ប្រជាពលរដ្ឋនៅតំបន់ព្រៃសហគមន៍ឧត្ដមស្រែពស់ ហៅព្រៃមេត្តាធម្មជាតិ បានអះអាងថា ព្រៃឈើនៅតំបន់នេះនៅតែរកការកាប់បំផ្លាញ និងឈូសឆាយ បើទោះបីជាអភិបាលខេត្តកំពង់ស្ពឺធ្លាប់បានសន្យាថានឹងការពារព្រៃនៅតំបន់នោះក៏ដោយ។
ប្រជាពលរដ្ឋរស់នៅក្បែរសហគមន៍ព្រៃឧត្តមស្រែពស់ លោក សយ សាត អាយុ៧១ឆ្នាំ ប្រាប់វីអូឌីនៅថ្ងៃព្រហស្បតិ៍នេះថា កាលពីដើមខែសីហា ថ្មីៗនេះ អភិបាលខេត្តកំពង់ស្ពឺ លោក វ៉ី សំណាង បានចុះទៅពិនិត្យនៅតំបន់ព្រៃមេត្តាធម្មជាតិ និងបានសន្យាជាមួយប្រជាសហគមន៍ថា នឹងស្វែងរកដំណោះស្រាយក្នុងការការពារព្រៃឈើនៅតំបន់នោះ កុំឱ្យមានការឈូសឆាយបន្ថែមទៀត។
តែយ៉ាងណា លោកថា ចាប់តាំងពីពេលនោះមកដល់បច្ចុប្បន្ន សកម្មភាពនៃការកាប់បំផ្លាញព្រៃឈើពីសំណាក់ក្រុមទាហាននៅតែបន្ដកើតឡើងដដែល ក្នុងនោះ ព្រៃឈើប្រហែល៣ហិកតានៅសាលាបុណ្យខាងលិច ត្រូវបានកាប់បំផ្លាញស្ទើរទាំងស្រុង។
លោកថា៖ «បានកាប់បំផ្លិចបំផ្លាញបន្ដទៀត កន្លែងដែលឯកឧត្តម វ៉ី សំណាង ចូលទៅក្រោមម្លប់ជ្រៃនោះ មានពុទ្ធរូបជាច្រើនអង្គ ឥលូវគេកាប់បំផ្លាញជាវាលរហោលអស់ហើយ»។
ប្រជាសហគមន៍រូបនេះបន្ថែមថា ចាប់តាំងពីមានការឈូសឆាយដោយក្រុមទាហាន «ង៧០» ក្នុងតំបន់នេះ លោកមិនទាន់ឃើញអភិបាលខេត្តមានចំណាត់ការច្បាស់លាស់ណាមួយនោះទេ។ ករណីនេះ លោកបានស្នើទៅអាជ្ញាធរខេត្តជាថ្មី ក្នុងការពន្លឿនការដោះស្រាយបញ្ហានេះឱ្យបានឆាប់។
ព្រះតេជគុណ ព្រុំ សុជាតិ ចៅអធិការវត្តមេត្តាធម្មជាតិ មានថេរដីកាថា បដិមាព្រះពុទ្ធដែលស្ថិតនៅក្រោមដើមជ្រៃ ដែលអភិបាលខេត្តបានចុះទៅពិនិត្យនោះ បានរងការបំផ្លាញកាលពីដើមសប្តាហ៍នេះ ហើយព្រៃដែលមានដើមឈើធំៗនៅជាប់ជើងភ្នំ ដែលជាជម្រកសត្វ ក៏លែងមានទៀតដែរ ដោយសារតែការឈូសឆាយដីព្រៃពីសំណាក់ក្រុមទាហាននោះ។
ព្រះអង្គបន្តថា៖ «បើសម្រាប់អាត្មា ឃើញទង្វើអសីលធម៌ ឬទង្វើមិនសមហេតុសមផលអស់ហើយ មិនដឹងត្រូវធ្វើយ៉ាងម៉េចទេ […] បើខ្មែរនិយាយគ្នាមិនត្រូវ បើសង្ឃឹមលើច្បាប់ មិនដឹងច្បាប់ជាអ្វី បើសង្ឃឹមលើព្រះធម៌ ងងឹតឈឹង ដូចរស់នៅក្នុងភពងងឹតអ៊ីចឹង បើសីលធម៌ធ្លាក់ចុះអ៊ីចឹង»។
អភិបាលខេត្តកំពង់ស្ពឺ លោក វ៉ី សំណាង បានលើកឡើងថា ទោះបីជាលោកបានចុះទៅព្រៃមេត្តាធម្មជាតិនេះ ដើម្បីជំរុញកុំឱ្យមានការកាប់បំផ្លាញព្រៃឈើទៀតក្ដី តែលោកនៅតែមិនអាចហាមក្រុមទាហានបាននោះទេ។
