កម្ពុជាបន្តរកឃើញអ្នកឆ្លងជំងឺកូវីដ-១៩ថ្មី ចំនួន២៦ករណីបន្ថែមទៀត កាលពីថ្ងៃម្សិលមិញ ខណៈអ្នកជំងឺចំនួន៣២នាក់បានជាសះស្បើយ។
សេចក្តីជូនដំណឹងរបស់ក្រសួងសុខាភិបាល ចុះថ្ងៃទី១៧ ខែសីហា ឆ្នាំ២០២២ ឱ្យដឹងថា អ្នកជំងឺកូវីដ-១៩ថ្មី ដែលបានរកឃើញទាំង២៦នាក់នោះជាការឆ្លងវីរុសប្រភេទអូមីក្រុង ក្នុងនោះមាន៩នាក់ជាករណីដែលស្នើសុំវិញ្ញាបនបត្រចេញទៅក្រៅប្រទេស។
ចំណែកអ្នកជាសះស្បើយវិញ ក្រសួងថាមានចំនួន៣២នាក់ ខណៈមិនមានករណីស្លាប់នោះទេ។
ជុំវិញករណីនេះដែរ លោកនាយករដ្ឋមន្ត្រី ហ៊ុន សែន នៅថ្ងៃពុធនេះ ក៏បានអំពាវនាវដល់ប្រជាពលរដ្ឋបន្តប្រយុទ្ធប្រឆាំងនឹងជំងឺកូវីដ-១៩ជាបន្តទៀត ជាពិសេសអ្នកដែលមិនទាន់បានចាក់វ៉ាក់សាំងដូសមូលដ្ឋាន ត្រូវបន្តទៅចាក់ ហើយអ្នកដែលត្រូវចាក់ដូសជំរុញ ត្រូវបន្តចាក់ដូសជំរុញបន្ថែម។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៧ ៣២៦នាក់ ក្នុងនោះជាសះស្បើយ ១៣៤ ០១៤នាក់ និងស្លាប់ចំនួន៣ ០៥៦នាក់៕