មេធាវីការពារសិទ្ធិឱ្យកញ្ញា សេង ធារី នឹងដាក់បណ្ដឹងឧទ្ធរណ៍ នៅក្នុងសប្ដាហ៍នេះ ដើម្បីជំរុញឱ្យតុលាការថ្នាក់កណ្ដាលមួយនេះបើកផ្លូវក្នុងការដោះលែងពិរុទ្ធជនរូបនេះមានសេរីភាពនិងបាននៅក្រៅឃុំ ស្របពេលដែលសាលក្រមនៅមិនទាន់ចូលជាស្ថាពរនៅឡើយ។
លោក ជូង ជូងី មេធាវីការពារសិទ្ធិឱ្យកញ្ញា សេង ធាវី មានប្រសាសន៍នៅថ្ងៃសុក្រនេះថា លោកបានទទួលការពឹងពាក់ពីកូនក្ដីរបស់ខ្លួនរួចហើយ កាលពីដើមសប្ដាហ៍កន្លងទៅនេះ ដើម្បីរៀបចំបណ្ដឹងឧទ្ធរណ៍ ស្នើសុំឱ្យដោះលែងបាននៅក្រៅឃុំ។ លោកបន្តថា នៅពេលនេះ លោកបានរៀបចំបណ្ដឹងរួចរាល់ហើយ ដូច្នេះ យ៉ាងយូរមិនឱ្យផុតពីក្នុងសប្ដាហ៍ខាងមុខនេះទេ លោកនឹងដាក់ទៅសាលាឧទ្ធរណ៍។
លោកបន្តថា៖ «ខ្ញុំត្រៀមហើយ នៅក្នុងសប្ដាហ៍ក្រោយហ្នឹង យើងនឹងដាក់ចូល ព្រោះយើងទទួលសិទ្ធិពីគាត់កាលពីថ្ងៃចន្ទកន្លងមកហ្នឹង ដើម្បីឱ្យយើងធ្វើកិច្ចការអស់ហ្នឹង»។
បើតាមលោក ជូង ជូងី បណ្ដឹងឧទ្ធរណ៍នេះ ក្នុងនាមជាមេធាវី រូបលោកក៏ត្រូវបំពេញកិច្ចការ២ផ្សេងទៀតក្នុងពេលតែមួយដែរ គឺ១ ស្នើទៅក្រសួងមហាផ្ទៃ ដើម្បីផ្ទេរការឃុំខ្លួនកូនក្ដីពីពន្ធនាគារខេត្តព្រះវិហារ មកពន្ធនាគារព្រៃសវិញ និងកិច្ចការមួយទៀត គឺលោកនឹងបំពេញបែបបទឡើងការពារក្តី នៅសាលាឧទ្ធរណ៍ ក្រោយពីតុលាការថ្នាក់កណ្ដាលមួយនេះបានទទួលចុះបញ្ជីរួចហើយ លើបណ្ដឹងសាទុក្ខរបស់លោកដែលប្ដឹងទាស់។
កញ្ញា សេង ធារី ត្រូវបានលោក រស់ ពិសិដ្ឋ ចៅក្រុមជំនុំជម្រះនៃសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ៦ឆ្នាំ កាលពីថ្ងៃទី១៤ ខែមិថុនា ឆ្នាំ២០២២។ នៅចំថ្ងៃតែមួយនៃការផ្ដន្ទាទោសពិរុទ្ធជនរូបនេះ លោក រស់ ពិសិដ្ឋ ក៏បានផ្ដន្ទាទោសថ្នាក់ដឹកនាំ និងអ្នកគាំទ្រគណបក្សសង្រ្គោះជាតិដែលត្រូវបានតុលាការរំលាយ ចំនួន៥០នាក់ផ្សេងទៀត ក្នុងបទចោទដូចកញ្ញា សេង ធារី ដែរ គឺ «ញុះញង់ និងរួមគំនិតក្បត់ជាតិ» ជុំវិញការប្រកាសជំហរធ្វើមាតុភូមិនិវត្តន៍ ថ្ងៃ៩វិច្ឆិកា របស់លោក សម រង្ស៊ី។ មន្រ្តីគណបក្សប្រឆាំងទាំងនោះត្រូវបានកាត់ទោសដាក់ពន្ធនាគារចន្លោះពី ៥ ទៅ ៨ឆ្នាំ។
បើទោះបែបណា សមាជិកព្រឹទ្ធសភាសហរដ្ឋអាមេរិក ដែលដឹកនាំដោយលោក Ed Ward J.Markey បានចេញសេចក្តីថ្លែងការណ៍រួមមួយ កាលពីថ្ងៃទី១៨ ខែសីហា ក្រោយបញ្ចប់ទស្សនកិច្ចរយៈពេល២ថ្ងៃនៅកម្ពុជា កាលពីថ្ងៃទី១៦ និងថ្ងៃទី១៧ ខែសីហា។ នៅក្នុងសេចក្តីថ្លែងការណ៍នោះ បញ្ជាក់ថា សហរដ្ឋអាមេរិកទាមទារឱ្យរដ្ឋាភិបាលកម្ពុជាដោះលែងអ្នកទោសនយោបាយទាំងអស់ រួមទាំងកញ្ញា សេង ធារី ដើម្បីបើកផ្លូវឱ្យពួកគេមានសេរីភាពឡើងវិញ និងបានចូលរួមនៅក្នុងការបោះឆ្នោតជ្រើសតាំងតំណាងរាស្រ្តដែលនឹងប្រព្រឹត្តទៅក្នុងពេលខាងមុខនេះ។
