ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងបានចោទប្រកាន់កូរ៉េខាងត្បូងថា បានបង្កឱ្យមានការឆ្លងរាលដាលជំងឺកូវីដ-១៩នៅក្នុងប្រទេសរបស់ខ្លួន ហើយបានព្រមានតបត ខណៈទីក្រុងព្យុងយ៉ាងបានប្រកាសពីជ័យជំនះលើជំងឺកូវីដ-១៩។ នេះបើតាមការផ្សាយរបស់ សារព័ត៌មាន CNA នៅថ្ងៃព្រហស្បតិ៍ ទី១១ ខែសីហា ឆ្នាំ២០២២។
ទោះជាយ៉ាងណា ទីក្រុងសេអ៊ូល បានច្រានចោលចំពោះការចោទប្រកាន់នោះ។
គួរបញ្ជាក់ថា ទោះបីជាមានការហាមប្រាមពីកូរ៉េខាងជើងតាំងពីឆ្នាំ២០២១ក៏ដោយ អស់រយៈពេលជាច្រើនឆ្នាំ សកម្មជនកូរ៉េខាងត្បូង បានបង្ហោះប៉េងប៉ោងដែលមានខិតប័ណ្ណឃោសនា និងប្រាក់ដុល្លារអាមេរិកនៅតាមព្រំដែន ដែលទីក្រុងព្យុងយ៉ាង បានតវ៉ាប្រឆាំងនឹងសកម្មភាពនោះជាយូរមកហើយ។
ទីភ្នាក់ងារសារព័ត៌មានកូរ៉េខាងជើង (KCNA) បានរាយការណ៍ថា ប្អូនស្រីរបស់លោក គីម ជុងអ៊ុន ឈ្មោះ គីម យ៉ូជុង (Kim Yo Jong) បានចោទប្រកាន់ថា ដោយសារតែសកម្មភាពបង្ហោះប៉េងប៉ោងពីទឹកដីកូរ៉េខាងត្បូងចូលទៅក្នុងប្រទេសកូរ៉េខាងជើងនោះហើយ ទើបបណ្តាលឱ្យប្រទេសកុម្មុយនិស្តមួយនេះ មានការឆ្លងរាលដាលនៃជំងឺកូវីដ-១៩។ អ្នកស្រីនិយាយថា សកម្មភាពទាំងនោះជាឧក្រិដ្ឋកម្មប្រឆាំងមនុស្សជាតិ។
អ្នកស្រីថា ប្រទេសជាច្រើន រួមទាំង អង្គការសុខភាពពិភពលោកបានទទួលស្គាល់គ្រោះថ្នាក់នៃការឆ្លងរាលដាលនៃជំងឺកូវីដ-១៩ តាមរយៈការប៉ះពាល់វត្ថុដែលមានមេរោគ។ ប៉ុន្តែអ្នកស្រីថា ជាការគួរឱ្យបារម្ភខ្លាំងណាស់ដែលកូរ៉េខាងត្បូងកំពុងផ្ញើលុយ ខិតបណ្ណ និងរបស់នានាដែលមិនស្អាតចូលក្នុងតំបន់របស់យើង។
លោកស្រី គីម យ៉ូជុង បានព្រមានថា៖ «ទីក្រុងព្យុងយ៉ាងកំពុងពិចារណាក្នុងការតបតយ៉ាងចាស់ដៃ។ ប្រសិនបើ នៅតែបង្ហោះប៉េងប៉ោងយើងនឹងឆ្លើយតបដោយមិនត្រឹមតែលុបបំបាត់វីរុសប៉ុណ្ណោះទេ ថែមទាំងកម្ទេចអាជ្ញាធរកូរ៉េខាងត្បូងផងដែរ»។
កាលពីខែមុន ទីក្រុងសេអ៊ូល បាននិយាយថា «មិនមានករណីឆ្លងជំងឺកូវីដ-១៩ តាមរយៈប្រៃសណីយ៍ឬសម្ភារៈទេ»។ ការអត្ថាធិប្បាយរបស់អ្នកស្រី គីម យ៉ូជុង ធ្វើឡើងចំពេលដែលបងប្រុសរបស់អ្នកស្រីគឺ លោក គីម ជុងអ៊ុន បានប្រកាស «ជ័យជំនះដ៏ត្រចះត្រចង់» ក្នុងការប្រយុទ្ធប្រឆាំងនឹងជំងឺកូវីដ-១៩
បន្ទាប់ពីមន្ត្រីបានរាយការណ៍ថា មិនមានករណីឆ្លងថ្មីអស់រយៈពេលជិតពីរសប្តាហ៍។
អ្នកជំនាញបាននិយាយថា ប្រទេសកូរ៉េខាងជើងមានប្រព័ន្ធសុខាភិបាលខ្សោយបំផុតនៅលើពិភពលោក។ នៅតាមមន្ទីរពេទ្យបំពាក់ដោយឧបករណ៍ដែលមិនមានគុណភាព មានបន្ទប់សង្គ្រោះបន្ទាន់តិចតួច និងមិនមានថ្នាំព្យាបាល ឬវ៉ាក់សាំងបង្ការជំងឺកូវីដ-១៩នោះទេ។
អ្នកស្រី គីម យ៉ូជុង (Kim Yo Jong) បាននិយាយថា សូម្បីតែលោក គីម ជុងអ៊ុន ក៏ឆ្លងជំងឺកូវីដ-១៩ដែរ។
អ្នកស្រី បញ្ជាក់ថា៖ «លោក គីម ជុងអ៊ុន ក្តៅខ្លួនខ្លាំងក្នុងអំឡុងពេលធ្វើចត្តាឡីស័ក ប៉ុន្តែគាត់មិនអាចសម្រាកទេ ដោយសារគាត់គិតពីប្រជាជនដែលគាត់ទទួលខុសត្រូវ»៕
