កម្មករ-កម្មការិនីជាង២០០នាក់ បម្រើការងារនៅរោងចក្រផលិតកាបូបគ្រប់ប្រភេទ យែវ សឹង (ខេមបូឌា) ឯ.ក ស្ថិតនៅភូមិញរ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ ព្រមទទួលយកសំណងទាំងមិនគ្រប់ចំនួន ក្រោយថៅកែបិទទ្វាររោងចក្រ រត់ចោលកម្មករ ដោយមិនបើកប្រាក់ឈ្នួលជូនពួកគេ។
កម្មករផ្នែកដេរលោក ម៉ៅ សាណេត ប្រាប់ វីអូឌី នៅថ្ងៃសុក្រនេះថា កម្មករបានផ្ទុះការតវ៉ារយៈ២ថ្ងៃ ក្រោយអវត្តមានថៅកែ និងអ្នកគ្រប់គ្រងពីរោងចក្រ ដោយមិនបានបើកប្រាក់ឈ្នួលជូនកម្មករ។ លោកថា ក្រោយកម្មករផ្ទុះការតវ៉ាគឺ អាជ្ញាធរពាក់ព័ន្ធ និងម្ចាស់ទីតាំងរោងចក្រ បានចេញមកសម្របសម្រួល ដោយម្ចាស់ទីតាំងរោងចក្រនេះ ចេញមុខដោះស្រាយសំណងជូនកម្មករជំនួសថៅកែដែលបានចោលកម្មករ។
កម្មកររូបនេះឱ្យដឹងថា រោងចក្រ យែវ សឹង មានកម្មករជាង២០០នាក់ ក្រោយថៅកែរត់ចោល បានជំពាក់ប្រាក់ឈ្នូលកម្មករជាង ៧ម៉ឺនដុល្លារ។ លោកថា ក្រោយមានការសម្របសម្រួលដោះស្រាយពី មន្ទីរការងារខេត្តកំពង់ស្ពឺ គឺម្ចាស់ទីតាំងបានចេញដោះស្រាយសំណងតម្លៃជាសរុបត្រឹមតែ ៦៥ភាគរយប៉ុណ្ណោះ។
លោក ម៉ៅ សាណេត បន្តថា ក្រុមកម្មករព្រមទទួលយកការដោះស្រាយសំណងនេះទាំងអស់គ្នា ដើម្បីបញ្ចប់វិវាទដោយសារពួកគេមិនចង់ខាតពេលយូរ និងមិនសង្ឃឹមលើការដោះស្រាយរបស់អាជ្ញាធរពាក់ព័ន្ធថា នឹងបានសំណងគ្រប់ចំនួន និងត្រឹមត្រូវតាមច្បាប់ ខណៈកម្មកររោងចក្រនេះប្រមាណ ៨០ភាគរយត្រូវការលុយបង់សងធនាគរ និងប្រញាប់រកការងារថ្មីធ្វើបន្តទៀត។
លោក ម៉ៅ សាណេត បន្ថែមថា៖ «គេ [អាជ្ញាធរនិងម្ចាស់ទីតាំង] ថា បើយើងដាក់ពាក្យបណ្តឹងទៅតុលាការ វាត្រូវប្រើរយៈពេលយូរបានគេដោះស្រាយចេញ។ អុីចឹង កម្មករសម្រេចគ្នា ព្រមទទួលយកសំណងពីម្ចាស់ទីតាំងត្រឹម ៦៥ភាគរយនេះទៅ កុំឱ្យវាអត់បានសោះ ណាមួយ ក្រុមកម្មករក៏ដល់ថ្ងៃដែលធនាគារគេទារលុយដែរ ព្រោះកម្មករនៅនេះជាង ៨០ភារយហើយ ដែលជំពាក់ធនាគារ»។
ប្រធានមន្ទីរការងារនិងបណ្តុះបណ្តាលវិជ្ជាជីវៈខេត្តកំពង់ស្ពឺ លោក ចឹក បូរិន សុំមិនបកស្រាយច្រើនទេដោយលោកថា ករណីវិវាទការងារនៅរោចក្រ យែវ សឹង បានដោះស្រាយចប់ហើយកាលពីម្សិលមិញនេះ ដោយក្រុមកម្មករព្រមទទួលសំណងតាមកិច្ចព្រមព្រៀងដែលម្ចាស់ទីតាំងព្រមដោះស្រាយជូនដើម្បីបញ្ចប់ជម្លោះ។
