អតីតប្រធានាធិបតីស្រីលង្កា លោក ហ្កូតាបាយ៉ា រ៉ាចាប៉ាកសា (Gotabaya Rajapaksa) នឹងត្រលប់ទៅប្រទេសស្រីលង្កាវិញ នៅសប្ដាហ៍ក្រោយ បន្ទាប់ពីបានភៀសខ្លួនកាលពីខែកក្កដា ចំពេលមានការតវ៉ាទ្រង់ទ្រាយធំ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្នុងស្រុក Newsfirst នៅថ្ងៃពុធ ដោយដកស្រង់សម្តីអតីតឯកអគ្គរដ្ឋទូតស្រីលង្កា និងត្រូវបានទីភ្នាក់ងារសារព័ត៌មាន Reuters យកមកចុះផ្សាយបន្ត។
ប្រភពដដែលបន្តថា លោក ឧដាយំាងហ្កា វីរ៉ាត់ទុនហ្គា (Udayanga Weeratunga) អតីតឧបការីស្រីលង្កាប្រចាំប្រទេសរុស្សី ដែលមានទំនាក់ទំនងជាមួយលោក Rajapaksa បាននិយាយថា លោក Rajapaksa នឹងមកដល់ប្រទេសស្រីលង្កា នៅថ្ងៃទី២៤ ខែសីហា។
លោក Rajapaksa ដែលជាប្រធានាធិបតីស្រីលង្កាដំបូងគេ ដែលលាលែងពីតំណែងពាក់កណ្ដាលអាណត្តិ កំពុងស្នាក់នៅបណ្ដោះអាសន្នក្នុងប្រទេសថៃ បន្ទាប់ពីបានភៀសខ្លួនចេញពីប្រទេសស្រីលង្កាតាមយន្តហោះយោធាទៅកាន់ប្រទេសម៉ាល់ឌីវ និងបន្ទាប់មកស្នាក់នៅក្នុងប្រទេសសិង្ហបុរីប៉ុន្មានសប្តាហ៍។
លោកបានលាលែងពីតំណែងភ្លាមៗបន្ទាប់ពីបានមកដល់ប្រទេសសិង្ហបុរី ខណៈមានបាតុកម្មតវ៉ាទ្រង់ទ្រាយធំចំពោះការបរាជ័យក្នុងការដោះស្រាយវិបត្តិសេដ្ឋកិច្ចដ៏អាក្រក់បំផុតរបស់ប្រទេសស្រីលង្កា ចាប់តាំងពីទទួលបានឯករាជ្យពីចក្រភពអង់គ្លេសក្នុងឆ្នាំ១៩៤៨។
លោក Rajapaksa មិនបានបង្ហាញខ្លួនជាសាធារណៈ ឬធ្វើអត្ថាធិប្បាយអ្វីឡើយចាប់តាំងពីចាកចេញពីប្រទេសស្រីលង្កា។
Reuters មិនអាចទាក់ទងលោក Rajapaksa ឬលោក Weeratunga សុំការអត្ថាធិប្បាយបានឡើយ។
ទោះយ៉ាងណា លោកប្រធានាធិបតីថ្មី លោក រ៉ានីល វីក្រេមេស៊ីងហ្កេ (Ranil Wickremesinghe) ធ្លាប់បានប្រាប់ទីភ្នាក់ងារសារព័ត៌មាន Wall Street Journal កាលពីថ្ងៃទី៣១ ខែកក្កដា ឆ្នាំ២០២២ ថាលោក Rajapaksa នឹងមិនត្រលប់ទៅប្រទេសស្រីលង្កាវិញក្នុងពេលឆាប់ៗឡើយ។
លោកមិនបានឆ្លើយតបសំណើសុំការអត្ថាធិប្បាយឡើយ៕
