ការិយាល័យប្រព័ន្ធផ្សព្វផ្សាយរបស់ប្រធានាធិបតីស្រីលង្កា លោក រ៉ានីល វីក្រេមេស៊ីងហ្កេ (Ranil Wickremesinghe) បានឱ្យដឹងនៅថ្ងៃអង្គារម្សិលមិញថា ការដាក់ប្រទេសក្នុងគ្រាអាសន្ន (State of emergency) ដែលដាក់ចេញកាលពីពាក់កណ្ដាលខែកក្កដាកន្លងទៅ នឹងមិនត្រូវបន្តឡើយក្នុងសប្ដាហ៍នេះ ខណៈការតវ៉ានានាប្រឆាំងនឹងរដ្ឋាភិបាលនៅក្នុងប្រទេសថមថយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
លោក រ៉ានីល វីក្រេមេស៊ីងហ្កេ បានប្រកាសដាក់ប្រទេសក្នុងគ្រាអាសន្ន (State of emergency) កាលពីថ្ងៃទី១៨ ខែកក្កដា [ដែលគ្រោងនឹងបញ្ចប់ក្នុងសប្ដាហ៍នេះ] ខណៈរដ្ឋបាលរបស់លោកព្យាយាមលុបបំបាត់ភាពចលាចលក្នុងសង្គម និងដោះស្រាយវិបត្តិសេដ្ឋកិច្ចធ្ងន់ធ្ងរដែលកំពុងតែកើតឡើងនៅក្នុងប្រទេស។
ទោះជាយ៉ាងណា ថ្លែងក្នុងព្រឹត្តិការណ៍មួយដែលធ្វើឡើងនៅទីក្រុងកូឡុំបូ ការិយាល័យរបស់ប្រធានាធិបតីស្រីលង្ការូបនេះបានឱ្យដឹងថា ការដាក់ប្រទេសក្នុងគ្រាអាសន្ននឹងត្រូវដកចេញវិញក្នុងសប្ដាហ៍នេះ។
ប្រទេសស្រីលង្កា ក្នុងរយៈពេលចុងក្រោយនេះ បានទទួលរងនូវវិបត្តិសេដ្ឋកិច្ចដ៏អាក្រក់បំផុតមួយ ខណៈការតវ៉ានានាតាមដងផ្លូវក៏បានចាប់ផ្តើមកើតឡើងជាបន្តបន្ទាប់ ស្របពេលដែលទុនបម្រុងអន្តរជាតិរបស់ប្រទេសស្ថិតក្នុងកម្រិតទាប ដែលបានបង្កឱ្យប្រទេសមួយនេះជួបប្រទះបញ្ហាកង្វះថវិកាធ្ងន់ធ្ងរសម្រាប់ការនាំចូលអាហារ ឱសថ និងប្រេងឥន្ធនៈ ជាដើម៕