លោកបានគូសបញ្ជាក់ថា៖ «មិនដឹងមូលហេតុអីផង ប្រហែលគេចង់បានដីហើយមើលទៅ ប្អូនមិនសួរអ្នកកាប់? ពូចង់ការពារហ្នឹងហើយ បើអ្នកកាប់នៅបន្តកាប់ យើងមានស្អីធ្វើក្រៅពីហ្នឹង ពូអ្នកការពារ តែជនខិលខូចនៅតែកាប់ អាហ្នឹងយើងធ្វើម៉េច? តែវិធានការមានតែការអនុវត្តច្បាប់ហ្នឹង បន្តកំណត់យាមការព្រំដីសហគមន៍របស់យើងឱ្យបានច្បាស់លាស់សិន»។
តែយ៉ាងណា អភិបាលខេត្តរូបនេះបញ្ជាក់ថា រដ្ឋបាលខេត្តបានដាក់លិខិតមួយច្បាប់ទៅក្រសួងបរិស្ថានរួចហើយ ដើម្បីស្នើសុំកំណត់ព្រំដីសហគមន៍ព្រៃមេត្តាធម្មជាតិនេះឱ្យបានជាក់លាក់។ លោកសង្ឃឹមថា នឹងទទួលបានចម្លើយពីក្រសួងនៅសប្តាហ៍ក្រោយ។
លោកថា៖ «អាងទៅលើព្រំមិនអ៊ីចឹង? ហើយបើមិនមានព្រំផង តើដីយើងនៅណា? ចេះតែចង្អុលទៅ ចង្អុលមក ទាហានថាដីគាត់ សហគមន៍ថាដីគាត់ យើងមានតែឯកសារយកពីក្រសួងបរិស្ថានមក កន្លែងណាជាដីរបស់សហគមន៍ កន្លែងណាជាដីរបស់ទាហាន អាហ្នឹងបានដឹងថានរណាជាដីរបស់នរណា»។
ពាក់ព័ន្ធនឹងករណីនេះ មន្ត្រីជាន់ខ្ពស់ប្រព័ន្ធផ្សព្វផ្សាយនៃសមាគមបណ្ដាញយុវជនកម្ពុជា លោក ម៉ា ចិត្រា យល់ថា ការសន្យាស្វែងរកដំណោះស្រាយរបស់អភិបាលខេត្ត ហាក់នៅមិនទាន់មានប្រសិទ្ធភាពនៅឡើយ ខណៈការកាប់បំផ្លាញព្រៃឈើនៅតែបន្ដកើតឡើង។ លោកថា ករណីនេះអាចប្រហែលមកពីអភិបាលខេត្តមិនមានឥទ្ធិពលណាមួយក្នុងការប្រាប់ទៅក្រុមហ៊ុនទាហានកុំឱ្យឈូសឆាយ។
ទោះយ៉ាងណា លោកបានជំរុញដល់រដ្ឋាភិបាលត្រូវដោះស្រាយករណីនេះជូនប្រជាពលរដ្ឋឱ្យមានតម្លាភាព និងប្រគល់ដីព្រៃនៅតំបន់នោះឱ្យប្រជាសហគមន៍ការពារវិញ។
លោកថា៖ «មធ្យោបាយដែលអាចដោះស្រាយបានមានតែរដ្ឋាភិបាលខ្លួនឯងផ្ទាល់ ត្រូវដោះស្រាយឱ្យពលរដ្ឋវិញមក ដីហ្នឹងឱ្យសហគមន៍វិញមក ឱ្យសហគមន៍ការពារទៅ […] វាសមល្មមនឹងទុកព្រៃឈើដែលនៅសេសសល់ ដើម្បីនឹងឱ្យពលរដ្ឋបានគាត់អាចការពារបន្ដទៅ ព្រោះវាជាប្រយោជន៍សង្គមយើងទាំងអស់គ្នាទេ រដ្ឋាភិបាលគួរតែគិតគូរឡើងវិញ ក្នុងការផ្ដល់ដីទៅឱ្យអ្នកនេះអ្នកនោះជាដើម»។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយទទួលបានដីសម្បទានសង្គមកិច្ចនេះ ក្រុមទាហានដាក់គ្រឿងចក្រឈូសឆាយ និងប្រើកម្លាំងកម្មករឱ្យចូលទៅកាប់រុករានព្រៃឈើតំបន់នោះ ប៉ុន្តែត្រូវបានអ្នកភូមិរាប់រយនាក់នៅឃុំត្រពាំងជោរតវ៉ាប្រឆាំង ដោយពួកគេអះអាងថា ព្រៃឈើតំបន់នោះជាព្រៃសហគមន៍ឧត្ដមស្រែពស់ និងព្រៃមេត្តាធម្មជាតិ ដែលពួកគេបានការពារជាង២០ឆ្នាំមកហើយ៕
កែតម្រូវ៖ ឈ្មោះ សាត ផា ទៅជា សយ សាត