សម្រាប់លោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាលកម្ពុជា យល់ឃើញថា ការស្នើសុំណាមួយពីរដ្ឋជាភាគី ជាសិទ្ធិរបស់ពួកគេ ប៉ុន្តែការប្រើប្រាស់សិទ្ធិនេះមិនអាចមកដាក់ការគាបសង្កត់ណាមួយលើរដ្ឋាភិបាលកម្ពុជា ឱ្យធ្វើសេចក្តីសម្រេចចិត្តទៅតាមអ្វីដែលខ្លួនចង់បាននោះទេ។ បើតាមមន្រ្តីជាន់ខ្ពស់រូបនេះ កម្ពុជាមានប្រព័ន្ធគ្រប់គ្រងច្បាស់លាស់ និងយុត្តាធិការត្រឹមត្រូវ ហើយការសម្រេចបែបណានោះអាស្រ័យលើតុលាការ ព្រោះសំណុំរឿងទាំងនោះមិនស្ថិតនៅក្នុងដៃរដ្ឋាភិបាលទៀតនោះទេ។
លោកបន្តថា៖ «អត់មែនជាកាតព្វកិច្ចរាជរដ្ឋាភិបាលទេ រឿងនេះជាកាតព្វកិច្ចរបស់តុលាការ។ ហើយយើងទាំងអស់គ្នាដឹងហើយ គ្រប់ប្រទេសទាំងអស់ តុលាការតែងមានអធិបតីភាពរបស់ខ្លួន។ អាហ្នឹងជារឿងមួយដែលយើងទាំងអស់គ្នាត្រូវគោរព ហើយការវិនិច្ឆយក្ដីរបស់តុលាការក៏បានចែងនៅក្នុងរដ្ឋធម្មនុញ្ញ គឺជាការវិនិច្ឆយក្ដីនៃផលប្រយោជន៍របស់ប្រជាពលរដ្ឋខ្មែរ។ ដូច្នេះ វាមិនស្ថិតនៅក្រោមការបង្គាប់បញ្ជា ឬការជ្រៀតជ្រែកពីបរទេសណាមួយឡើយ»។
លោក ស៊ឹង សែនករុណា មន្រ្តីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក យល់ឃើញថា បើពិនិត្យពីនីតិវិធី គឺមិនទាស់ខុសអ្វីនោះទេ ព្រោះសាលក្រមមិនបានចូលជាស្ថាពរនៅឡើយ ហេតុដូច្នេះ ការបំពេញបែបបទស្នើសុំឱ្យដោះលែងនៅពេលនេះ គឺជារឿងសមស្រប។ ប៉ុន្តែលោកហាក់មិនមានជំនឿសោះថា ការស្នើសុំដែលផ្អែកតាមនីតិវិធីនេះត្រូវបានតុលាការពិចារណា ដោយសារសំណុំរឿងនេះត្រូវបានគេចងភ្ជាប់រួចទៅហើយ ជាមួយគណបក្សប្រឆាំង។ ហេតុនេះ ចង់ឬមិនចង់ លោកថា ពិតជាមានភាពស្មុគស្មាញក្នុងការផ្ដល់សេរីភាពចំពោះពិរុទ្ធជនរូបនេះឱ្យនៅក្រៅឃុំបានណាស់។
លោកបន្តថា៖ «អ្វីៗទាំងអស់នេះ យើងប្រហែលជាពិបាកក្នុងការសង្ឃឹមដែរ ដោយសារយើងយល់ថា សំណុំរឿងកញ្ញា សេង ធារី គេបានភ្ជាប់ជាមួយនឹងសំណុំរឿងនយោបាយ។ អ៊ីចឹងបើស្ថានភាពនយោបាយដូចដែលយើងឃើញសព្វថ្ងៃ តានតឹងបែបនេះ គឺមិនអាចមានសង្ឃឹមថាត្រូវបានគេដោះលែងឱ្យនៅក្រៅឃុំទេ»។
បើតាមលោក ស៊ឹង សែនករុណា ប្រសិនបើរដ្ឋាភិបាលយល់ឃើញថា សហរដ្ឋអាមេរិកនៅមានផលប្រយោជន៍សម្រាប់កម្ពុជា ដូច្នេះកូនសោរសំខាន់នៅពេលនេះ អ្នកទោសនយោបាយទាំងអស់គួរត្រូវបានដោះលែងឱ្យមានសេរីភាពឡើងវិញ៕