យោធាចិន នៅថ្ងៃចន្ទនេះ បានបង្កើនការធ្វើសមយុទ្ធរបស់ខ្លួនបន្ថែមទៀតនៅជិតកោះតៃវ៉ាន់ ស្របពេលដែលគណប្រតិភូអាមេរិកជាន់ខ្ពស់មួយក្រុមទៀតធ្វើដំណើរមកដល់កោះមួយនេះ ដើម្បីជួបជាមួយលោកស្រីប្រធានាធិបតី សៃ អ៊ីងវេន (Tsai Ing-wen)។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
គួរបញ្ជាក់ថា សមាជិកព្រឹទ្ធសភាអាមេរិកចំនួន៥រូប ដែលដឹកនាំដោយលោក Ed Markey បានធ្វើដំណើរមកដល់ទីក្រុងតៃប៉ិ កោះតៃវ៉ាន់ កាលពីល្ងាចថ្ងៃអាទិត្យ ក្នុងដំណើរទស្សនកិច្ចមួយដែលមិនត្រូវបានប្រកាសឱ្យដឹងជាមុន។
ការមកដល់របស់មន្រ្តីខាងលើនេះ ក៏ជាដំណើរទស្សនកិច្ចទីពីរដែលត្រូវបានធ្វើឡើងដោយគណប្រតិភូអាមេរិកជាន់ខ្ពស់ផងដែរ បន្ទាប់ពីដំណើរទស្សនកិច្ចរបស់ប្រធានសភាអាមេរិក លោកស្រី ណានស៊ី ផេឡូស៊ី (Nancy Pelosi) ទើបតែបញ្ចប់កាលពីដើមខែសីហាកន្លងទៅ។
ជាការឆ្លើយតប អង្គភាពយោធាចិនដែលទទួលខុសត្រូវក្នុងតំបន់ជាប់កោះតៃវ៉ាន់ (PLA’s Eastern Theater Command) ក៏បានរៀបចំសមយុទ្ធបន្ថែមទៀតនៅដែនសមុទ្រ និងដែនអាកាសជុំវិញកោះតៃវ៉ាន់ផងដែរ នៅថ្ងៃចន្ទនេះ ដោយចាត់ទុកសមយុទ្ធនេះថាជាការបង្ហាញឱ្យឃើញពីការមិនគាំទ្រយ៉ាងពេញទំហឹងចំពោះសហរដ្ឋអាមេរិក និងតៃវ៉ាន់ ដែលបន្តធ្វើសកម្មភាពនយោបាយបំផ្លាញសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់។
ថ្លែងក្នុងសេចក្តីថ្លែងការណ៍ដាច់ដោយឡែកមួយផ្សេងទៀត ក្រសួងការពារជាតិចិនក៏បានឱ្យដឹងផងដែរថា ដំណើររបស់សមាជិកព្រឹទ្ធសភាទាំងនេះបានរំលោភលើអធិបតេយ្យភាព និងបូរណភាពទឹកដីរបស់ចិន ហើយក៏លាតត្រដាងយ៉ាងច្បាស់នូវមុខមាត់ពិតរបស់សហរដ្ឋអាមេរិកដែលដើរតួជាអ្នកបំផ្លិចបំផ្លាញសន្តិភាព និងស្ថិរភាពនៅច្រកសមុទ្រតៃវ៉ាន់ផងដែរ។
ប្រភពដដែលបន្តថា៖ «កងទ័ពរំដោះប្រជាជន គឺនឹងបន្តហ្វឹកហ្វឺន និងត្រៀមរួចជាស្រេចក្នុងការធ្វើសង្រ្គាម ក៏ដូចជាការពារឱ្យបានខ្ជាប់ខ្ជួននូវអធិបតេយ្យភាពជាតិ និងបូរណភាពទឹកដី ខណៈខ្លួននឹងវាយកម្ទេចរាល់គ្រប់ទម្រង់នៃការបំបែកខ្លួនរបស់តៃវ៉ាន់និងការជ្រៀតជ្រែកពីបរទេស»។
គួររម្លឹកថា ដំណើរទស្សនកិច្ចរបស់លោកស្រី ណានស៊ី ផេឡូស៊ី ទៅកាន់កោះតៃវ៉ាន់ កាលពីដើមខែសីហាកន្លងទៅ បានបង្កឱ្យមានជាការខឹងសម្បារយ៉ាងខ្លាំងពីសំណាក់ប្រទេសចិនម្ដងរួចមកហើយ ដែលក្នុងនោះក៏បានធ្វើឱ្យប្រទេសមួយនេះឈានដល់ការឆ្លើយតបតាមរយៈការធ្វើសមយុទ្ធយោធាការដាក់ពង្រាយយន្តហោះចម្បាំង ការបាញ់មីស៊ីលផ្លោងនៅលើដែនទឹក និងដែនអាកាស ជុំវិញកោះតៃវ៉ាន់ផងដែរ។
ទោះជាយ៉ាងណា សហរដ្ឋអាមេរិកធ្លាប់បានជំរុញប្រទេសចិនកុំឱ្យមានប្រតិកម្មខ្លាំងលើសលុបចំពោះដំណើរទស្សនកិច្ចមួយនេះ ដោយថា វាអាចនឹងធ្វើឱ្យស្ថានការណ៍កាន់តែតានតឹងបន្ថែមទៀត៕