សហជីព​ជាង​២០ ទាមទារ​ឱ្យ​ក្រសួងការងារ​បញ្ឈប់​ចំពោះ​ការ​លាបពណ៌​តំណាង​សហជីព​ពាក់ព័ន្ធ​វិវាទ​ណាហ្គាវើលដ៍

កូដករណាហ្គាវើលដ៍បន្ត​ប្រមូល​ផ្ដុំគ្នា​ជា​ថ្មីទៀត​នៅ​ម្ដុំនា​គ​បាញ់​ទឹក ក្បែរ​ក្រុមហ៊ុន ដើម្បី​ទាមទារឱ្យរដ្ឋាភិបាលជំរុញ​ទៅក្រុមហ៊ុន​ពន្លឿនការ​ដោះស្រាយបញ្ចប់វិវាទការងារជូនពួកគេ ថ្ងៃទី០៤ ខែសីហា ឆ្នាំ២០២២។ (ហ៊ាន រង្សី)

សហជីពវិស័យការងារចំនួន២៤ បានទាមទារក្រសួងការងារបញ្ឈប់ជាបន្ទាន់ចំពោះការលាបពណ៌ ការចោទប្រកាន់លើតំណាងសហជីពដែលបំពេញតួនាទីតាមវិជ្ជាជីវៈ និងបញ្ឈប់រាល់ទង្វើជ្រៀតជ្រែកពាក់ព័ន្ធវិវាទការងារក្រុមហ៊ុនណាហ្គាវើលដ៍ ដោយថា ក្រសួងគួរ​​គិតរកដំណោះស្រាយ​លើករណីនេះ ដើម្បីស្ដារកិត្តិយសជាតិប្រសើរជាង។

ការទាមទារនេះធ្វើឡើងក្រោយថ្នាក់ដឹកនាំសហជីពដ៏លេចធ្លោមួយរូប គឺអ្នកស្រី យ៉ាង សុភ័ណ្ឌ ត្រូវបានក្រសួងការងារ កាលពីថ្ងៃទី៤ ខែសីហា ​ចេញលិខិតព្រមាន ដោយចោទប្រកាន់ថា អ្នកស្រីបានបង្ខិតបង្ខំបុគ្គលិកក្រុមហ៊ុនណាហ្គាវើលដ៍ឱ្យបន្ត​តវ៉ា។ លើសពីនេះ ក្រសួង​ថែមទាំងបានបញ្ជាឱ្យអ្នកស្រីបញ្ឈប់ជាបន្ទាន់​រាល់សកម្មភាពទាំងនេះ ដោយចាត់ទុកថា​ជារឿងល្មើសច្បាប់។

ក្រសួងក៏បានលើកឡើង​មាត្រាចំនួន៣ក្នុងច្បាប់ស្ដីពីសហជីព ​រួមមាន មាត្រា៨១ អំពីការធ្វើសកម្មភាពក្រៅដែនអនុវត្តតាមទីតាំងភូមិសាស្រ្ត ឬតាមវិជ្ជាជីវៈ ឬតាមវិស័យដែលបានកំណត់ក្នុងលក្ខន្តិកៈរបស់ខ្លួន ដែលត្រូវពិន័យជាទឹកប្រាក់ប្រមាណជា១ ២៥០ដុល្លារ។

មាត្រា៨៩ អំពីការបង្ខិតបង្ខំឱ្យចូលរួមធ្វើកូដកម្ម ដែលពិន័យជាប្រាក់ប្រមាណ១ ២៥០ដុល្លារ និង​មាត្រា៦៥ អំពីសកម្មភាពរបស់សហជីពដែលចាត់ទុកថាអនុវត្តមិនត្រឹមត្រូវ។

យ៉ាងណា តាមរយៈសេចក្ដីថ្លែងការណ៍រួមចុះថ្ងៃទី៩ ខែសីហា សហភាព សហព័ន្ធសហជីព សហជីពមូលដ្ឋាន សមាគម ដែលមានដូចជា សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍​ រួមនឹងសហជីពក្នុងវិស័យការងារចំនួន២០ស្ថាប័នទៀត បានច្រានចោលនូវ​លិខិតព្រមានរបស់ក្រសួងការងារចំពោះអ្នកស្រី យ៉ាង សុភ័ណ្ឌ។

