រដ្ឋមន្ត្រីក្រសួងមហាផ្ទៃ លោក ស ខេង បញ្ចប់មុខតំណែងអនុរដ្ឋលេខាធិការម្នាក់ ដើម្បីជំរុញប្រសិទ្ធភាពកំណែទម្រង់នគរបាលជាតិ ក្រោយរកឃើញថា មន្ត្រីរូបនោះបានប្រព្រឹត្តអំពើពុករលួយ ដើរសន្យាលក់ក្រមខណ្ឌនគរបាលជាតិ ជាថ្នូរនឹងទទួលបានប្រាក់ ដែលទង្វើនេះបានធ្វើឱ្យប៉ះពាល់មុខមាត់ក្រសួង។
ការថ្លែងរបស់មន្ត្រីជាន់ខ្ពស់នេះបានធ្វើឡើងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ក្នុងរាជធានីភ្នំពេញ កាលពីថ្ងៃព្រហស្បតិ៍ម្សិលមិញ។
លោក ស ខេង ថ្លែងថា កន្លងមក លោកទទួលបានព័ត៌មានថា មុនការប្រឡងចូលក្របខណ្ឌរដ្ឋ មានមន្ត្រីខិលខូចបានដើរបោកពលរដ្ឋ ធ្វើជាអ្នករត់ការឬដើរសន្យាលក់ក្របខណ្ឌរដ្ឋ ក្នុងតម្លៃពី១ម៉ឺនទៅ២ម៉ឺនដុល្លារ ជាថ្នូរនឹងការជាប់ការប្រឡងចូលក្របខណ្ឌរដ្ឋ។
ដោយឡែក នៅក្រសួងមហាផ្ទៃវិញ លោកថាមានអនុរដ្ឋលេខាធិការម្នាក់ត្រូវបានបញ្ចប់មុខតំណែង ដើម្បីជំរុញប្រសិទ្ធភាពកំណែទម្រង់នគរបាលជាតិ។
លោកថា៖ «មន្ត្រីដែលត្រូវពិន័យ ថ្នាក់អនុរដ្ឋលេខាធិការ ខ្ញុំស្នើទៅសម្តេចតេជោដកចេញ គឺដកចេញ! [គាត់]ដើរសន្យាគេហ្មង តែខ្ញុំមិនហែកកេរ្តិ៍អីទេ ខ្ញុំមិននេះ[បង្ហាញ]ឈ្មោះអីទេ ព្រោះជារឿងមួយដែលយើងត្រូវតែអារកាត់ធ្វើ បើមិនអ៊ីចឹងទេ វាដើរសន្យាលក់អាក្របខណ្ឌហ្នឹង អាហ្នឹងអត់បានទេៗ ព្រោះយើងកំពុងតែកំណែទម្រង់នគរបាល ដើម្បីឈានទៅធ្វើម៉េចឱ្យមានគុណភាពប្រសិទ្ធភាពបម្រើប្រជាពលរដ្ឋ»។
លោកគូសបញ្ជាក់ថា តាមលោកដឹង បញ្ហានេះក៏កំពុងកើតមាននៅក្រសួងជាច្រើនទៀត។
លោកថា៖ «ការប្រឡងប្រកបដោយគុណភាពហើយតម្លាភាព គឺអាចលទ្ធផលបានមកវាល្អដែរ ហើយមិនមែនតែស្ថាប័នណាមួយទេ ចង់និយាយថា គ្រប់ស្ថាប័នក៏មានបញ្ហា តាមខ្ញុំដឹង។ ប៉ុន្តែសម្រាប់ខ្ញុំៗធ្វើតែក្នុងក្រសួងសមត្ថកិច្ចដែលខ្ញុំទទួលខុសត្រូវផ្ទាល់»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មើលឃើញថា អំពើពុករលួយតាមរយៈការរត់ការឬសន្យាជាថ្នូរផ្ដល់លុយមុន ដើម្បីបានចូលកាន់តំណែងក្នុងក្របខណ្ឌរដ្ឋ បានលេចឮយូរណាស់មកហើយ ហើយករណីខ្លះមានអ្នករងគ្រោះជាមន្ត្រីរដ្ឋាភិបាលទៀតផង។
អ្នកឃ្លាំមើលរូបនេះយល់ថា វិធានការវះកាត់របស់រដ្ឋមន្ត្រីក្រសួងមហាផ្ទៃនេះ ជាសារព្រមានមួយដល់មន្ត្រីខិលខូចផ្សេងទៀត។ ប៉ុន្តែលោកថា បើវិធាននេះខ្វះការស៊ើបអង្កេតដោយតម្លាភាព ដើម្បីដាក់ទោសទណ្ឌអ្នកពាក់ព័ន្ធតបតាមច្បាប់ដែលមានជាធរមាននោះ រដ្ឋាភិបាលនឹងមិនអាចលុបបំបាត់អំពើពុករលួយប្រភេទនេះបានទេ។