លោក ចឹក បូរិន បន្ថែមថា៖ «យើងបានសម្របសម្រួលដោះស្រាយចប់កាលពីមិ្សលមិញហើយ ម្ចាស់អាគារ គាត់យល់ព្រមដោះស្រាយសំណងជូនកម្មករទាំងអស់ តាមកិច្ចព្រមព្រៀងជាមួយកម្មករ ហើយកម្មករបើកលុយយកអស់ហើយ កាលពីម្សិលមិញ»។
ប្រធានសមាគមអភិវឌ្ឍន៍ជីវភាពពលរដ្ឋកម្ពុជា លោក ព្រុំ ប៊ុនថន ដែលធ្វើការងារលើកកម្ពស់សិទ្ធិកម្មករ មានប្រសាសន៍ថា ករណីថៅកែបិទទ្វាររោងចក្រ រត់ចោលកម្មករ ដោយមិនបើកប្រាក់ឈ្នូល និងទូទាត់អត្ថប្រយោជន៍ផ្សេងៗជូនកម្មករនេះ វាមិនមែនទើបតែកើតឡើងលើកទីមួយនោះទេនៅកម្ពុជា។
លោកថា ក្រុមថៅកែ ឬនិយោជកតែងតែប្រើប្រាស់រូបភាពបែបនេះ ដើម្បីគេចវេសពីការទទួលខុសត្រូវលើការទូទាត់អត្ថប្រយោជន៍ផ្សេងៗជូនកម្មករ ហើយបញ្ហានេះ មិនត្រូវបានក្រសួងការងារ និងអាជ្ញាធរពាក់ព័ន្ធស្វែងរកចាប់ខ្លួនថៅកែ ឱ្យមកទទួលខុសត្រូវលើការដោះស្រាយសំណងជូនកម្មករទៅតាមផ្លូវច្បាប់ឡើយ ដែលបញ្ហានេះបានធ្វើឱ្យកម្មករខាតបង់ផលប្រយោជន៍ជាច្រើន និងបន្តរងទុក្ខលំបាក។
លោក ព្រុំ ប៊ុនថន បន្ថែមថា៖ «ករណីថៅកែរត់ចោលកម្មករនេះ វាមិនមែនជារឿងថ្មីនោះទេ វាបានកើតឡើងយូរមកហើយ ដោយសារក្រសួងការងារនិងអាជ្ញាធរពាក់ព័ន្ធហ្នឹង ខ្វះយន្តការនៃការទប់ស្កាត់កុំឱ្យរឿងនេះបន្តកើតឡើងដដែលៗទេ។ អ៊ីចឹង ខ្ញុំថា ឥលូវនេះក្រសួងគួរតែ [មាន] យន្តការទប់ស្កាត់ ពេលដែលអ្នកវិនិយោគមកវិនិយោគនៅស្រុកយើង។ យើងត្រូវឱ្យអ្នកវិនិយោគទុនទាំងនោះ មានលុយតម្កល់នៅធនាគារជាតិ។ ឧទាហរណ៍ថា រោងចក្រមួយមានកម្មករ២០០នាក់។ អ៊ីចឹង យើងត្រូវឱ្យអ្នកវិនិយោគតម្កល់លុយសម្រាប់ទូទាត់អត្ថប្រយោជន៍ជូនកម្មករក្នុងចំនួនហ្នឹងដែរ ដើម្បីពេលថៅកែរត់ចោល យើងយកលុយហ្នឹងមកទូទាត់ជូនកម្មករ ប៉ុន្តែកន្លែងយើងមិនបានធ្វើអ៊ីចឹងទេ»។
ទាក់ទងនឹងរឿងថៅកែរត់ចោលកម្មករនេះដែរ កម្មករ កម្មការិនីជាង ៣០០នាក់ បម្រើការងារនៅរោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) ដែលមានទីតាំងនៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក៏បាននាំគ្នាតវ៉ា និងដេកយាមមុខរោងចក្រ ជាង៤ខែមកហើយ ក្រោយពីថៅកែរោងចក្របិទទ្វាររត់ចោលកម្មករ ដោយមិនបានបើកប្រាក់ឈ្នូល និងទូទាត់អត្ថប្រយោជន៍ផ្សេងៗជូនកម្មកររហូតដល់ពេលនេះ៕