អ្នកនាំពាក្យអយ្យការអមសាលាដំបូងខេត្តកំពង់ធំ ឱ្យដឹងថា មន្រ្តីកងរាជអាវុធហត្ថខេត្តចំនួន៣នាក់ត្រូវបានបញ្ជូនទៅឃុំខ្លួនក្នុងពន្ធធនាគារខេត្តជាបណ្ដោះអាសន្ន ខណៈមន្រ្តីកងរាជអាវុធហត្ថ១០នាក់ទៀតត្រូវបានអនុញ្ញាតឱ្យត្រលប់ទៅផ្ទះវិញ ដោយរកពុំឃើញថាពួកគេមានកំហុស។
ការសម្រេចនេះធ្វើឡើងបន្ទាប់ពីមានការស៊ើបអង្កេតទៅលើមន្ត្រីកងរាជអាវុធហត្ថខេត្តកំពង់ធំ ចំនួន១៣នាក់ ដែលពាក់ព័ន្ធប្រតិបត្តិការចុះបង្រ្កាបទីតាំងល្បែងស៊ីសងជល់មាន់តាមអនឡាញមួយកន្លែង បណ្ដាលឱ្យជនសង្ស័យម្នាក់ក្នុងចំណោម៤នាក់ ដែលជាអនុភូមិរូង ឈ្មោះ សួង ឌ័ន បានស្លាប់នៅក្នុងរថយន្តសមត្ថកិច្ច ពេលកំពុងបញ្ជូនទៅកាន់បញ្ជាការដ្ឋានកងរាជអាវុធខេត្ត។
ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកំពង់ធំ លោក សាយ វាសនា ប្រាប់វីអូឌីនៅថ្ងៃចន្ទនេះថា មន្រ្តីកងរាជអាវុធហត្ថខេត្តកំពង់ធំ ទាំង៣នាក់នោះ រួមមាន លោក សៅ សិរីវុឌ្ឍ ជាជំនួយការអង្គភាពនគរបាលយុត្តិធម៌ លោក លុយ តាំងឈួយ ជាប្រធានអង្គភាពនគរបាលយុត្តិធម៌ និងនាយការិយាល័យព្រហ្មទណ្ឌ លោក សុខ ម៉េងហុង។
លោកបន្តថា ពួកគេទាំង៣នាក់ត្រូវបានតុលាការបង្គាប់ឱ្យឃុំខ្លួននៅពន្ធនាគារជាបណ្ដោះអាសន្ន កាលពីថ្ងៃទី១៨ ខែសីហា ឆ្នាំ២០២២ ក្រោមបទចោទ មនុស្សឃាតដោយអចេតនា តាមមាត្រា២០៧នៃក្រមព្រហ្មទណ្ឌ។
លោកមានប្រសាសន៍ថា៖ «បាទ! ខាងចៅក្រមស៊ើបសួរ គាត់បានសម្រេចបញ្ជូនកងកម្លាំងអាវុធហត្ថទាំង៣នាក់ហ្នឹងទៅពន្ធនាគារបណ្ដោះអាសន្ន។ ប៉ុន្តែចៅក្រមស៊ើបសួរ គេនៅតែបន្តស៊ើបសួររកយុត្តិធម៌ឱ្យពួកគាត់ទាំង៣នាក់ហ្នឹងទៀត»។
លោកបន្តថា៖ «នេះបណ្ដោះអាសន្ននោះទេ យើងមិនអាចសន្មតថាគាត់បានប្រព្រឹត្ត គាត់បានធ្វេសប្រហែសអនុវត្តតួនាទីនោះទេ។ អានេះគោលការណ៍ច្បាប់ យើងគេហៅថា បើមិនទាន់មានសាលក្រម សាលដីកាស្ថាពរ យើងអត់អាចចាត់ទុកថាបុគ្គលណាមួយមានទោសនោះទេ»។
ព្រះរាជអាជ្ញារងរូបនេះបន្ថែមថា ចំណែកមន្ត្រីកងរាជអាវុធហត្ថខេត្តកំពង់ធំចំនួន១០នាក់ផ្សេងទៀតត្រូវបានអនុញ្ញាតឱ្យត្រលប់ទៅផ្ទះវិញ ដោយសាររកមិនឃើញថាពួកគេមានកំហុស។ ប៉ុន្តែលោកថា ចៅក្រមស៊ើបអាចកោះហៅអ្នកពាក់ព័ន្ធទាំងនោះមកសួរនាំបន្ថែមទៀតបាន ត្បិតសំណុំរឿងនេះនៅមិនទាន់បញ្ចប់នៅឡើយទេ។
