ក្រសួងបង្រួបបង្រួមកូរ៉េខាងត្បូង ដែលគ្រប់គ្រងកិច្ចការអន្តរកូរ៉េ បានសម្តែងការសោកស្ដាយ បន្ទាប់ពីប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង បានចោទប្រកាន់ថា ខិតបណ្ណដែលកូរ៉េខាងត្បូងបង្ហោះតាមប៉េងប៉ោងទៅកាន់កូរ៉េខាងជើង ជាមូលហេតុនៃការចម្លងជំងឺកូវីដ-១៩ ទៅក្នុងប្រទេសកុម្មុយនិស្តមួយនេះ។ នេះបើតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១១ ខែសីហា នេះ។
ក្រសួងបង្រួបបង្រួមកូរ៉េខាងត្បូង បាននិយាយនៅក្នុងសេចក្តីថ្លែងការណ៍ថា៖ «យើងសោកស្តាយយ៉ាងខ្លាំងចំពោះកូរ៉េខាងជើង ដែលចោទប្រកាន់ដោយគ្មានមូលដ្ឋានម្តងហើយម្តងទៀតនៃការចម្លងជំងឺកូវីដ-១៩ និងធ្វើសេចក្តីថ្លែងការណ៍ដោយមិនមានការគោរព និងជាការគម្រាមកំហែង»។
គួរបញ្ជាក់ថា មេដឹកនាំកូរ៉េខាងជើងលោក គីម ជុងអ៊ុន បានប្រកាសពីជ័យជម្នះក្នុងការប្រយុទ្ធប្រឆាំងនឹងជំងឺកូវីដ-១៩ ដោយបានបញ្ជាឱ្យដកវិធានការទប់ស្កាត់ការរីករាលដែលបានដាក់ចេញកាលពីខែឧសភា៕
