អនុប្រធានគណបក្សភ្លើងទៀន ប្រចាំខណ្ឌពោធិ៍សែនជ័យ បារម្ភពីសុវត្ថិភាពផ្ទាល់ខ្លួនដោយមិនហ៊ានចេញក្រៅផ្ទះ ក្រោយរងអំពើហិង្សាពីសំណាក់ជនមិនស្គាល់មុខជាច្រើននាក់ ប៉ុន្តែរយៈពេលប្រមាណ១ខែមកហើយ សមត្ថកិច្ចនៅតែមិនទាន់ចាប់បានជនដៃដល់យកមកផ្តន្ទាទោសនៅឡើយ។
អនុប្រធានគណបក្សភ្លើងទៀន ប្រចាំខណ្ឌពោធិ៍សែនជ័យ រាជធានីភ្នំពេញ លោក លន់ ពង្សធិរិទ្ធ កាលពីព្រឹកថ្ងៃទី១៧ ខែកក្កដា ឆ្នាំ២០២២ ត្រូវបានក្រុមជនដៃដល់ចំនួន ៦នាក់ និងគូកនចាំបិទផ្លូវជាច្រើននាក់ទៀត បាននាំគ្នាជិះម៉ូតូតាមវាយលោកបណ្តាលឱ្យរងរបួសធ្ងន់ធ្ងរផ្នែកក្បាល កញ្ចឹងក និងខ្លួន ស្ថិតនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
សំណុំរឿងលោក លន់ ពង្សធិរិទ្ធ អនុប្រធានគណបក្សភ្លើងទៀន ប្រចាំខណ្ឌពោធិ៍សែនជ័យ និងជាអតីតមន្ត្រីសន្តិសុខអន្តរាគមន៍ពិសេសរបស់លោក សម រង្ស៊ី ត្រូវបាននាយនគរបាលប៉ុស្តិ៍រដ្ឋបាលសង្កាត់ចោមចៅទី៣ បញ្ជូនមកដល់អធិការដ្ឋាននគរបាលខណ្ឌពោធិ៍សែនជ័យ កាលពីចុងខែកក្កដា ហើយមកដល់ពេលនេះស្ថិតក្នុងការស្រាវជ្រាវនៅឡើយ។
លោក លន់ ពង្សធិរិទ្ធ បានប្រាប់វីអូឌីឱ្យបានដឹងថា មកទល់ពេលនេះលោកពុំមានដំណឹងនិងទទួលតម្រុយអ្វីពីសមត្ថកិច្ច ជុំវិញជនដៃដល់ដែលវាយលោកនោះទេ។
លោកថា៖«មកទល់ម៉ោងនេះគឺខ្ញុំអត់ទាន់បានទទួលការអី[គំរាមកំហែងឬតាមដាន]ពីនរណាទេ ដោយសារតែខ្ញុំមិនចេញពីក្នុងផ្ទះសោះតែម្តង។ អ៊ីចឹងហើយក៏ខ្ញុំអត់បានដឹងថា នរណានៅឃ្លាំមើលអីក៏អត់ឃើញមានដែរ ដោយសារតែខ្ញុំមិនចេញពីក្នុងផ្ទះ»។
លោកបានបន្តថា ក្រោយកើតហេតុមានអំពើហិង្សាលើរូបលោកមក លោកមិនបានចេញក្រៅផ្ទះដូចមុននោះឡើយ ដោយបារម្ភពីសុវត្ថិភាពផ្ទាល់ខ្លួន ខ្លាចជួបហេតុការណ៍បែបនេះម្តងទៀត ដែលអាចធ្វើឱ្យគ្រោះថ្នាក់ដល់ជីវិត ស្របពេលសមត្ថកិច្ចពុំទាន់ស្វែងរកនិងចាប់ខ្លួនជនល្មើសបាននៅឡើយ។
លោកថា៖«ខាងសមត្ថកិច្ចមិនទាន់ស្វែងរកជនដៃដល់ឃើញផងខ្ញុំម៉េចហ៊ានចេញក្រៅផ្ទះ។ ចុះបើខ្ញុំចេញទៅស្រាប់តែគេដាក់ផឹងៗខ្ញុំងាប់បាត់ អ្នកណាទទួលខុសត្រូវ?»។
លោកបានឱ្យដឹងទៀតថា លោកបានប្រគល់កិច្ចការនេះដល់ចៅសង្កាត់រងទី២ ដើម្បីធ្វើការជាមួយសមត្ថកិច្ច ហើយប្រសិនបើខាងសមត្ថកិច្ចតម្រូវឱ្យលោកទៅជួបឬទំនាក់ទំនងអ្វីនោះលោកនឹងទៅជួប ប៉ុន្តែមកទល់ពេលនេះ លោកមិនទាន់បានទទួលព័ត៌មានអ្វីបន្ថែមនោះទេ។អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍កាលពីម្សិលមិញថា ខាងសមត្ថកិច្ចនៅពុំទាន់អាចបញ្ជាក់ពីលទ្ធផលបាននៅឡើយទេ ដោយពេលនេះសមត្ថកិច្ចកំពុងបន្តយកចិត្តទុកដាក់ស៊ើបអង្កេតលើករណីនេះ។
លោកថា៖«ទាក់ទងនឹងបញ្ហាហ្នឹង! ជាដំបូងក្នុងនាមជាសមត្ថកិច្ចអនុវត្តច្បាប់ យើងមិនគិតថាបុគ្គលហ្នឹងជាស្អី រឺក៏ជាអ្វីនោះទេតែសំខាន់គឺកើតឡើងក្នុងរាជធានីភ្នំពេញ។ អ៊ីចឹងគាត់គឺជាប្រជាពលរដ្ឋខ្មែរ នៅពេលដែលទទួលបានព័ត៌មានភ្លាមៗក៏យើងបានចុះដល់គោលដៅភ្លាមៗ ហើយបានទទួលបានពាក្យបណ្ដឹង ហើយយើងក៏បានកំពុងធ្វើការស្រាវជ្រាវលើករណីហ្នឹងយ៉ាងយកចិត្តទុកដាក់ផងដែរ»។
