សហរដ្ឋអាមេរិកកំពុងរៀបចំជំនួយយោធាបន្ថែមប្រហែល៨០០លានដុល្លារដល់អ៊ុយក្រែន ហើយអាចនឹងប្រកាសពីផែនការនៅថ្ងៃសុក្រនេះ។ នេះបើតាមប្រភពចំនួនបីដែលដឹងពីផែនការនេះ បានរាយការណ៍ប្រាប់ទីភ្នាក់ងារសារព័ត៌មាន Reuters។
ប្រភពដដែលបានឱ្យដឹងថា ប្រធានាធិបតីអាមេរិក លោកចូ បៃឌិន (Joe Biden) នឹងប្រើសិទ្ធិអំណាចជាប្រធានាធិបតី (Presidential Drawdown Authority) ក្នុងការអនុម័តលើកញ្ចប់ជំនួយយោធានោះ។
ប្រភពដដែលបានបន្ថែមក្នុងលក្ខខណ្ឌសុំមិនបញ្ចេញឈ្មោះថា ការផ្តល់ជំនួយយោធានេះអាចនឹងធ្វើឡើងនៅសប្តាហ៍ក្រោយ និងបានបញ្ជាក់ថាតម្លៃនៃកញ្ចប់ជំនួយយោធានេះអាចផ្លាស់ប្តូរមុននឹងប្រកាស។
សេតវិមានបានបដិសេធមិនធ្វើអត្ថាធិប្បាយឡើយ។
ចាប់តាំងពីកងទ័ពរុស្ស៊ីបានឈ្លានពានអ៊ុយក្រែនក្នុងខែកុម្ភៈ ជម្លោះរវាងប្រទេសទាំងពីរបានឈានដល់សង្រ្គាមប្រយុទ្ធគ្នាយ៉ាងខ្លាំង នៅភាគខាងកើត និងខាងត្បូងអ៊ុយក្រែន ដែលប្រធានាធិបតីរុស្ស៊ី លោក វ្លាឌីមៀរ ពូទីន ហៅថាជា«ប្រតិបត្តិការយោធាពិសេស»។
វ៉ាស៊ីនតោនបានបញ្ជូនជំនួយផ្នែកសន្តិសុខរាប់ពាន់លានដុល្លារទៅកាន់ទីក្រុងកៀវ (Kyiv) ជាមួយនឹងសព្វាវុធ រួមមាន ប្រព័ន្ធរ៉ុក្កែត HIMARS កាំភ្លើងត្បាល់គ្រាប់កាំភ្លើងធំ អាវុធប្រឆាំងរថក្រោះ Javelin គ្រឿងផ្ទុះ និងឧបករណ៍កម្ទេច។
Reuters មិនបានបញ្ជាក់លម្អិតថាតើមានអ្វីខ្លះដែលនឹងត្រូវដាក់បញ្ចូលក្នុងកញ្ចប់ជំនួយយោធាចុងក្រោយនេះឡើយ។
