លោកនាយករដ្ឋមន្រ្តី ហ៊ុន សែន បានប្រាប់ទៅមេខ្លោងម្នាក់ដែលបានទន្ទ្រានដីរដ្ឋនៅខេត្តព្រះសីហនុ ដែលកំពុងរត់គេចខ្លួន ឱ្យចូលខ្លួនទៅសារភាពកំហុស ស្របពេលសមត្ថកិច្ចខេត្តព្រះសីហនុបានចាប់ខ្លួនពលរដ្ឋ៤នាក់ ក្នុងករណីទន្ទ្រានដីក្រុមហ៊ុនឯកជនមួយដែលបានទទួលសិទ្ធិវិនិយោគពីរដ្ឋាភិបាល។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នៅព្រឹកថ្ងៃពុធនេះ លោកនាយករដ្ឋមន្ត្រី ហ៊ុន សែន មានប្រសាសន៍ថា លោកបានឃើញសារព័ត៌មានមួយចុះផ្សាយពីជនមួយរូបដែលពាក់អាវគណបក្សប្រជាជនកម្ពុជា បានស្នើសុំឱ្យលោកជួយអន្តរាគមន៍ដោះស្រាយរឿងដីធ្លី ប៉ុន្តែបើតាមការទទួលបានព័ត៌មានពីអភិបាលខេត្តព្រះសីហនុ គឺជននោះជាមេខ្លោងដែលដឹកនាំចលនាប្រជាពលរដ្ឋឱ្យទៅទន្ទ្រានដីរដ្ឋក្នុងខេត្តព្រះសីហនុ។
ករណីនេះ លោកបានប្រាប់ទៅមេខ្លោងដែលកំពុងរត់គេចខ្លួនរូបនោះត្រូវប្រញាប់ចូលខ្លួនទៅសារភាពកំហុសនៅចំពោះមុខសមត្ថកិច្ច ដោយលោកអះអាងថានឹងពុំមានការឃុំខ្លួននោះទេ។
លោកនាយករដ្ឋមន្ត្រី ហ៊ុន សែន ថ្លែងថា៖ «មេខ្លោងម្នាក់នេះត្រូវទៅបង្ហាញខ្លួនយ៉ាងឆាប់នៅនៅឯខេត្ត[ព្រះសីហនុ] រួចហើយចាំនិយាយគ្នាតាមក្រោយ។ ត្រូវទៅទទួលខុសត្រូវ! អ្នកឯងទៅប្រមូលប្រជាជនទៅកាប់ទន្ទ្រានដីរបស់រដ្ឋ អ៊ីចឹងបានប្រជាជនគេឱ្យទៅផ្ទះ ប៉ុន្តែមេខ្លោងមេចលនាគឺត្រូវតែទទួលខុសត្រូវ។ អ៊ីចឹងបានជាខ្ញុំចង្អុលបង្ហាញឱ្យ គួច ចំរើន ថាឱ្យតាមរក»។
ស្របពេលគ្នានេះដែរ រដ្ឋបាលខេត្តព្រះសីហនុ កាលពីថ្ងៃអង្គារម្សិលមិញ ក៏បានប្រកាសពីការឃាត់ខ្លួនប្រជាពលរដ្ឋចំនួន៤នាក់ ដើម្បីនាំទៅសួរចម្លើយនៅមូលដ្ឋានកងរាជអាវុធហត្ថស្រុកស្ទឹងហាវ ក្នុងករណីដែលអាជ្ញាធរអះអាងថា ពួកគេបានប្រើហិង្សាលើក្រុមការងារចម្រុះខេត្តដែលចុះទៅអប់រំពលរដ្ឋឱ្យរុះរើខ្ទមខុសច្បាប់នៅលើទីតាំងដីកម្មសិទ្ធិឯកជនរបស់ក្រុមហ៊ុនមួយ នៅតំបន់សេដ្ឋកិច្ចពិសេសក្រុងព្រះសីហនុ (SIHANOUK VILLE SEZ)។
យោងតាមការផ្សព្វផ្សាយលើទំព័រហ្វេសប៊ុករបស់រដ្ឋបាលខេត្តព្រះសីហនុ ពលរដ្ឋទាំង៤នាក់ដែលត្រូវបានឃាត់ខ្លួននោះ រួមមាន ទេព សារ៉ា, ឈិន បូនី, សេង មករា និង ឃួន តារ៉ា។ ប្រភពដដែលបន្តថា ក្នុងប្រតិបត្តិការចុះអប់រំពលរដ្ឋឱ្យរុះរើខ្ទមដែលសង់ខុសច្បាប់នៅលើដីក្រុមហ៊ុននោះ គឺមានពលរដ្ឋមួយចំនួនបានស្ម័គ្រចិត្តប្រគល់ដីជូនម្ចាស់កម្មសិទ្ធិវិញ ប៉ុន្តែមានពលរដ្ឋមួយចំនួនទៀតប្រដាប់ដោយកាំបិត ចម្ពាមកៅស៊ូ ដុំថ្ម និងដបប្រេងសាំង បានចេញមុខតវ៉ា រហូតដល់ប្រើអំពើហិង្សាលើក្រុមការងារចម្រុះ ទើបមានការឃាត់ខ្លួនអ្នកទាំង៤នាក់នោះយកទៅសួរនាំ។