ជាមួយគ្នានេះ លោក សាន សុខសីហា បានបន្ថែមថា ការស៊ើបអង្កេតគឺអាស្រ័យទៅលើសំណុំរឿងនោះដែរ ដោយករណីខ្លះត្រូវការពេលវេលាក្នុងការស្រាវជ្រាវយូរ ករណីខ្លះក៏មានតម្រុយច្រើន ដូច្នេះការស្រាវជ្រាវក៏ត្រូវការរយៈពេលខ្លី។ លោកថា នេះគឺជាវិធានការដែលត្រូវបានគេអនុវត្តនៅគ្រប់ប្រទេស។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ការបង្ហាញនូវការព្រួយបារម្ភអំពីសុវត្ថិភាពរបស់មន្ត្រីគណបក្សប្រឆាំងរូបនេះវាជារឿងត្រឹមត្រូវ។ លោកបន្តថា នេះជាក្ដីកង្វល់ទាក់ទងនឹងសន្តិសុខសុវត្ថិភាពផ្ទាល់ខ្លួនក៏ដូចជាក្រុមគ្រួសាររបស់លោក លន់ ពង្សធិរិទ្ធ។
មន្ត្រីសង្គមស៊ីវិលរូបនេះ នៅតែបន្តទទូចដល់ក្រុមសមត្ថកិច្ចឱ្យធ្វើការងារប្រកបដោយតម្លាភាពនិងយុត្តធម៌ ដោយថា ប្រសិនបើករណីនេះមិនត្រូវបានផ្តល់យុត្តិធម៌ជូនជនរងគ្រោះ សាធារណមតិជាតិនិងអន្តរជាតិនឹងបន្តរិះគន់ចំពោះរដ្ឋាភិបាលថាអនុវត្តច្បាប់មិនមានតម្លាភាព និងមានការរើសអើងនយោបាយជាដើម។
លោកថា៖អ៊ីចឹងហើយបានជាសាធារណមតិជាតិ និងអន្តរជាតិ គេតែងតែរិះគន់ថា ដោយសារតែអ្នកដែលរងគ្រោះហ្នឹង ជាសកម្មជនអតីតគណបក្សប្រឆាំង។ អ៊ីចឹង បានជាការស៊ើបអង្កេត ក្នុងការស្វែងរកជនបង្កហ្នឹងមិនដែលឃើញ អីចឹងទៅ»។
យ៉ាងណា លោក អំ សំអាត បានលើកឡើងថា ដើម្បីចៀសវាងនូវការរិះគន់អំពីការរើសអើងនិន្នាការនយោបាយ សមត្ថកិច្ចត្រូវចាប់ខ្លួនជនល្មើស ឬអ្នកពាក់ព័ន្ធករណីអំពើហិង្សាលើមន្ត្រីបក្សប្រឆាំងមកអនុវត្តទោសតាមផ្លូវច្បាប់ដើម្បីធានានូវយុត្តិធម៌ ក៏ដូចជាសុវត្ថិភាពរបស់ជនរងគ្រោះទាំងនោះ។ លោកជឿជាក់ថា សមត្ថកិច្ចកម្ពុជាមិនមែនអសមត្ថភាពក្នុងការស៊ើបអង្កេតនោះទេ ប៉ុន្តែអ្វីដែលសំខាន់គឺស្ថិតនៅលើឆន្ទៈតែប៉ុណ្ណោះ។
លោកបន្ថែមថា៖« អ៊ីចឹងដើម្បីចៀសវាងនូវការរិះគន់ អំពីការរើសអើងនិន្នាការនយោបាយ សមត្ថកិច្ចត្រូវតែខិតខំក្នុងការស្វែងរកជនដែលពាក់ព័ន្ធមកអនុវត្តទៅតាមផ្លូវច្បាប់ដើម្បីធានានូវយុត្តិធម៌ក៏ដូចជាសុវត្ថិភាពរបស់ជនរងគ្រោះនោះបាទ!»។
កាលពីខែកក្កដា ឆ្នាំ២០២២ លោកមេធាវី សំ សុគង់ ធ្លាប់អះអាងថា ក្រោយគណបក្សសង្គ្រោះជាតិត្រូវបានតុលាការរំលាយចុងឆ្នាំ២០១៧មក មានសកម្មជនបក្សនេះមិនតិចជាង ៣០នាក់ទេ ដែលត្រូវបានគេលបវាយប្រហារ។
លោកថា ក្នុងចំណោមការប្រើប្រាស់ហិង្សាលើសកម្មជនបក្សប្រឆាំងទាំងនោះ មានប្រមាណ១០សំណុំរឿង គឺជាហិង្សាក្នុងកម្រិតធ្ងន់ធ្ងរបំផុត រហូតបណ្តាលឱ្យជនរងគ្រោះត្រូវពិការអស់មួយជីវិត និងខ្លះទៀតស្លាប់ក៏មាន។
ជាមួយគ្នានេះ លោកថា ជនរងគ្រោះទាំងនោះបានដាក់បណ្តឹងជាហូរហែទាំងក្នុងដំណាក់កាលនគរបាលយុត្តិធម៌ និងតុលាការ ប៉ុន្តែស្ទើរគ្រប់ករណីទាំងអស់ជនរងគ្រោះមិនទាន់ទទួលបានយុត្តិធម៌នៅឡើយទេ៕
