សហរដ្ឋអាមេរិកបានប្រគល់សម្បត្តិវប្បធម៌ចំនួន៣០រូប ដោយក្នុងនោះមានរូបចម្លាក់មួយជារចនាប័ទ្មសតវត្សរ៍ទី១០ មកកាន់កម្ពុជាវិញ កាលពីព្រឹកថ្ងៃទី៩ ខែសីហា។
តាមរយៈសេចក្ដីប្រកាសព័ត៌មានរបស់ស្ថានទូតអាមេរិកប្រចាំប្រទេសកម្ពុជា កាលពីម្សិលមិញ ឱ្យដឹងថា លោក Lee Satterfield ឧបការីរដ្ឋមន្រ្តីក្រសួងការបរទេសសហរដ្ឋអាមេរិកទទួលបន្ទុកកិច្ចការអប់រំនិងវប្បធម៌ ចូលរួមជាមួយលោក កែវ ជា ឯកអគ្គរាជទូតកម្ពុជាប្រចាំនៅសហរដ្ឋអាមេរិក និងមន្ត្រីជាន់ខ្ពស់សហរដ្ឋអាមរិកជាច្រើនរូបទៀត បានចូលរួមក្នុងការប្រារព្ធពិធីមាតុភូមិនិវត្តន៍នៃសម្បត្តិវប្បធម៌ជាតិកម្ពុជា។ ក្នុងនោះ សហរដ្ឋអាមេរិកបានប្រគល់មកវិញនូវសម្បត្តិវប្បធម៌ចំនួន៣០រូប ដែលក្នុងនោះរួមមានរូបចម្លាក់មួយជារចនាប័ទ្មសតវត្សរ៍ទី១០។
សហរដ្ឋអាមេរិកបានលើកឡើងថា ពិធីនេះបានបញ្ជាក់ពីសារៈសំខាន់នៃកិច្ចសហប្រតិបត្តិការលើបេតិកភណ្ឌវប្បធម៌ ផ្អែកតាមកិច្ចព្រមព្រៀងស្តីពីសម្បត្តិវប្បធម៌រវាងប្រទេសទាំងពីរ ដែលជាកិច្ចព្រមព្រៀងមានតែមួយគត់រវាងសហរដ្ឋអាមេរិក និងរដ្ឋមួយជាសមាជិកសមាគមអាស៊ាន។
អាមេរិកបន្តថា អស់រយៈពេលជាង២០ឆ្នាំមកនេះ សហរដ្ឋអាមេរិកបានធ្វើការងារការពារ អភិរក្ស និងគោរពដល់បេតិកភណ្ឌវប្បធម៌ដ៏សម្បូរបែបរបស់ប្រទេសកម្ពុជា ដោយសហការជាមួយក្រសួងវប្បធម៌ និងវិចិត្រសិល្បៈ ហើយនិងដៃគូខាងកម្ពុជា និងអាមេរិក។
ចាប់តាំងពីឆ្នាំ២០០១មក សហរដ្ឋអាមេរិកបានផ្តល់ថវិកាចំនួនជាង៥លានដុល្លារសម្រាប់ការងារអភិរក្សវប្បធម៌នៅកម្ពុជា ដោយរួមមានទឹកប្រាក់ចំនួនជាង៣,៥លានដុល្លារ ដែលត្រូវបានផ្ដល់មកតាមរយៈមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ ដើម្បីជួសជុលនិងអភិរក្សប្រសាទភ្នំបាខែង ដែលត្រូវបានកសាងឡើងនៅសតវត្សរ៍ទី៩ ក្នុងខេត្តសៀមរាប។
កាលពីថ្ងៃទី១៦ ខែកក្កដា ឆ្នាំ២០២១ រដ្ឋាភិបាលសហរដ្ឋអាមេរិកសម្រេចបញ្ជូនវត្ថុបុរាណ «រូបចម្លាក់ព្រះស្កន្ទគង់លើក្ងោក» ដែលរឹបអូបពីការកាន់កាប់ខុសច្បាប់នៅទីក្រុងញូយ៉ក ប្រគល់មកកម្ពុជា ដែលជាប្រទេសម្ចាស់ដើមវិញផងដែរ៕