សហជីពទាំងនោះអះអាងថា អ្នកស្រី យ៉ាង សុភ័ណ្ឌ មិនមែនជាអ្នកដឹកនាំការតវ៉ារបស់កម្មករនិយោជិតណាហ្គាវើលដ៍ឡើយ ប៉ុន្តែការតវ៉ាជិត៧ខែនេះ គឺកើតចេញពីការមិនគោរពច្បាប់របស់ក្រុមហ៊ុនបនល្បែងមួយនេះ ​និងកម្សោយនៃការអនុវត្តច្បាប់របស់កម្ពុជាដើម្បីបង្ខំ​ឱ្យក្រុមហ៊ុននេះគោរពច្បាប់។

បើតាមក្រុមសហជីព រហូតមកដល់ពេលនេះ ក្រសួងការងារគ្មានវិធានការណាមួយធ្វើឱ្យថៅកែណាហ្គាវើលដ៍គោរពច្បាប់ជាតិ និងច្បាប់អន្តរជាតិដែលកម្ពុជាផ្តល់សច្ចាប័នឡើយ ក្រៅពីបង្ខំដាក់សម្ពាធតំណាងសហជីពនិងកម្មករនិយោជិតឱ្យព្រមទទួលយកអ្វីដែលក្រុមហ៊ុនណាហ្គាវើលដ៍ចង់បាន គឺទទួលយកសំណងខុសច្បាប់ និងធានាថាលែងមានវត្តមានសហជីពឯករាជ្យក្នុងក្រុមហ៊ុនរបស់ខ្លួន។

សេចក្តីថ្លែងការណ៍រួមបន្តថា កម្មករជាអ្នកទទួលរងភាពអយុត្តិធម៌លើវិវាទនេះ។ ដូច្នេះ ទើបថ្នាក់ដឹកនាំសហជីព តំណាងកម្មករប្រើប្រាស់ស្មារតីសាមគ្គីភាពជាមួយកម្មករ ក្នុងការប្រើប្រាស់សិទ្ធិសេរីភាពជាមូលដ្ឋាន ដើម្បីការពារវត្តមានសហជីពឯករាជ្យ ដែលជាសំឡេងរបស់កម្មករពិតប្រាកដ។ បន្ថែមពីនេះ ជាយន្តការមួយដែលអាចធ្វើឱ្យកម្មករនិយោជិតមានអំណាចក្នុងតុចរចា ការបែងចែកផលប្រយោជន៍ដោយយុត្តិធម៌ពីថៅកែ ធ្វើឱ្យប្រសើរឡើងនូវជីវភាព និងលក្ខខណ្ឌការងារ។

សហជីពទាំង២៤ស្ថាប័នលើកឡើងថា៖ «យើងខ្ញុំទាំងអស់គ្នាសូមទាមទារក្រសួងការងារ និងបណ្ដុះបណ្ដាលវិជ្ជាជីវៈបញ្ឈប់ជាបន្ទាន់ការលាបពណ៌ ចោទប្រកាន់តំណាងសហជីពដែលបានបំពេញតួនាទីតាមវិជ្ជាជីវៈរបស់ខ្លួន និងរាល់ទង្វើទាំងឡាយណាដែលជ្រៀតជ្រែកលើវិវាទការងារនេះ»។

ពួកគេបន្តថា៖ «ក្រសួងគួរចំណាយពេលវេលាគិតរកដំណោះស្រាយ ដោយឈរលើស្មារតីការពារការរំលោភបំពាន ភាពអយុត្តិធម៌ដែលកម្មករកំពុងជួបប្រទះ ជំរុញឱ្យភាគីនិយោជកដាច់ខាតត្រូវគោរពច្បាប់ និងសេរីភាពសហជីព ក្រោមស្មារតីអនុសញ្ញាស្នូលរបស់អង្គការពលកម្មអន្ដរជាតិ លេខ៨៧ និង៩៨ ក្នុងការបញ្ចប់វិវាទការងារនេះ ដោយទទួលយកតំណាង និងសមាជិកសហជីពចូលធ្វើការវិញ ជាមួយនឹងប្រាក់រម្លឹក ដើម្បីស្ដារកិត្តិយសជាតិ និងក្រុមហ៊ុនណាហ្គាវើលដ៍»។

អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មានប្រសាសន៍ប្រាប់ VOD តាមប្រព័ន្ធតេឡេក្រាម នៅថ្ងៃទី១០ ខែសីហានេះថា ខ្លឹមសារលិខិតរបស់នាយកដ្ឋានវិវាទការងារបានបញ្ជាក់ច្បាស់នូវមាត្រា និងសេចក្តីពន្យល់ផ្សេងៗ។ លោកថា នាយកដ្ឋានមានតួនាទីរម្លឹកពួកគេ ដើម្បីចៀសវាងការធ្វើសកម្មភាពខុសដែនសមត្ថកិច្ច និង​ខុសនីតិវិធី។

លោក ហេង សួរ ថា៖ «អ្វីដែលក្រសួងរម្លឹក និងជូនដំណឹង គឺក្នុងគោលបំណងវិជ្ជមាន ប្រសិនជាបុគ្គលណាមួយនៅតែមើលមិនឃើញ ហើយមានចេតនាបន្តធ្វើខុសច្បាប់ ទោះបីជាបានអានហើយ ដឹងហើយ ថាខុស នៅតែបន្តនោះ ក្រសួងក៏មិនមានជម្រើសអ្វីក្រៅពីរម្លឹកបន្ត។ ហើយប្រសិនជានៅតែបន្តដោយចេតនា ហើយរងចំណាត់ការពីច្បាប់នោះ ក្រសួង ជាពិសេសនាយកដ្ឋានជំនាញ ក៏មិនស្តាយក្រោយថាមិនបានរម្លឹក! ហើយបុគ្គលដែលពាក់ព័ន្ធកុំចោទថាមន្ត្រីជំនាញមិនបានចង្អុលបង្ហាញអំពីទិដ្ឋភាពច្បាប់»។

ទោះបីជាយ៉ាងនេះក្ដី ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ចាត់ទុកការដែលក្រសួងការងារចោទប្រកាន់អ្នកស្រីថាបានបង្ខិតបង្ខំបុគ្គលិកក្រុមហ៊ុនណាហ្គាវើលដ៍ឱ្យ​តវ៉ានោះ ថាជាការលាបពណ៌ គំរាមកំហែងដើម្បីបំបាក់ស្មារតីសហជីព។ ​អ្នកស្រីអះអាងថា អ្វីដែលគាត់ធ្វើ គឺឈរលើវិជ្ជាជីវៈ ក្នុងនាមសហជីពមួយរូបដែលការពារសិទ្ធិនិងប្រយោជន៍ដល់កម្មករដែលរងនូវភាពអយុត្តិធម៌ ហើយក៏មិនបានប្រព្រឹត្តខុសពីច្បាប់ជាតិ និងអន្តរជាតិនោះដែរ។

អ្នកស្រី សុភ័ណ្ឌ ចាត់ទុក​លិខិតព្រមានដល់អ្នកស្រីរបស់ក្រសួង ​ដោយសារ​ឃើញ​អ្នកស្រីបានចូលរួមយ៉ាងសកម្មក្នុងការឃ្លាំមើល ផ្ញើសារសំខាន់ៗ ដែល​ជះឥទ្ធិពលដល់ស្មារតីសាធារណជន និងកម្មករដែលរងនូវភាពអយុត្តិធម៌ឱ្យកាន់តែមានកម្លាំងចិត្តតស៊ូមតិ។

