អតីតប្រធានាធិបតីស្រីលង្កា លោក ហ្កូតាបាយ៉ា រ៉ាចាប៉ាកសា (Gotabaya Rajapaksa) បានទៅដល់ប្រទេសថៃហើយ កាលពីថ្ងៃព្រហស្បតិ៍ម្សិលមិញ ខណៈលោកកំពុងស្វែងរកប្រទេសទីពីរ នៅអាស៊ីអាគ្នេយ៍ដើម្បីជ្រកកោនបណ្តោះអាសន្ន បន្ទាប់ពីលោកបានភៀសខ្លួនចេញពីប្រទេសស្រីលង្កា កាលពីខែមុន ចំពេលមានការតវ៉ាដ៏ធំ។ នេះបើតាមការផ្សាយរបស់ សារព័ត៌មានReuters។
ប្រភពដដែលបន្តថា លោក Rajapaksa បានទៅដល់អាកាសយានដ្ឋានដុនមឿង (Don Muang) ទីក្រុងបាងកក តាមជើងហោះហើរពិសេសពីប្រទេសសិង្ហបុរី បន្ទាប់ពីអាជ្ញាធរអន្តោប្រវេសន៍បាននិយាយនៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ថា លោកបានចាកចេញពីប្រទេសសិង្ហបុរី។
លោក Rajapaksa ត្រូវបានគេរំពឹងថា នឹងស្នាក់នៅបណ្តោះអាសន្នក្នុងប្រទេសថៃ បន្ទាប់ពីបានភៀសខ្លួនចេញពីប្រទេសស្រីលង្កា ទៅកាន់ប្រទេសសិង្ហបុរី កាលពីថ្ងៃទី១៤ ខែកក្កដា ឆ្នាំ២០២២។ លោកបានលាលែងពីតំណែងភ្លាមៗ បន្ទាប់ពីមានភាពចលាចលចំពោះវិបត្តិសេដ្ឋកិច្ចដ៏អាក្រក់បំផុតដែលមិនធ្លាប់មានពីមុនមក ក្នុងរយៈពេលប្រាំពីរទសវត្សរ៍ចុងក្រោយនេះ ក្រោមការគ្រប់គ្រងរបស់លោក និងប៉ុន្មានថ្ងៃបន្ទាប់ពីបាតុកររាប់ពាន់នាក់បានសម្រុកចូលលំនៅដ្ឋាន និងការិយាល័យប្រធានាធិបតី។
អាជ្ញាធរថៃ បាននិយាយថា លោក Rajapaksa មិនមានបំណងសុំសិទ្ធិជ្រកកោនផ្នែកនយោបាយទេ លោកគ្រាន់តែស្នាក់នៅបណ្តោះអាសន្នប៉ុណ្ណោះ។
នាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayuth Chan-ocha) បានប្រាប់ អ្នកកាសែត កាលពីថ្ងៃពុធថា «នេះគឺជាបញ្ហាមនុស្សធម៌ ហើយយើងព្រមព្រៀងជាមួយគ្នាថា ការស្នាក់នៅនេះគឺ បណ្តោះអាសន្នប៉ុណ្ណោះ»។
លោក លោក ប្រាយុទ្ធ ចាន់អូចា បន្តថា៖ «លោក Rajapaksa មិនអាចចូលរួមក្នុងសកម្មភាពនយោបាយណាមួយឡើយ ខណៈលោកនៅក្នុងប្រទេសថៃ»។
រដ្ឋមន្ត្រីការបរទេសថៃ លោក ដុន ប្រាមុតវីណៃ (Don Pramudwinai) បាននិយាយថា រដ្ឋាភិបាលស្រីលង្កាបានជួយសម្រួលចំពោះការធ្វើដំណើររបស់លោក Rajapaksa មកកាន់ប្រទេសថៃ ដោយបន្ថែមថា លិខិតឆ្លងដែនការទូតរបស់លោកនឹងអនុញ្ញាតឱ្យលោកស្នាក់នៅក្នុងប្រទេសថៃ រយៈពេល៩០ថ្ងៃ។
លោក Rajapaksa មិនបានបង្ហាញខ្លួនជាសាធារណៈ ឬមិនបានធ្វើអត្ថាធិប្បាយអ្វីឡើយ ចាប់តាំងពីលោកចាកចេញពីប្រទេសស្រីលង្កា។ សារព័ត៌មាន Reuters មិនអាចទាក់ទងលោកដើម្បីសុំការអត្ថាធិប្បាយបន្ថែមឡើយ។
គួរបញ្ជាក់ថា ប្រទេសស្រីលង្កា ក្នុងរយៈពេលចុងក្រោយនេះ បានទទួលរងនូវវិបត្តិសេដ្ឋកិច្ចដ៏អាក្រក់បំផុតមួយ ដែលមិនធ្លាប់កើតមានពីមុនមក ខណៈទុនបម្រុងអន្តរជាតិរបស់ប្រទេសក៏ស្ថិតក្នុងកម្រិតទាបបំផុតផងដែរ ដែលបានបង្កឱ្យប្រទេសមួយនេះជួបប្រទះបញ្ហាកង្វះថវិកាធ្ងន់ធ្ងរសម្រាប់ការនាំចូលអាហារ ឱសថ និងប្រេងឥន្ធនៈ ជាដើម៕
