យោងតាមប្រភពមួយចំនួនបានបង្ហើបឱ្យដឹងថា មន្រ្តីរបស់រដ្ឋបាលប្រធានាធិបតីអាមេរិក លោក ចូ បៃដិន កំពុងពិនិត្យ និងពិចារណានូវចំណាត់ការពន្ធគយរបស់ខ្លួនដែលអនុវត្តលើប្រទេសចិនឡើងវិញ ដើម្បីឆ្លើយតបទៅនឹងសមយុទ្ធយោធារបស់ប្រទេសកុម្មុយនិស្តមួយនេះដែលធ្វើឡើងនៅជុំវិញកោះតៃវ៉ាន់។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
គួរបញ្ជាក់ថា ក្រុមការងាររបស់លោក ចូ បៃដិន អស់រយៈពេលជាច្រើនខែមកនេះ បានព្យាយាមដោះស្រាយក្នុងការស្វែងរកមធ្យោបាយនានាដើម្បីសម្រួលដល់ពន្ធនាំចូលរបស់ចិន និងកាត់បន្ថយអតិផរណាដែលកំពុងកើនឡើងយ៉ាងខ្លាំងផងដែរ។
មធ្យោបាយដែលត្រូវបានលើកឡើងទាំងនេះរួមមាន ការលុបបំបាត់ពន្ធគយមួយចំនួន ការចាប់ផ្តើមពិនិត្យលើវិស័យសក្តានុពលសម្រាប់អនុវត្តការដាក់ពន្ធគយបន្ថែម [ដែលអាចនឹងធ្វើឱ្យតម្លៃនៃការនាំចូល និងផលិតផលរបស់ចិនឡើងថ្លៃសម្រាប់ក្រុមហ៊ុនអាមេរិក] និងការពង្រីកបញ្ជីនៃការលើកលែងពន្ធដើម្បីជួយសម្រួលដល់ក្រុមហ៊ុនអាមេរិកដែលទទួលការផ្គត់ផ្គង់ពីប្រទេសចិនជាដើម។
ទោះជាយ៉ាងណា ការឆ្លើយតបរបស់ចិនចំពោះដំណើរទស្សនកិច្ចរបស់ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) ទៅកាន់កោះតៃវ៉ាន់ ដែលធ្វើឡើងកាលពីពេលថ្មីៗនេះបានធ្វើឱ្យមន្រ្តីនានារបស់លោក ចូ បៃដិន ចាំបាច់ត្រូវតែពិចារណាឡើងវិញទាក់ទិននឹងករណីនេះ ខណៈទាំងលោកប្រធានាធិបតីផ្ទាល់ ក៏នៅមិនទាន់មានការសម្រេចចិត្តណាមួយលើបញ្ហានេះឡើយ។ នេះបើតាមការបញ្ជាក់ឱ្យដឹងពីសេតវិមាន។
ទាក់ទិននឹងករណីនេះ អ្នកនាំពាក្យសេតវិមាន អ្នកស្រី Saloni Sharma បានឱ្យដឹងថា លោកប្រធានាធិបតីមិនទាន់មានការសម្រេចចិត្តណាមួយនៅឡើយទេ ទាំងមុន និងក្រោយព្រឹត្តិការណ៍ដែលកើតឡើងនៅច្រកសមុទ្រតៃវ៉ាន់។ ការប្រែប្រួលថ្មីណាមួយមិនទាន់ត្រូវបានធ្វើឡើងឡើយ ខណៈចំណាត់ការដែលត្រូវអនុវត្តក៏កំពុងតែស្ថិតនៅក្នុងការពិភាក្សាផងដែរ។
អ្នកស្រី បន្តថា៖ «អ្នកដែលអាចធ្វើការសម្រេចចិត្តបានគឺ មានតែលោកប្រធានាធិបតីតែម្នាក់ប៉ុណ្ណោះ ខណៈរាល់ការសម្រេចចិត្តរបស់លោកគឺ នឹងត្រូវផ្អែកលើអ្វីដែលជាផលប្រយោជន៍របស់យើង»។
សម្រាប់សំណួរថា តើហេតុអ្វីបានជាការសម្រេចចិត្តនេះត្រូវការចំណាយពេលយូរ រដ្ឋមន្ត្រីក្រសួងពាណិជ្ជកម្ម អាមេរិកលោកស្រី Gina Raimondo បានអះអាងថា វាទាក់ទងនឹងស្ថានភាពភូមិសាស្ត្រនយោបាយដ៏ស្មុគស្មាញ។
ថ្លែងក្នុងបទសម្ភាសន៍ជាមួយសារព័ត៌មាន Bloomberg លោកស្រីថា បន្ទាប់ពីដំណើរទស្សនកិច្ចរបស់លោកស្រី ណានស៊ី ផេឡូស៊ី ទៅកាន់កោះតៃវ៉ាន់ ស្ថានភាពហាក់មានភាពស្មុគស្មាញ ដូច្នេះហើយ លោកប្រធានាធិបតី ត្រូវតែគិតគូឱ្យបានល្អិតល្អន់ ដោយរូបលោកចង់ធ្វើឱ្យប្រាកដថា រាល់ការសម្រេចចិត្តរបស់លោកគឺនឹងមិនបង្កជាផលប៉ះពាល់ដល់ពលរដ្ឋអាមេរិកឡើយ។
គួរបញ្ជាក់ថា ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី បានធ្វើដំណើរទៅកាន់កោះតៃវ៉ាន់ កាលពីថ្ងៃអង្គារ ដើមសប្ដាហ៍មុន។
ករណីនេះបានបង្កឱ្យមានជាការខឹងសម្បាយ៉ាងខ្លាំងពីសំណាក់ប្រទេសចិន ដែលធ្វើឱ្យប្រទេសមួយនេះឈានដល់ការឆ្លើយតបតាមរយៈការធ្វើសមយុទ្ធយោធាដែលក្នុងនោះរួមមាន ទាំងការដាក់ពង្រាយយន្តហោះចម្បាំង ការបាញ់មីស៊ីលផ្លោងនៅលើដែនទឹក និងដែនអាកាស ជុំវិញកោះតៃវ៉ាន់ផងដែរ។
ទាក់ទិននឹងករណីនេះ សហរដ្ឋអាមេរិកក៏ធ្លាប់បានជំរុញប្រទេសចិន កុំឱ្យមានប្រតិកម្មខ្លាំងលើសលប់ចំពោះដំណើរទស្សនកិច្ចមួយនេះ ដោយថា វាអាចនឹងធ្វើឱ្យស្ថានការណ៍កាន់តែតានតឹងបន្ថែមទៀត៕