បណ្ដាប្រទេសលោកខាងលិចនៅថ្ងៃព្រហស្បតិ៍ម្សិលមិញបានសន្យាថា នឹងផ្តល់ជំនួយជាង ១៥00 លានអឺរ៉ូ (ស្មើនឹងប្រមាណ១៥៥0 លានដុល្លារអាមរិក) ជាសាច់ប្រាក់ សម្ភារៈ និងការបណ្តុះបណ្តាលបន្ថែមទៀតដល់អ៊ុយក្រែន ដើម្បីជួយបង្កើនមត្ថភាពយោធារបស់ប្រទេសមួយនេះក្នុងការតទល់នឹងសង្រ្គាមប្រឆាំងនឹងប្រទេសរុស្ស៊ី។ នេះបើតាមការឱ្យដឹងពីរដ្ឋមន្ត្រីការពារជាតិដាណឺម៉ាកលោក ម៉ូធិន បូតស្កូវ (Morten Bodskov) ដែលត្រូវបានយកមកចុះផ្សាយដោយទីភ្នាក់ងារសារព័ត៌មាន Reuters។
កញ្ចប់ថវិកាដែលត្រូវបានសន្យានឹងផ្ដល់ជូនដោយក្រុមប្រទេសចំនួន ២៦នៅក្នុងសន្និសីទមួយដែលធ្វើឡើងនៅ ទីក្រុង ខូផេនហេហ្គិន (Copenhagen) ប្រទេសដាណឺម៉ាកនេះនឹងត្រូវប្រើប្រាស់សម្រាប់ការផ្គត់ផ្គង់អាវុធដែលមានស្រាប់ កាំជ្រួច គ្រាប់រំសេវ បង្កើនការផលិតអាវុធសម្រាប់អ៊ុយក្រែន ការបណ្តុះបណ្តាលដល់ទាហានអ៊ុយក្រែន រួមនឹងការបោសសម្អាតគ្រាប់មីននៅក្នុងតំបន់ដែលមានសង្រ្គាមកើតឡើងផងដែរ។
ការផ្ដល់ជូននេះក៏កើតមានឡើងបន្ទាប់ពីរដ្ឋាភិបាលអ៊ុយក្រែនបានធ្វើការអំពាវនាវម្តងហើយម្តងទៀតទៅកាន់ប្រទេសលោកខាងលិចឱ្យបញ្ជូនអាវុធបន្ថែមទៀតមកកាន់ខ្លួន រួមទាំងកាំជ្រួចមីស៊ីលរយៈចម្ងាយឆ្ងាយដើម្បីឱ្យខ្លួនអាចមានសមត្ថភាពគ្រប់គ្រាន់ក្នុងការតទល់នឹងការឈ្លានពានរបស់រុស្ស៊ីបានផងដែរ។
ថ្លែងប្រាប់អ្នកសារព័ត៌មានក្នុងសន្និសីទដែលចូលរូមដោយរដ្ឋមន្ត្រីការពារជាតិអឺរ៉ុបនានាដើម្បីពិភាក្សាអំពីការគាំទ្ររយៈពេលវែងដល់វិស័យការពារជាតិរបស់អ៊ុយក្រែនប្រឆាំងនឹងការឈ្លានពានរបស់រុស្ស៊ីលោក ម៉ូធិន បូតស្កូវថ្លែងថា៖ «យើងនឹងបន្តជួយដល់អ៊ុយក្រែនសម្រាប់តម្រូវការយោធាទាំងឡាយដែលប្រទេសនេះត្រូវការ»។
ជាមួយគ្នានេះ លោកបន្តថា រដ្ឋមន្ត្រីការពារជាតិប៉ូឡូញ ស្លូវ៉ាគី និងសាធារណរដ្ឋឆេកក៏បានបង្ហាញពីឆន្ទៈក្នុងការពង្រីកការផលិតប្រព័ន្ធកាំភ្លើងធំ គ្រាប់រំសេវ និងឧបករណ៍យោធាផ្សេងទៀតទៅកាន់ប្រទេសអ៊ុយក្រែនផងដែរ។
គួរម្លឹកថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រកាលពីថ្ងៃទី២៤ ខែកុម្ភៈដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះក៏បានធ្វើឱ្យបណ្ដាប្រទេសមួយចំនួននៅលើពិភពលោកសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ីផងដែរទាក់ទិននឹងករណីនេះ។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថាសកម្មភាពរបស់ខ្លួននេះគឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានបណ្ដាប្រទេសមួយចំនួនចាត់ទុកថាជាការលើកឡើងដោយគ្មានមូលដ្ឋានច្បាស់លាស់៕
