ប្រជាពលរដ្ឋចំនួន១៣១គ្រួសារ នៅស្រុកគូលែន ខេត្តព្រះវិហារ ស្នើទៅអាជ្ញាធរឱ្យកាត់ឆ្វៀលដីរបស់អ្នកភូមិចេញពីគម្រោងវិនិយោគរបស់ក្រុមហ៊ុនឯកជនមួយ ខណៈពួកគេបានចូលអាស្រ័យផលជាង១០ឆ្នាំ។
ការស្នើនេះធ្វើឡើងខណៈដែលអាជ្ញាធរខេត្តព្រះវិហារ ជួបប្រជុំជាមួយតំណាងពលរដ្ឋ៤នាក់ នៅរដ្ឋបាលស្រុកគូលែន នៅចន្ទនេះ ដើម្បីរកដំណោះស្រាយវិវាទដីធ្លីរវាងពលរដ្ឋ១៣១គ្រួសារ និងក្រុមហ៊ុន «សិលាដាម៉ិច» ដែលទទួលបានដីសម្បទានសេដ្ឋកិច្ចពីរដ្ឋាភិបាលនៅតំបន់នោះ។
តំណាងពលរដ្ឋនៅភូមិ-ឃុំស្រយង់ ស្រុកគូលែន លោក ភ្លូ បោន ប្រាប់វីអូឌីថា ក្នុងកិច្ចប្រជុំនៅព្រឹកមិញនេះ ខាងអាជ្ញាធរស្រុកគូនលែន បានសួរនាំពួកគាត់ជុំវិញជម្លោះដីធ្លី និងប្រវត្តិដែលប្រជាពលរដ្ឋចូលទៅកាន់កាប់ និងអាស្រ័យផលលើដីតំបន់នោះ។
តំណាងពលរដ្ឋរូបនេះបន្តថា រូបលោក និងតំណាងពលរដ្ឋផ្សេងទៀត បានប្រាប់ទៅអាជ្ញាធរស្រុកថា អ្នកភូមិ១៣១គ្រួសារ និងមានដីសរុប ៦៤៩ហិកតា ស្ថិតនៅឃុំស្រយង់ និងឃុំត្បែងពីរ បានចូលទៅកាន់កាប់និងអាស្រ័យផលលើដីនៅតំបន់នោះតាំងពីអំឡុងឆ្នាំ២០១៣ ហើយទើបតែនៅខែមីនា ឆ្នាំ២០២២ អាជ្ញាធរខេត្តបានដាក់គ្រឿងចក្រឈូសឆាយផ្ទះ និងផលដំណាំរបស់ប្រជាពលរដ្ឋ ដោយចោទពលរដ្ឋថាទន្ទ្រានយកដីក្រុមហ៊ុន «សិលាដាម៉ិច»។
លោក ភ្លូ បោន បន្ថែមថា ក្នុងជុំនួបជាមួយអាជ្ញាធរស្រុកនៅព្រឹកនេះ តំណាងពលរដ្ឋស្នើទៅអាជ្ញាធរឱ្យកាត់ឆ្វៀលដីអ្នកភូមិចេញពីគម្រោងអភិវឌ្ឍន៍របស់ក្រុមហ៊ុន និងចេញបណ្ណកម្មសិទ្ធិជូនពលរដ្ឋ។
លោកបន្ថែមថា៖ «ទី១ ប្រសិនជាអាជ្ញាធរមិនដោះស្រាយឱ្យពួកខ្ញុំ គឺពួកខ្ញុំមិនព្រមចេញពីដីដែលពួកខ្ញុំកំពុងអាស្រ័យផលទេ ពួកយើងនឹងស៊ូក្រាញននៀលនៅលើដីនោះ ហើយយើងនឹងឡើងទៅរកកិច្ចអន្តរាគមន៍ទៅខុទ្ទកាល័យសម្តេច [ហ៊ុន សែន] ឱ្យជួយដោះស្រាយបន្តទៀត និងទៅរកកិច្ចអន្តរាគមន៍ពីខាងរដ្ឋបាលខេត្តព្រះវិហារឱ្យជួយដោះស្រាយបន្តទៀតដែរ»។