រដ្ឋបាលខេត្តព្រះសីហនុបញ្ជាក់ថា៖ «ជនសង្ស័យទាំង៤នាក់បានទទួលស្គាល់កំហុសរបស់ខ្លួន និងបានអំពាវនាវឱ្យប្រជាពលរដ្ឋផ្សេងទៀតដែលបានចាញ់បោកការញុះញង់របស់មេខ្យល់ សូមឱ្យរុះរើខ្ទមរបស់ខ្លួនដោយស្ម័គ្រចិត្ត និងចាកចេញពីទីតាំងដីកម្មសិទ្ធិឯកជនតាមការណែនាំរបស់អាជ្ញាធរខេត្ត ដើម្បីបញ្ចៀសការប្រឈមមុខចំពោះផ្លូវច្បាប់»។
បើតាមរដ្ឋបាលខេត្ត សំណង់មិនរៀបរយទាំងនោះគឺភាគច្រើនចាប់ផ្ដើមសាងសង់នៅដើមឆ្នាំ២០២២ និងមានការកើនឡើងក្នុងអំឡុងពេលយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់នាពេលកន្លងមក ខណៈរដ្ឋបាលខេត្តក៏ធ្លាប់បានចុះអប់រំពលរដ្ឋទាំងនោះឱ្យរុះរើខ្ទមរបស់ពួកគេចេញម្តងរួចមកហើយ កាលពីថ្ងៃទី២៧ ខែមេសា ឆ្នាំ២០២២។
ទោះយ៉ាងណា វីអូឌី មិនអាចស្វែងរកការបញ្ជាក់ជុំវិញករណីនេះពីប្រជាពលរដ្ឋដែលអាជ្ញាធរអះអាងថាបានទៅទន្ទ្រានដីរបស់ក្រុមហ៊ុននោះបានទេ នៅថ្ងៃពុធនេះ។
មេបញ្ជាការកងរាជអាវុធហត្ថខេត្តព្រះសីហនុ លោក ហេង ប៊ុនទី និងអ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី សុំមិនអត្ថាធិប្បាយ ដោយបង្វែរឱ្យសួរទៅកាន់អ្នកនាំពាក្យសាលាដំបូងខេត្តព្រះសីហនុ លោក ហួត វិចិត្រ វិញ។
តែយ៉ាងណា លោក ហួត វិចិត្រ នៅពុំអាចបញ្ជាក់ជុំវិញករណីនេះបាននៅឡើយ។
មន្ត្រីសមាគមសម្ព័ន្ធសហគមន៍កសិករកម្ពុជា លោក ស៊ុន សុផាត សង្កេតឃើញថា មានពលរដ្ឋមួយចំនួនបានចូលទៅរស់នៅនិងអាស្រ័យផលលើដីគម្របព្រៃឈើឆ្នាំ២០០២ នៅតំបន់ដីក្រុមហ៊ុន «សីហនុវិល ស្ពេសលអ៊ីខននើមី ហ្សូន» នោះដែរ ប៉ុន្តែលោកមិនដឹងច្បាស់ថាបានជាន់លើដីក្រុមហ៊ុនឬយ៉ាងណានោះទេ។
យ៉ាងណា លោកបានស្នើដល់អាជ្ញាធរពាក់ព័ន្ធត្រូវចុះស្រាវជ្រាវឱ្យបានច្បាស់លាស់ និងដោះស្រាយបញ្ហានេះឱ្យមានតម្លាភាព យុត្តិធម៌ ជាជាងប្រើប្រាស់កម្លាំងចុះរុះរើ និងបណ្ដេញពលរដ្ឋចេញទាំងបង្ខំ ដើម្បីកុំឱ្យប៉ះពាល់ដល់សិទ្ធិពលរដ្ឋក្នុងការទទួលបានសិទ្ធិដីធ្លី។
លោកបន្ថែមថា៖ «ខ្ញុំសុំឱ្យអាជ្ញាធរនិងក្រុមហ៊ុនត្រូវមានការយោគយល់និងអនុគ្រោះដល់ប្រជាពលរដ្ឋដែលគាត់បានចូលទៅរស់នៅនិងអាស្រ័យ មានដំណាំផ្សេងៗនោះនៅតំបន់នោះផង។ ហើយមុនរុះរើផ្ទះពលរដ្ឋ ត្រូវបង្ហាញឯកសារជូនពលរដ្ឋឱ្យដឹងផងដែរ»។
កាលពីឆ្នាំ២០០៨ រដ្ឋាភិបាលបានចេញអនុក្រឹត្យមួយកាត់ដីទំហំ២ ០១៧,១៤ហិកតា ពីគម្របព្រៃឈើឆ្នាំ២០០២ ធ្វើអនុបយោគ និងប្រគល់សិទ្ធិកាន់កាប់ទៅឱ្យក្រុមហ៊ុន «សីហនុវិល ស្ពេសលអ៊ីខននើមី ហ្សូន» ដើម្បីអភិវឌ្ឍជាតំបន់សេដ្ឋកិច្ចពិសេស «SIHANOUK VILLE SEZ»៕
