អភិបាលខេត្តកំពង់ស្ពឺ អះអាងថា អាជ្ញាធរកំពុងស្នើទៅក្រសួងបរិស្ថាន សុំផែនទីពាក់ព័ន្ធព្រៃសហគមន៍ឧត្តមស្រែពស់ ដើម្បីយកទៅដោះស្រាយបញ្ចប់វិវាទដីព្រៃសហគមន៍មួយនេះ ខណៈព្រៃឈើនៅតំបន់នោះនៅតែរងការកាប់បំផ្លាញ និងឈូសឆាយឥតឈប់ឈរ។
អភិបាលខេត្តកំពង់ស្ពឺ លោក វ៉ី សំណាង ប្រាប់វីអូឌីនៅថ្ងៃសៅរ៍នេះថា រូបលោកបានទទួលព័ត៌មានពីប្រជាពលរដ្ឋហើយ ពាក់ព័ន្ធករណីកាប់បំផ្លាញ និងឈូសឆាយព្រៃឈើនៅសហគមន៍ឧត្តមស្រែពស់។ លោកបន្តថា បច្ចុប្បន្ន អាជ្ញាធរកំពុងស្នើសុំផែនទីពីក្រសួងបរិស្ថាន មុននឹងចុះទៅពិនិត្យ និងដោះស្រាយបញ្ហាដីព្រៃសហគមន៍មួយនេះម្ដងទៀត។
លោកបន្តថា៖«យើងបានផែនទីមក យើងចុះទៅមើលព្រំទាំងអស់គ្នា តើផែនទីដីព្រំសហគមន៍យើងនៅកន្លែងណា ហើយយើងរកលុយមកបោះបង្គោលព្រំ កុំឱ្យចេះតែគ្នាទន្ទ្រានទៅទន្ទ្រានមកវាពិបាកអ៊ីចឹង»។
វីអូឌីមិនអាចសុំការឆ្លើយពីរដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានទេ នៅល្ងាចថ្ងៃសៅរ៍នេះ។
ប្រជាពលរដ្ឋរស់នៅក្បែរព្រៃសហគមន៍ឧត្តមស្រែពស់ លោក ខន សារិទ្ធ លើកឡើងថា ពួកគាត់ចង់ឱ្យរដ្ឋាភិបាល លុបចោលអនុក្រឹត្យដែលផ្ដល់ដីព្រៃជាង ២៦០ហិកតា ឱ្យគ្រួសារទាហាននៃបញ្ជាការដ្ឋានរថក្រោះកងទ័ពជើងគោក ដូចករណីលុបគម្រោងអភិវឌ្ឍន៍នានានៅតំបន់ភ្នំតាម៉ៅដែរ។
លោកបន្តថា ការដែលរូបលោកស្នើបែបនេះ ដោយសារ សកម្មភាពនៃការឈូសឆាយដីព្រៃពីសំណាក់ក្រុមកងទ័ពនៅតែបន្តកើតមាន បើទោះអភិបាលខេត្តកំពង់ស្ពឺ លោក វ៉ី សំណាង បានសន្យាថា នឹងការពារព្រៃសហគមន៍នៅតំបន់នោះយ៉ាងណាក៏ដោយ។
លោកថា៖«ខ្ញុំសូមសំណូពរទៅក្រសួងពាក់ព័ន្ធ និងរដ្ឋាភិបាលគួរតែពិចារណាទុកព្រៃហ្នឹង គួរតែលុបអនុក្រឹត្យហ្នឹងចោល[អនុក្រឹត្យដែលកាត់ឆ្វៀលដីឱ្យកងរថក្រោះ] ដើម្បីទុកព្រៃហ្នឹងឱ្យសហគមន៍ការពារជាប្រយោជន៍រួមជាសម្បត្តិ ទុកឱ្យក្មេងជំនាន់ក្រោយមើល »។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយទទួលបានដីសម្បទានសង្គមកិច្ចនេះ ក្រុមទាហានបានដាក់គ្រឿងចក្រឈូសឆាយ និងប្រើកម្លាំងកម្មករឱ្យចូលទៅកាប់រុករានព្រៃឈើតំបន់នោះជាបន្តបន្ទាប់ ប៉ុន្តែត្រូវបានអ្នកភូមិរាប់រយនាក់នៅឃុំត្រពាំងជោរតវ៉ាប្រឆាំង ដោយពួកគេអះអាងថា ព្រៃឈើតំបន់នោះជាព្រៃសហគមន៍ឧត្ដមស្រែពស់ ឬព្រៃមេត្តាធម្មជាតិ ដែលពួកគេបានការពារជាង២០ឆ្នាំមកហើយ។