អ្នកស្រី យ៉ាង សុភ័ណ្ឌ ថា៖ «ខ្ញុំគិតថា គេមានការក្រែងរអែងនៅពេលដែលសហជីពប្រើប្រាស់សិទ្ធិនៅក្នុងការសាមគ្គីគ្នា។ វាធ្វើឱ្យគេខ្លាចៗថា នៅពេលដែលយើងប្រើប្រាស់សិទ្ធិនៅក្នុងការសាមគ្គីរវាងសហជីពនិងសហជីព វាធ្វើឱ្យយើងមានឥទ្ធិពលនៅក្នុងការដោះស្រាយអីផ្សេងៗអ៊ីចឹងទៅ។ […] អ៊ីចឹងខ្ញុំគិតថា បើគ្រាន់តែខ្ញុំធ្វើការងារផ្អែកលើវិជ្ជាជីវៈរបស់ខ្ញុំ ហើយ[ចោទ]ថាខ្ញុំធ្វើខុស ខ្ញុំ[ចង់]សួរថា ខ្ញុំធ្វើខុសកន្លែងណា?»

មន្ត្រីសហជីពរូបនេះអះអាងថា នឹងបន្ត​ឃ្លាំមើលការតវ៉ារបស់កម្មករណាហ្គាដដែល ​ដោយមិនខ្លាច​ការគំរាមរបស់ក្រសួងការងារឡើយ។ ​

​នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព លើកឡើងថា រដ្ឋាភិបាលបានយល់ខុសចំពោះតួនាទីរបស់សហជីពក្នុងការគាំទ្រកម្មករ។ លោកស្រីថា តាមពិត តំណាងសហជីពគ្រាន់តែចូលរួមទាមទារឱ្យមានដំណោះស្រាយដល់កម្មកររងគ្រោះដោយសារការបំពានសិទ្ធិការងារ ដោយពួកគេមិនគួរទទួលបានមកវិញនូវ​ការចោទប្រកាន់ឬព្រមានទេ។

មន្ត្រីសិទ្ធិមនុស្សរូបនេះថា ក្រសួងការងារដែល​មានតួនាទីគាំពារពលរដ្ឋ មិនគួរផ្តល់តម្លៃទៅខាងថៅកែជាងកម្មករ និងមិនគួរខកខានចាត់វិធានការដោយស្មើភាពបែបនេះឡើយ។​ លោកស្រីបន្តថា ការអនុវត្តសិទ្ធិតាមច្បាប់ជាតិ និងអន្តរជាតិដែលកម្ពុជាបានផ្ដល់សច្ចាប័ន គួរតែកើតឡើងដោយតម្លាភាព។

លោកស្រី ចក់ សុភាព ថា៖ «យើងត្រូវធ្វើការឆ្លុះបញ្ចាំងឡើងវិញ ថាតើឧបសគ្គនៅលើអី? ហើយតើក្រសួងដែលជាស្ថាប័នមួយដែលមានសមត្ថកិច្ច ដែលផ្តោតទៅលើសិទ្ធិការងារហ្នឹង មានបញ្ហាអ្វីដែលយើងមិនអាចដោះស្រាយបញ្ហាហ្នឹងបាន? អ៊ីចឹងយើងគួរតែយកពេលវេលាក្នុងការឆ្លុះបញ្ចាំងទៅវិញ។ ហើយថាតើក្រសួងគួរតែធ្វើយ៉ាងម៉េច? បង្កបរិយាកាសដើម្បីឱ្យភាគីពាក់ព័ន្ធហ្នឹងអាចបញ្ចេញនូវសំឡេង អាចផ្តល់មតិរបស់ខ្លួន ហើយយកមតិទាំងអស់ហ្នឹងមកសំយោគ យកមកដោះស្រាយ»។

វិវាទការងារក្រុមហ៊ុនណាហ្គាវើលដ៍បានកើតឡើង​ជាង១ឆ្នាំមកហើយ ក្រោយពេល​ក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។ យ៉ាងណា បុគ្គលិកដែលចេញធ្វើកូដកម្មប្រមាណ៧ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករ​ឱ្យអស់ពីក្រុមហ៊ុនកាស៊ីណូនៅកណ្ដាលរាជធានីភ្នំពេញមួយនេះ៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered