សារព័ត៌មាន Reuters រាយការណ៍នៅថ្ងៃសុក្រ ទី១២ ខែសីហានេះថា FBI បានស្វែងរកឯកសារពាក់ព័ន្ធនឹងអាវុធនុយក្លេអ៊ែរ នៅពេលឆ្មក់ចូលឆែកឆេរផ្ទះរបស់អតីតប្រធានាធិបតីអាមេរិក លោក ដូណាល់ ត្រាំ (Donald Trump) ក្នុងរដ្ឋផ្លរីដា នៅសប្តាហ៍នេះ។
ប្រភពដដែលបន្តថា មិនមានភាពច្បាស់លាស់ថា តើគេបានរកឃើញឯកសារអំពីនុយក្លេអ៊ែរ នៅលំនៅដ្ឋាន Mar-a-Lago របស់លោកនៅ Palm Beach ឬយ៉ាងណានោះទេ។ Reuters មិនអាចសុំការបញ្ជាក់អំពីរបាយការណ៍នេះឡើយ។
កាលពីថ្ងៃព្រហស្បតិ៍ ក្រសួងយុត្តិធម៌សហរដ្ឋអាមេរិក បានស្នើសុំចៅក្រមឱ្យចេញដីកាជាសាធារណៈដែលអនុញ្ញាតឱ្យ FBI ចូលឆែកឆេរលំនៅដ្ឋាន Mar-a-Lago របស់លោក ដូណាល់ ត្រាំ ខណៈលោក ត្រាំ ចាត់ទុកទង្វើនោះថា ជាការសងសឹកផ្នែកនយោបាយ។
ការស៊ើបអង្កេតនេះ ធ្វើឡើងដើម្បីស្វែងរកថា តើលោក ដូណាល់ ត្រាំ បានយកឯកសារដោយខុសច្បាប់ពីសេតវិមាននៅពេលចប់អាណត្តិកាលពីខែមករា ឆ្នាំ២០២១ឬយ៉ាងណា? ដែលក្រសួងយុត្តិធម៌ចាត់ទុកថា ឯកសារមួយចំនួនជាឯកសារសម្ងាត់។
លោក មឺរិក ហ្គាឡែន (Merrick Garland) ជាអគ្គមេធាវី និងជាមន្ត្រីអនុវត្តច្បាប់កំពូលម្នាក់របស់អាមេរិក បានប្រាប់សន្និសីទសារព័ត៌មានថា លោកបានអនុម័តដោយផ្ទាល់ចំពោះការឆែកឆេរនេះ។
ប្រភពដែលដឹងពីបញ្ហានេះ បាននិយាយថា FBI បានរឹបអូសយកប្រអប់ប្រហែល១០កេស ពីលំនៅដ្ឋានរបស់លោក ដូណាល់ ត្រាំ ក្នុងអំឡុងពេលឆែកឆេរ។
លោក ដូណាល់ ត្រាំ មិននៅក្នុងរដ្ឋផ្លរីដាទេ នៅពេលឆែកឆេរ។
ទោះជាយ៉ាងណាក៏ដោយ មន្ត្រីល្បាតផ្លូវល្បឿនលឿនក្នុងរដ្ឋអូហៃយ៉ូ បាននិយាយថា កាលពីថ្ងៃព្រហស្បតិ៍ មានបុរសប្រដាប់អាវុធម្នាក់ដែលត្រូវបានគេសង្ស័យថា បានព្យាយាមចូលក្នុងអគារ FBI នៅទីក្រុងស៊ីស៊ីនណាទី (Cincinnati) ដែលក្រោយមកត្រូវបានបាញ់សម្លាប់ក្នុងអំឡុងពេលប៉ះទង្គិចគ្នាជាមួយកម្លាំងសមត្ថកិច្ច។
លោក មឺរិក ហ្គាឡែន (Merrick Garland) បានថ្កោលទោសការគំរាមកំហែង និងការវាយប្រហារប្រឆាំងនឹង FBI និងក្រសួងយុត្តិធម៌។
លោកបាននិយាយថា៖ «ខ្ញុំនឹងមិនឈរនៅស្ងៀមឡើយ នៅពេលដែលមានការវាយប្រហារដោយអយុត្តិធម៌»៕