លោក សួង ឌ័ន មានវ័យ៤៧ឆ្នាំ ជាអនុភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ត្រូវបានកម្លាំងកងរាជអាវុធហត្ថស្រុកបារាយណ៍ ឃាត់ខ្លួនក្នុងប្រតិបត្តិការចុះបង្រ្កាបករណីល្បែងស៊ីសងជល់មាន់ កាលពីថ្ងៃទី៧ ខែសីហានោះ។
ក្នុងសន្និសីទសារព័ត៌មាននៅបញ្ជាការដ្ឋានកងរាជអាវុធហត្ថខេត្តកំពង់ធំ កាលពីថ្ងៃ១៧ ខែសីហា អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានថ្លែងថា ប្រតិបត្តិការចុះបង្រ្កាបករណីល្បែងស៊ីសងកាលពីថ្ងៃទី៧ ខែសីហានោះ សមត្ថកិច្ចបានឃាត់មនុស្សចំនួន៤នាក់ និងវត្ថុតាងមួយចំនួន។ លោកបន្តថា ជនសង្ស័យម្នាក់ក្នុងចំណោម៤នាក់ ដែលជាអនុភូមិរូង ឈ្មោះ សួង ឌ័ន បានស្លាប់នៅក្នុងឡាន ខណៈកំពុងបញ្ជូនពួកគេទៅបញ្ជាការដ្ឋានកងរាជអាវុធខេត្តកំពង់ធំ។
លោក អេង ហ៊ី អះអាងថា ការស្លាប់នេះមិនមែនបង្កដោយអំពើហិង្សានោះឡើយ ប៉ុន្តែអាចដោយសារខ្វះអុកស៊ីសែនក្នុងរថយន្ត។
ទោះជាបែបនេះក្តី កូនស្រីបង្កើតរបស់លោក គឺកញ្ញា ឌិន និរតី ធ្លាប់បានអះអាងប្រាប់វីអូឌីថា ឪពុករបស់ខ្លួនបានស្លាប់ក្នុងរថយន្តសមត្ថកិច្ច ក្រោយមន្ត្រីប៉េអឹមបានចាប់ខ្លួនគាត់ ហើយសង្កត់នៅត្រង់ក ដែលធ្វើឱ្យគាត់ដកដង្ហើមមិនរួច។ កញ្ញាបានទទូចឱ្យរដ្ឋាភិបាលជួយរកយុត្តិធម៌ក្នុងករណីនេះ ត្បិតឪពុករបស់គាត់មិនមែនស្លាប់ដោយសារជំងឺឡើយ។
នាយកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ដោយគាំទ្រចំពោះការស៊ើបអង្កេតរបស់ក្រុមការងារចំពោះកិច្ចនៃកងរាជអាវុធហត្ថលើផ្ទៃប្រទេស។ យ៉ាងណា លោកថា កត្តាដែលធ្វើឱ្យក្រុមគ្រួសារសពនៅមានការមិនសុខចិត្ត និងទាមទារឱ្យស៊ើបអង្កេតបន្ថែមទៀតបែបណានោះ អាចដោយសារពួកគាត់ចង់ដឹងពីមូលហេតុពិតប្រាកដនៃការស្លាប់របស់លោក សួង ឌ័ន។
លោកថា៖ «យើងជាអង្គការសង្គមស៊ីវិល យើងក៏ដូចគ្នាដែរ យើងគាំទ្រហើយចំពោះការស៊ើបអង្កេតរបស់កងរាជអាវុធហត្ថ ហើយនិងមានការឃាត់ខ្លួន ប៉ុន្តែចង់ឱ្យបង្ហាញឱ្យពិតប្រាកដទៅទៀតថា មូលហេតុអ្វីបានជាក្រុមគ្រួសារដែលគាត់លើកឡើងថាមានការសង្កត់ក សង្កត់អីហ្នឹង! តើវាជារឿងយ៉ាងម៉េច? ហើយគ្រួសារគាត់នៅតែមិនទាន់អស់ចិត្តលើរឿងទាំងអស់ហ្នឹង»៕