ការស្នើរបស់ប្រជាសហគមន៍ឧត្តមស្រែពស់ឱ្យលុបចោលអនុក្រឹត្យផ្តល់ដីទៅក្រុមទាហាននេះធ្វើឡើង ក្រោយពីលោកនាយករដ្ឋមន្ត្រី លោក ហ៊ុន សែន កាលពីថ្ងៃទី៧ ខែសីហាឆ្នាំ ២០២២ បានសម្រេចលុបចោលគម្រោងអភិវឌ្ឍន៍ និងដោះដូរដីតំបន់ភ្នំតាម៉ៅទាំងអស់វិញ ក្រោយពីមានប្រតិកម្មខ្លាំងពីមហាជន។
ក្រៅពីលុបចោលគម្រោងអភិវឌ្ឍន៍នៅតំបន់ភ្នំតាម៉ៅ លោក ហ៊ុន សែន ក៏បានបញ្ជាឱ្យក្រុមហ៊ុន ដែលឈូសឆាយឈើជិត ៦០០ហិកតាក្នុងរយៈពេលតែប៉ុន្មានថ្ងៃនោះ ត្រូវដាំកូនឈើនៅតំបន់ឈូសឆាយឡើងវិញ។ បន្ថែមពីនេះ លោកក៏បានបញ្ជាកម្លាំងទាហានផ្ទាល់របស់លោក ឬហៅថាកម្លាំងបញ្ជាការដ្ឋានកងអង្គរក្សជាង១ពាន់នាក់ដោយស្ងាត់ៗ ទៅតំបន់ភ្នំតាម៉ៅ ថែមទៀតផង។
ក្រោយចាប់ខ្លួនអ្នកសារព័ត៌មានវីអូឌី និងសកម្មជនបរិស្ថានចំនួន៩នាក់ ដោយកម្លាំងកងអង្គរក្សកាលពីថ្ងៃទី១៦ ខែសីហា ទើបបែកធ្លាយពីការដាក់កម្លាំងទាហានច្រើននៅតំបន់ភ្នំតាម៉ៅនោះ ទើបលោកនាយករដ្ឋមន្ត្រីបានចេញមុខបកស្រាយតាមរយៈសារជាសំឡេងនៅយប់ថ្ងៃដដែលថា កម្លាំងកងអង្គរក្សរបស់លោកទាំងជាង១ពាន់នាក់នោះ ដាក់ឈរជើងនៅតំបន់ភ្នំតាម៉ៅ ដើម្បីរៀបចំសម្អាត និងទទួលខុសត្រូវការលើដាំកូនឈើនៅតំបន់នោះតែប៉ុណ្ណោះ។
ជាការឆ្លើយតបបន្ថែមលើបញ្ហារសើបនៃគម្រោងអភិវឌ្ឍន៍ភ្នំតាម៉ៅនេះ លោកហ៊ុន សែន ក៏បានអះអាងពីការប្តេជ្ញាថែរក្សាតំបន់ភ្នំតាម៉ៅ ដោយដាក់ជាតំបន់នេះ ជាតំបន់អភិរក្សសួនសត្វនិងព្រៃឈើតែម្តង។ លោកក៏បានបញ្ជា ទៅរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ឱ្យត្រៀមរៀបចំព្រះរាជក្រឹត្យដាក់ថ្វាយព្រះមហាក្សត្រ ឱ្យដាក់តំបន់នេះជាតំបន់អភិរក្សជាផ្លូវការ។
នៅថ្ងៃទី ១៩ ខែសីហា ព្រះមហាក្សត្រខ្មែរ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី បានចេញព្រះរាជក្រឹត្យ ដាក់តំបន់ភ្នំតាម៉ៅ ជាតំបន់ឧទ្យានសួនសត្វ ព្រៃការពារ និងសួនភូតគាម ដើម្បីធានានូវនិរន្តរភាពនៃការថែរក្សាអភិរក្សព្រៃឈើនិងសត្វព្រៃ។
លើសពីនេះ ដើម្បីអភិវឌ្ឍសួនភូតគាមសាស្ត្រដែលមានពូជឈើប្រណិត និងមានតម្លៃសេដ្ឋកិច្ចខ្ពស់ ព្រមទាំងអភិវឌ្ឍជាតំបន់គោលដៅទេសចរណ៍ធម្មជាតិ វប្បធម៌ និងប្រវត្តិសាស្ត្រ ផ្ដល់ការថែរក្សាសង្គ្រោះសត្វព្រៃ ព្យាបាល និងស្តារលទ្ធភាពសត្វព្រៃឡើងវិញជាដើម៕