លោកនាយករដ្ឋមន្ត្រី ហ៊ុន សែន ប្រាប់ទៅអ្នករាយការណ៍ពិសេសផ្នែកសិទ្ធិមនុស្សនៃអង្គការសហប្រជាជាតិ ថាកម្ពុជាបានផ្ដល់ជាអាទិភាពលើសិទ្ធិរស់រានមានជីវិត និងសិទ្ធិទទួលបានព័ត៌មាន ខណៈរាល់ច្បាប់និងលិខិតបទដ្ឋានគតិយុត្តដែលបានអនុម័តទាំងអស់ គឺធ្វើឡើងដើម្បីការពារពលរដ្ឋ និងទប់ស្កាត់អំពើល្មើសច្បាប់ដែលបង្កអស្ថិរភាពសង្គម។
ការបញ្ជាក់នេះបានធ្វើឡើងនៅក្នុងជំនួបពិភាក្សាការងាររវាងលោកនាយករដ្ឋមន្ត្រី ហ៊ុន សែន និងលោក វិទិត មុនតាប៊ន (Vitit Muntarbhorn) អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា នៅទីស្តីការគណៈរដ្ឋមន្ត្រី នៅថ្ងៃអង្គារនេះ។
លោកនាយករដ្ឋមន្ត្រី ហ៊ុន សែន បានលើកឡើងនៅលើទំព័រហ្វេសប៊ុករបស់លោកថា ក្នុងជំនួបនោះ លោក វិទិត មុនតាប៊ន បានស្នើសុំឈ្វេងយល់ពីកម្ពុជាលើចំណុចមួយចំនួន ដូចជា តួនាទីរបស់កម្ពុជាក្នុងការជំរុញសិទ្ធិមនុស្សក្នុងនាមជាប្រធានអាស៊ាន ស្ថានភាពសេដ្ឋកិច្ច និងវឌ្ឍនភាពសិទ្ធិមនុស្សនៅកម្ពុជា ក្នុងបរិការណ៍ប្រយុទ្ធប្រឆាំងជំងឺកូវីដ-១៩ លំហសង្គមស៊ីវិល លំហប្រជាធិបតេយ្យ និងការបោះឆ្នោត និងអាទិភាពសម្រាប់ជំនួយបច្ចេកទេស និងកិច្ចសហប្រតិបត្តិការទៅអនាគត រវាងអ្នកកាន់អាណត្តិពិសេស និងរដ្ឋាភិបាលកម្ពុជា។
ជាការឆ្លើយតប លោកនាយករដ្ឋមន្ត្រី ហ៊ុន សែន បានថ្លែងថា កម្ពុជាកំពុងជំរុញអនុវត្តគោលនយោបាយគាំពារសង្គម ការដាក់ចេញវិធានការនានាក្នុងការទប់ស្កាត់ការឆ្លងរាលដាលជំងឺកូវីដ-១៩ និងវិធានការបន្ទាន់នានាក្នុងការគាំទ្រវិស័យសេដ្ឋកិច្ច និងគាំពារសង្គម ជាដើម ខណៈសិទ្ធិរស់រានមានជីវិត ត្រូវបានផ្ដល់ជាអាទិភាព និងសិទ្ធិទទួលបានព័ត៌មាន តាមរយៈនៃការផ្សព្វផ្សាយយ៉ាងទូលំទូលាយជូនដល់ប្រជាពលរដ្ឋ។
លោកបន្តថា ចំពោះការចោទប្រកាន់ថា បទប្បញ្ញតិ្តជាច្រើនត្រូវបានអនុម័តដើម្បីរឹតបន្តឹងលំហសង្គមស៊ីវិល គឺពុំផ្អែកលើមូលដ្ឋានត្រឹមត្រូវការពិតឡើយ។
លោកបានគូសបញ្ជាក់ក្នុងទំព័រហ្វេសប៊ុករបស់លោកទៀតថា៖ «រាល់ច្បាប់ និងលិខិតបទដ្ឋានគតិយុត្តទាំងអស់ ដែលបានអនុម័ត រួមទាំងក្នុងអំឡុងពេលនៃការរាតត្បាតជំងឺកូវីដ-១៩ គឺប្រកាន់ខ្ជាប់នូវគោលការណ៍នេះ និត្យានុកូលភាព ភាពចាំបាច់ និងសមាមាត្រ ដោយមានគោលបំណងតែមួយគត់ គឺដើម្បីសង្គ្រោះអាយុជីវិត ការពារពលរដ្ឋដែលគោរពច្បាប់ និងទប់ស្កាត់អំពើល្មើសច្បាប់នានាដែលបង្កអំពើអស្ថិរភាពសង្គម ប៉ះពាល់ដល់សុខភាពរបស់ប្រជាពលរដ្ឋ និងសណ្ដាប់ធ្នាប់សាធារណៈ»។
ពាក់ព័ន្ធនឹងលំហសង្គមស៊ីវិល លំហប្រជាធិបតេយ្យ និងការបោះឆ្នោតវិញ លោកនាយករដ្ឋមន្ត្រីបានលើកឡើងថា ក្នុងនិយាមនៃការអនុវត្តជាសកលលទ្ធិប្រជាធិបតេយ្យត្រូវដើរតួទន្ទឹមនឹងនីតិរដ្ឋ ហើយការអនុវត្តលទ្ធិប្រជាធិបតេយ្យដោយគ្មាននីតិរដ្ឋនឹងនាំទៅជាអនាធិបតេយ្យ។ ក្នុងន័យនេះ លោកថា កម្ពុជាចង់ឱ្យតួអង្គទាំងអស់នៅក្នុងកិច្ចដំណើរការប្រជាធិបតេយ្យ មានការទទួលខុសត្រូវ ធ្វើការរិះគន់ដោយស្ថាបនា មិនអុចអាល មិនបង្កើតការស្អប់ខ្ពើមរវាងពូជសាសន៍ ដែលអាចនាំឱ្យមានសង្រ្គាមស៊ីវិល។
លោកគូសបញ្ជាក់ទៀតថា៖ «ការគោរពសិទ្ធិមនុស្ស និងលទ្ធិប្រជាធិបតេយ្យ និងការរក្សាសន្តិភាព ស្ថិរភាព មានការអាស្រ័យគ្នាទៅវិញទៅមក មិនអាចខ្វះណាមួយបាន»។
គួរបញ្ជាក់ថា លោក វិទិត មុនតាប៊ន (Vitit MUNTARBHORN) អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា កំពុងធ្វើទស្សនកិច្ចការងារជាលើកដំបូងនៅក្នុងប្រទេសកម្ពុជា ចាប់ពីថ្ងៃទី១៥ ដល់ថ្ងៃទី២៦ ខែសីហា ឆ្នាំ២០២២នេះ។ ក្រៅពីការជួបជាមួយប្រមុខរដ្ឋាភិបាលកម្ពុជានេះ លោក វិទិត មុនតាប៊ន ក៏គ្រោងនឹងជួបជាមួយអ្នកពាក់ព័ន្ធផ្សេងទៀត ក្នុងនោះមានទាំងមន្ត្រីរដ្ឋាភិបាល និងអង្គការសង្គមស៊ីវិល៕
