វ៉ាក់សាំងកូវីដ-១៩ ចំនួន៣០ម៉ឺនដូស ដែលជាជំនួយរបស់ប្រទេសអេស៉្បាញ និងឱសថប្រឆាំងមេរោគកូវីដ-១៩ ប្រភេទ Molnupiravir ចំនួនជាង៨២ម៉ឺនគ្រាប់ ដែលជាជំនួយរបស់អង្គការយូនីសេហ្វ ត្រូវបានផ្ដល់ជូនកម្ពុជាសម្រាប់ប្រើប្រាស់ក្នុងការបង្ការនិងព្យាបាលជំងឺកូវីដ-១៩។
កាលពីថ្ងៃម្សិលមិញនេះ កម្ពុជាបានទទួលនូវឱសថប្រឆាំងមេរោគ Molnupiravir ចំនួន៨២៦ ៥៦០គ្រាប់សម្រាប់ប្រើប្រាស់ក្នុងការព្យាបាលជំងឺកូវីដ-១៩ ដែលការផ្គត់ផ្គង់ឱសថទាំងនេះគ្រប់គ្រាន់សម្រាប់ព្យាបាលមនុស្សចំនួន២០ ៦៦៤នាក់ដែលឆ្លងមេរោគកូវីដ-១៩ នៅកម្ពុជា។ នេះបើតាមការផ្សព្វផ្សាយនៅក្នុងទំព័រហ្វេសប៊ុករបស់អង្គការយូនីសេហ្វ។
ប្រភពដដែលបន្តថា ឱសថទាំងនេះបានមកដល់កម្ពុជា ក្រោមជំនួយយន្តការផ្គត់ផ្គង់បរិក្ខារហិរញ្ញប្បទាននៃយូនីសេហ្វ (ACT-A Supplies Facility (“ACT-A SFF”) ដោយមានការចូលរួមចំណែកថវិកាពីរដ្ឋាភិបាលកាណាដា ហើយការដឹកជញ្ជូនឱសថទាំងនេះជាចំណែកមួយនៃការគាំទ្រជាបន្តបន្ទាប់របស់យូនីសេហ្វ ក្នុងការឆ្លើយតបនឹងការរីករាលដាលនៃជំងឺកូវីដ-១៩នៅកម្ពុជា។
ស្របពេលគ្នានេះដែរ រដ្ឋាភិបាលនិងប្រជាជនអេស៉្បាញ ក៏បានផ្តល់ជំនួយជាវ៉ាក់សាំងកូវីដ-១៩ ប្រភេទ Pfizer សម្រាប់កុមារចំនួន៣០ម៉ឺនដូសផងដែរ ដើម្បីបង្ការនិងទប់ស្កាត់ការឆ្លងរាលដាលជំងឺផ្លូវដង្ហើមមួយនេះនៅកម្ពុជា។
ក្នុងពិធីប្រគល់-ទទួលអំណោយវ៉ាក់សាំងកូវីដ-១៩ ដែលជាជំនួយរបស់ប្រទេសអេស៉្បាញ នៅវិមានសន្តិភាព នាព្រឹកថ្ងៃទី១៨ ខែសីហានេះ ភារធារីស្ដីទីនៃស្ថានទូតព្រះរាជាណាចក្រអេស្ប៉ាញប្រចាំកម្ពុជា លោកស្រី គ្រីស្ទីណា អាហ្វៀឡា (Christina Aguilar) បានថ្លែងថា ការផ្ដល់ជំនួយវ៉ាក់សាំងកូវីដ-១៩ ចំនួន៣០ម៉ឺនដូសនេះ ជាលទ្ធផលនៃកិច្ចព្រមព្រៀងរវាងរដ្ឋមន្រ្តីនៃក្រសួងសុខាភិបាលនៃប្រទេសទាំងពីរ រួមនឹងកិច្ចប្រតិបត្តិការនៃវិធានការការពារជនស៊ីវិលនៃសហភាពអឺរ៉ុបផងដែរ។
លោកស្រីក៏បានសាទរចំពោះរដ្ឋាភិបាលកម្ពុជាដែលបានគ្រប់គ្រងការឆ្លងរាលដាលជំងឺកូវីដ-១៩ប្រកបដោយជោគជ័យ ហើយត្រូវបានទទួលការកោតសរសើរយ៉ាងទូលំទូលាយផងដែរ។
លោកស្រីបន្ថែមថា៖ «សម្រាប់អេស្ប៉ាញនេះ គឺជាកិត្តិយសណាស់ដែលយើងបានគាំទ្រដល់ប្រជាជនកម្ពុជា និងកិច្ចខិតខំប្រឹងប្រែងរបស់អាជ្ញាធរកម្ពុជា ក្នុងការគ្រប់គ្រងប្រកបដោយប្រសិទ្ធភាព និងធានាសុវត្ថិភាពជាអតិបរមាសម្រាប់ប្រជាជនកម្ពុជា បូករួមទាំងជនបរទេសផងដែរ»។
ក្នុងពិធីនោះដែរ លោកនាយករដ្ឋមន្ត្រី ហ៊ុន សែន មានប្រសាសន៍ថា ទោះបីជារលកនៃការឆ្លងជំងឺកូវីដ-១៩នៅបន្តកើតមាន ក៏កម្ពុជាអាចបើកដំណើរការប្រទេសឡើងវិញលើគ្រប់វិស័យ ដែលសមិទ្ធផលនេះសម្រេចបានតាមរយៈការចាក់វ៉ាក់សាំង ដែលបានជួយបង្កើតជារនាំងការពារដ៏រឹងមាំ ចូលរួមកាត់ផ្ដាច់ការឆ្លងរាលដាល និងជាពិសេសបញ្ចៀសបាននូវការឈឺធ្ងន់និងការបាត់បង់អាយុជីវិតប្រជាពលរដ្ឋ។
លោកបន្ថែមថា ជាក់ស្ដែងកម្ពុជាមិនមានករណីស្លាប់នោះឡើយ ក្នុងរយៈពេលជិត៤ខែចុងក្រោយនេះ រាប់តាំងពីខែមេសា ឆ្នាំ២០២២ មកដល់ថ្ងៃនេះ។
បើតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី១៨ ខែសីហានេះ កម្ពុជាបានបន្តរកឃើញករណីឆ្លងថ្មីចំនួន២៣នាក់បន្ថែមទៀត និងមានករណីជាសះស្បើយចំនួន៣៨នាក់។
ក្រសួងបន្តថា គិតមកដល់ព្រឹកថ្ងៃព្រហស្បតិ៍នេះ កម្ពុជាបានរកឃើញករណីឆ្លងជំងឺកូវីដ-១៩សរុបចំនួន១៣៧ ៣៤៩នាក់ ក្នុងនោះបានជាសះស្បើយចំនួន១៣៤ ០៥២នាក់ និងករណីស្លាប់មានចំនួន៣ ០៥៦នាក់៕