អង្គការសង្គមស៊ីវិលនិងសហគមន៍ចំនួន៤០ អំពាវនាវដល់រដ្ឋាភិបាលស៊ើបអង្កេតដោយឥតលម្អៀងលើហេតុការណ៍ប្រើហិង្សា ការឃាត់ខ្លួន និងការបំភិតបំភ័យលើអ្នកសារព័ត៌មានវីអូឌី និងសកម្មជន ព្រមទាំងផ្ដន្ទាទោសចំពោះអាជ្ញាធរដែលប្រព្រឹត្តអំពើល្មើសនឹងច្បាប់ ដើម្បីផ្តល់យុត្តិធម៌សម្រាប់ជនរងគ្រោះ។
ការអំពាវនាវនេះបានធ្វើឡើងតាមរយៈសេចក្តីថ្លែងការណ៍រួម ស្តីពី «ការឃាត់ខ្លួន និងប្រើហិង្សាយ៉ាងអាក្រក់លើអ្នកសារព័ត៌មាន និងសកម្មជន នៅតំបន់ភ្នំតាម៉ៅ» នៅថ្ងៃទី១៩ ខែសីហា ឆ្នាំ២០២២នេះ។ អង្គការសមាគម និងសហគមន៍ចំនួន៤០ មានដូចជា មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ មជ្ឈមណ្ឌលសិទ្ធិមនុស្សកម្ពុជា អង្គការអាក់សិនអេដកម្ពុជា វិទ្យាស្ថានតស៊ូមតិនិងគោលនយោបាយ សមាគមកម្ពុជាការពារអ្នកកាសែត អង្គការការពារសិទ្ធិមនុស្សលីកាដូ អង្គការអាដហុក និងអង្គការ សមាគម និងសហគមន៍ដីធ្លីមួយចំនួនទៀត។
សេចក្តីថ្លែងការណ៍រួមនោះបានលើកឡើងថា ពួកគេមានការសោកស្ដាយយ៉ាងខ្លាំងចំពោះការប្រើប្រាស់អំពើហិង្សា ការឃាត់ខ្លួនដោយអយុត្តិធម៌អស់រយៈពេលប្រមាណ៧ម៉ោង និងការបំភិតបំភ័យអ្នកសារព័ត៌មាន វីអូឌី ចំនួន៥នាក់ និងយុវជនខ្មែរថាវរៈ ចំនួន៤នាក់ កាលពីថ្ងៃទី១៦ ខែសីហា ឆ្នាំ២០២២ ពីសំណាក់មន្ត្រីកងអង្គរក្សនាយករដ្ឋមន្ត្រី នៅតំបន់ព្រៃភ្នំតាម៉ៅ និងត្រូវបានបញ្ជូនទៅសាកសួរនៅអធិការដ្ឋាននគរបាលស្រុកបាទី ខេត្តតាកែវ។
ប្រភពដដែលបន្តថា ក្នុអំឡុងពេលឃាត់ខ្លួននោះ អ្នកថតវីដេអូរបស់វីអូឌីម្នាក់ លោក ហ៊ី ឆាយ ត្រូវបានមន្រ្តីកងអង្គរក្សទះកំផ្លៀង នៅពេលដែលគាត់បដិសេធប្រគល់ទូរសព្ទដែលគាត់ប្រើដើម្បីថតនៅពេលដែលកងអង្គរក្សសួរនាំសហការីរបស់គាត់ ហើយលោក ហ៊ុន វណ្ណៈ សកម្មជនខ្មែរថាវរៈ ក៏ត្រូវបានមន្ត្រីអង្គរក្សវាយម្តងហើយម្តងទៀត ខណៈពួកគេរុញគាត់ឡើងរថយន្តក្នុងអំឡុងពេលឃាត់ខ្លួននោះ។
