អ្នកនាំពាក្យរបបយោធាមីយ៉ាន់ម៉ាមួយរូបបានឱ្យដឹងថា ប្រទេសរបស់ខ្លួនគ្រោងនឹងនាំចូលប្រេងឥន្ធនៈពីរុស្ស៊ី ដើម្បីកាត់បន្ថយការព្រួយបារម្ភដែលបង្កឡើងដោយបញ្ហានៃការផ្គត់ផ្គង់និងការកើនឡើងនៃតម្លៃ ស្របពេលដែលពិភពលោកកំពុងមានវិបត្តិថាមពល។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសន្និសីទសារព័ត៌មានមួយកាលពីថ្ងៃពុធម្សិលមិញ អ្នកនាំពាក្យរបបយោធាមីយ៉ាន់ម៉ា លោក Zaw Min Tun បានលើកឡើងថា៖ «យើងបានទទួលការអនុញ្ញាតឱ្យធ្វើការនាំចូលប្រេងឥន្ធនៈពីប្រទេសរុស្ស៊ី ដោយសារតែវាមានគុណភាព និងតម្លៃទាប»។
ទាក់ទិននឹងករណីនេះ លោកបន្តថា មេដឹកនាំរបបយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) បានពិភាក្សាអំពីបញ្ហាប្រេង និងឧស្ម័ន ក្នុងអំឡុងពេលដែលលោកធ្វើដំណើរទៅកាន់ប្រទេសរុស្ស៊ី កាលពីខែមុន ខណៈមីយ៉ាន់ម៉ាក៏នឹងពិចារណាលើការរុករកប្រេងរួមគ្នាក្នុងប្រទេសរបស់ខ្លួន ជាមួយនឹងរុស្ស៊ី និងចិនផងដែរ។
បើតាមការឱ្យដឹងពីប្រព័ន្ធផ្សព្វផ្សាយក្នុងស្រុក ការដឹកជញ្ជូនប្រេងឥន្ធនៈពីរុស្ស៊ីមកកាន់មីយ៉ាន់ម៉ានេះ នឹងត្រូវចាប់ផ្តើមពីខែកញ្ញាខាងមុខនេះតទៅ។
គួរបញ្ជាក់ថា ក្រៅពីធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងមក ប្រទេសមីយ៉ាន់ម៉ា ក៏រងនូវផលប៉ះពាល់ខ្លាំងដោយសារតែការកើនឡើងនៃតម្លៃប្រេងឥន្ធនៈផងដែរ ខណៈប្រេងសាំងបច្ចុប្បន្ននៅក្នុងប្រទេសមានតម្លៃចន្លោះពី២ ៣០០ទៅ ២ ៧០០គីយ៉ាត (kyat) [ស្មើនឹងប្រមាណ១ ដុល្លារ] ក្នុងមួយលីត្រ៕
