សមត្ថកិច្ចថា កំពុងបន្តស៊ើបអង្កេតនៅឡើយ ទៅលើករណីកងរាជអាវុធហត្ថខេត្តកំពង់ធំចំនួន ១១នាក់ ដែលត្រូវបានឃាត់ខ្លួនកាលពីពេលថ្មីៗនេះពាក់ព័ន្ធនឹងរឿងសង្កត់ក អនុភូមិម្នាក់រហូតដល់ស្លាប់ក្នុងពេលចុះបង្រ្កាបល្បែងឡូតូមួយកន្លែង។
អ្នកនាំពាក្យរបស់កងរាជអាវុធហត្ថលើផ្ទៃប្រទេស លោក អេង ហ៊ី បានប្រាប់ឱ្យ វីអូឌី ឱ្យដឹងនៅរសៀលថ្ងៃព្រហស្បតិ៍នេះថា ករណីស៊ើបអង្កេតទៅលើមន្ត្រីកងរាជអាវុធហត្ថខេត្តកំពង់ធំ ជុំវិញករណីចាប់ខ្លួនអនុភូមិម្នាក់បណ្ដាលឱ្យស្លាប់ នៅពុំទាន់អាចបញ្ជាក់ជាលទ្ធផលនៅឡើយទេ គិតត្រឹមរសៀលថ្ងៃនេះ។
លោកបញ្ជាក់ថា មកទល់ពេលនេះ ក្រុមការងារចំពោះកិច្ចរបស់កងរាជអាវុធហត្ថលើផ្ទៃប្រទេស កំពុងធ្វើការស៊ើបអង្កេត និងស្រាវជ្រាវនៅឡើយ ហើយលោកថា ប្រសិនបើបានលទ្ធផលយ៉ាងណានោះកងរាជអាវុធហត្ថលើផ្ទៃប្រទេសនឹងជម្រាបជូនជាព័ត៌មាន។
លោក អេង ហ៊ី មានប្រសាសន៍ថា៖ «កំពុងតែស៊ើបអង្កេត និងស្រាវជ្រាវ ហើយសួររកឃើញអ្វី? អ្នកណានិយាយកើត បើកំពុងតែស៊ើប។ ចាំហើយសិនណា! រង់ចាំសិនទៅ ចាំខ្ញុំប្រកាសព័ត៌មាន ហើយចាំប្រាប់តាមក្រោយ»។
វីអូឌី មិនអាចសុំការឆ្លើយតបបន្ថែមពី មេបញ្ជាការកងរាជអាវុធហត្ថខេត្តកំពង់ធំ លោក ហង្ស ថុល បានទេ នៅថ្ងៃព្រហស្បតិ៍នេះ ប៉ុន្តែលោក ហង្ស ថុល បានឱ្យ វីអូឌី ដឹងកាលពីថ្ងៃទី០៩ ខែសីហា ថា មន្ត្រីរបស់ខ្លួនចំនួន ១១នាក់ត្រូវបានឃាត់ខ្លួនទុកនៅបន្ទាយជាបណ្តោះអាសន្នដើម្បីស៊ើបអង្កេតបន្ត ពាក់ព័ន្ធករណីបង្ក្រាបទីតាំងល្បែងស៊ីសងតាមអនឡាញមួយកន្លែងដែលបណ្ដាលឱ្យអនុប្រធានភូមិម្នាក់ស្លាប់។
ការឃាត់ខ្លួនមន្ត្រីកងរាជអាវុធហត្ថខេត្តទាំង១១នាក់នេះ ក្រោយអនុប្រធានភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ លោក សួង ឌ័ន ត្រូវបានក្រុមគ្រួសារអះអាងថា បានស្លាប់ដោយសារថប់ដង្ហើមក្នុងពេលបញ្ជូនគាត់ទៅបញ្ជាការដ្ឋានខេត្ត ក្រោយមន្ត្រីកងរាជអាវុធហត្ថស្រុកបានចាប់ខ្លួន និងសង្កត់កលោក៕