ករណីនេះ អង្គការសង្គមស៊ីវិល និងសហគមន៍ទាំងនោះ បង្ហាញការសោកស្ដាយចំពោះការប្រើអំណាចដោយខុសច្បាប់របស់អាជ្ញាធរ និងការប្រើអំពើហិង្សាលើរូបរាងកាយលើអ្នកសារព័ត៌មាននិងសកម្មជន ហើយពួកគេបានអំពាវនាវឱ្យមានការស៊ើបអង្កេតដោយឥតលម្អៀងលើហេតុការណ៍នេះ ក៏ដូចជាផ្តន្ទាទោសចំពោះអាជ្ញាធរណាដែលប្រព្រឹត្តល្មើសនឹងច្បាប់ និងផ្តល់យុត្តិធម៌សម្រាប់ជនរងគ្រោះ។
អង្គការសង្គមស៊ីវិល និងសហគមន៍ទាំងនោះ បានគូសបញ្ជាក់ថា៖ «សិទ្ធិរបស់អ្នកកាសែតឯករាជ្យក្នុងការរាយការណ៍ព័ត៌មានដោយសេរីនៅក្នុងប្រទេសកម្ពុជា ត្រូវតែមានការការពារ ជាពិសេសនៅពេលរាយការណ៍អំពីបញ្ហាផលប្រយោជន៍សាធារណៈ ដូចជា ការកាប់បំផ្លាញព្រៃឈើនៅភ្នំតាម៉ៅអស់ជាច្រើនហិកតានាពេលថ្មីៗនេះ […] ដូចគ្នានេះដែរ អ្នកសារព័ត៌មាននិងសកម្មជនមានសិទ្ធិក្នុងការចងក្រងឯកសារ និងត្រួតពិនិត្យដោយសេរី អំពីការបំផ្លិចបំផ្លាញបរិស្ថាន និងការរំលោភសិទ្ធិ និងបញ្ចេញមតិជាសាធារណៈ ដែលជាសិទ្ធិត្រូវបានការពារដោយរដ្ឋធម្មនុញ្ញរបស់កម្ពុជា និងច្បាប់ស្តីពីសិទ្ធិមនុស្សអន្តរជាតិ»។
ក្រៅពីនោះ ពួកគេថា ច្បាប់ស្តីពីសារព័ត៌មានឆ្នាំ១៩៩៥ របស់កម្ពុជាដែលនៅធរមាននៅឡើយ បានហាមប្រាមចំពោះការត្រួតពិនិត្យមុនបោះពុម្ពផ្សាយ ដូចហេតុការណ៍ដែលបានកើតឡើងនៅថ្ងៃទី១៦ ខែសីហា នៅពេលដែលអាជ្ញាធរបានប្រាប់អ្នកកាសែតថា ពួកគេមិនត្រូវបានអនុញ្ញាតឱ្យថតរូបឬថតវីដេអូនៅក្នុងតំបន់នោះដោយគ្មានការអនុញ្ញាតជាមុនឡើយ និងនៅពេលដែលមន្រ្តីអង្គរក្សរឹបអូសយកឧបករណ៍របស់ពួកគេ រួមមាន ទូរសព្ទ កាមេរ៉ា និងដ្រូន ជាដើម។
ករណីនេះ អង្គការសង្គមស៊ីវិល និងសហគមន៍ទាំង៤០ បានស្នើដោយទទូចដល់អាជ្ញាធរជាតិឱ្យគោរពច្បាប់ស្តីពីរបបសារព័ត៌មាន រដ្ឋធម្មនុញ្ញ ព្រមទាំងច្បាប់ជាតិ និងអន្តរជាតិ ដែលធានាសិទ្ធិសេរីភាពនៃការបញ្ចេញមតិ និងសិទ្ធិរបស់អ្នកសារព័ត៌មាននិងអ្នកការពារសិទ្ធិមនុស្សទាំងអស់ក្នុងការចងក្រងឯកសារនិងផ្សព្វផ្សាយជាសាធារណៈនូវសកម្មភាពរបស់រដ្ឋនិងបម្រើសង្គម៕