លោកថា៖ «ការដាក់ពិន័យខាងរដ្ឋបាលហ្នឹង គាត់អាចខាតបង់ គាត់អាចរាងចាលខ្លះ ក៏ប៉ុន្តែមិនមានទម្ងន់សម្រាប់ឱ្យអ្នកដទៃខ្លាចទេ។ មែនទែនទៅ បើយើងមានច្បាប់ហើយ វាគួរតែអនុវត្តច្បាប់ឱ្យបានត្រឹមត្រូវ ដើម្បីឱ្យអ្នកផ្សេងហ្នឹងគាត់ខ្លាចច្បាប់។ បើមិនអីចឹងទេ យើងនៅតែមានបញ្ហាលើកលែង ការដាក់ពិន័យតិចតួច ជាការលើកលែង ធ្វើឱ្យអ្នកផ្សេងគាត់គិតថាមិនធ្ងន់ធ្ងររហូតដល់ថ្នាក់គាត់រាងចាលអត់ធ្វើទេ»។
បញ្ហានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ថា ករណីនេះ ក្រសួងមានចំណាត់ការហើយ តែរឿងព្រហ្មទណ្ឌជារឿងដាច់ដោយឡែក រវាងមន្ត្រីដែលត្រូវបានបញ្ចប់តំណែង និងអ្នកពាក់ព័ន្ធ។
លោកថា៖ «អាហ្នឹងយើងទទួលពិន័យខាងផ្នែកនគរបាល ដោយឡែកខាងតុលាការ អាស្រ័យខាងសាម៉ីខ្លួនអាអ្នកពាក់ព័ន្ធ គេអាចប្ដឹងផ្ដល់ ព្រោះគាត់ទៅយកលុយ វាប៉ះពាល់ដល់មុខមាត់ក្រសួង […] ព្រោះរឿងបន្តទៀតជារឿងគាត់ជាមួយនឹងបុគ្គលទេ»។
យ៉ាងណា លោក ប៉ិច ពិសី យល់ថា បើសកម្មភាពទាំងនេះត្រូវបានបិទបញ្ចប់ដោយការសម្របសម្រួល ទម្រង់នៃអំពើពុករលួយប្រភេទនេះនឹងបន្តកើតមាន ពេលនោះអ្នកមានសមត្ថភាពពិតប្រាកដនឹងបាត់ឱកាសបម្រើសង្គមជាតិ ហើយអ្នកដែលជាប់ដោយការសូកលុយនឹងបង្កបញ្ហាសង្គម ខ្វះធនធានមនុស្ស បង្កជាឧបសគ្គដល់ការអភិវឌ្ឍប្រទេស។
អំឡុងខែមេសា ឆ្នាំ២០១៩ កម្លាំងកងរាជអាវុធហត្ថលើផ្ទៃប្រទេសបានឃាត់ខ្លួនយោធាម្នាក់ឈ្មោះ ឃួន សុវណ្ណ ជានាយរងអធិការដ្ឋាននៃអគ្គបញ្ជាការ និងភរិយា តាមបណ្តឹងរបស់ពលរដ្ឋនៅខេត្តកំពង់ធំ ចំនួន១៨នាក់ ដែលប្តឹងពីបទឆបោកប្រាក់រាប់ម៉ឺនដុល្លារ ថ្លៃរត់ការចូលបម្រើការងាររដ្ឋ។
បើតាមពាក្យបណ្តឹងរបស់អ្នកភូមិនៅពេលនោះ ពួកគេបានចំណាយប្រាក់ម្នាក់ៗចន្លោះពី១ ៥០០ទៅ៦ ០០០ដុល្លារ ឱ្យទៅជនដែលត្រូវបានចាប់ខ្លួន ជាថ្នូរឱ្យកូនបានចូលធ្វើជាមន្ត្រីនគរបាល ទាហាន កងរាជអាវុធហត្ថ និងគ្រូបង្រៀន ជាដើម។
បើតាមសន្ទស្សន៍យល់ឃើញពីអំពើពុករលួយឆ្នាំ២០២១ ចេញផ្សាយដោយអង្គការតម្លាភាពអន្តរជាតិ (Transparency International) នៅថ្ងៃទី២៥ ខែមករា ឆ្នាំ២០២២ បង្ហាញថា កម្ពុជាជាប់ចំណាត់ថ្នាក់លេខ១៥៧ ក្នុងចំណោមប្រទេស និងដែនដីចំនួន១៨០ នៅលើពិភពលោក។ ចំណាត់ថ្នាក់នេះបង្ហាញថា កម្ពុជានៅតែជាប្រទេសមានកម្រិតពុករលួយអាក្រក់ជាងគេបំផុត ក្នុងចំណោមប្រទេសទាំង១០នៃសមាជិកអាស៊ាន៕
