីដែលទទួលបានលទ្ធកម្មនិងសិទ្ធិក្នុងការអភិវឌ្ឍ»។
លោកបន្ថែមថា ការអភិវឌ្ឍតែងតែមានការដោះដូរ ហើយគម្រោងអភិវឌ្ឍន៍នឹងផ្ដល់ជាចំណូលពន្ធជូនរដ្ឋ ខណៈការផ្ទេរដីគឺមិនត្រូវបានផ្ដល់ជូនអ្នកអភិវឌ្ឍន៍ដោយទទេៗឡើយ។
វីអូឌី មិនអាចសុំការធ្វើអត្ថាធិប្បាយពីអភិបាលក្រុងបូកគោ លោកស្រី ងិន ផលរ័ត្ន និងអ្នកនាំពាក្យសាលាខេត្តកំពត លោក អ៊ឹង ឆាយ បានទេ ទាក់ទងនឹងករណីនេះ។ ចំណែកនាយករដ្ឋបាលសាលាខេត្ត លោក ឃុត ឧសភា បានប្រាប់ឱ្យអ្នកសារព័ត៌មានបង្វែរសំណួរទៅកាន់ក្រសួងដែនដីវិញ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ 600 Hectares of Sea Privatized for Kampot Port Project