ជំទប់ទី១ នៅឃុំស្រយង់ លោក ឌី បូ ដែលជួបប្រជុំជាមួយតំណាងពលរដ្ឋ និងជាតំណាងអាជ្ញាធរស្រុកដែរ បានឱ្យដឹងថា កិច្ចប្រជុំនៅព្រឹកមិញនេះ នៅមិនទាន់មានការសម្រេច ឬដោះស្រាយបែបណានៅឡើយទេ។ លោកថា អាជ្ញាធរពាក់ព័ន្ធគ្រាន់តែសួរនាំប្រវត្តិនៃជម្លោះ និងការចូលទៅកាន់កាប់ដីធ្លីរបស់ប្រជាពលរដ្ឋ ដើម្បីដាក់ជូនទៅរដ្ឋបាលខេត្តពិនិត្យ ថាតើត្រូវដោះស្រាយ និងធ្វើយ៉ាងណាបន្តទៀតតែប៉ុណ្ណោះ។
លោកបន្ថែមថា៖ «ក្រោយគាត់ [អាជ្ញាធរស្រុក] ទទួលបានរបាយការណ៍នេះហើយ គាត់យកទៅវិន័យច្ឆយរបៀបម៉េច ឬដោះស្រាយរបៀបណាទៀត ខ្ញុំអត់ដឹងទេ។ យើងបានត្រឹមផ្តល់ព័ត៌មានជូនគាត់តែប៉ុណ្ណឹង»។
វីអូឌី មិនអាចសុំការបញ្ជាក់ពីអភិបាលរងស្រុកគូលែន លោក គឹម វិចិត្រ ដែលជួបប្រជុំជាមួយតំណាងពលរដ្ឋនៅព្រឹកថ្ងៃចន្ទនេះបានទេ។
មន្រ្តីសម្របសម្រួលសមាគមការពារសិទ្ធិមនុស្សអាហុកប្រចាំខេត្តព្រះវិហារ លោក ឡោ ចាន់ បានទទូចដល់អាជ្ញាធរខេត្តព្រះវិហារ ត្រូវដោះស្រាយជូនពលរដ្ឋដោយសន្តិវិធី និងឈរលើគោលការណ៍តម្លាភាព យុត្តិធម៌ ចៀសវាងរំលោភសិទ្ធិពលរដ្ឋ ជាពិសេសសិទ្ធិទទួលបានដីធ្លីដែលធានាដោយរដ្ឋធម្មនុញ្ញ និងច្បាប់អន្តរជាតិ។
លោកបន្ថែមថា៖ «អាជ្ញាធរមិនត្រូវប្រើកម្លាំង ប្រើអំណាចទៅឈូសឆាយដីធ្លីរបស់ពួកគាត់នោះទេ។ អាជ្ញាធរគួរណារកដំណោះស្រាយដោយសន្តិវិធី ជាជាងប្រើហិង្សាលើពលរដ្ឋ»។
ក្នុងញត្តិដាក់ទៅរដ្ឋបាលស្រុកគូលែន កាលពីថ្ងៃទី៣០ ខែមិថុនា ឆ្នាំ២០២២ បានឱ្យដឹងថា កាលពីថ្ងៃទី១ ខែមីនា ឆ្នាំ២០២២ កម្លាំងអាជ្ញាធរចម្រុះ ដឹកនាំដោយអភិបាលរងខេត្តព្រះវិហារ លោក អ៊ុង វុទ្ធី បានបញ្ជាកម្លាំង និងគ្រឿងចក្រឈូសឆាយបំផ្លាញផ្ទះសម្បែង និងផលដំណាំរបស់ពលរដ្ឋអស់គ្មានសល់ ហើយបានបណ្តេញពលរដ្ឋចេញពីលំនៅ និងបានគំរាមប្តឹង និងចាប់ពលរដ្ឋដាក់ពន្ធនាគារថែមទៀត។
ក្រុមហ៊ុន «សិលាដាម៉ិច» ទទួលដីសម្បទានសេដ្ឋកិច្ចពីរដ្ឋាភិបាលកាលពីឆ្នាំ២០០៩ លើផ្ទៃដីទំហំ៩ ០០០ហិកតា ដើម្បីធ្វើការអភិវឌ្ឍដាំកៅស៊ូ ស្ថិតក្នុងស្រុកគូលែន ខេត្តព្រះវិហារ ប៉ុន្តែសង្គមស៊ីវិលរកឃើញថា គម្រោងអភិវឌ្ឍន៍របស់ក្រុមហ៊ុននេះបានធ្វើឱ្យប៉ះពាល់ដល់សិទ្ធិមនុស្សធ្ងន់ធ្ងរ ជាពិសេសសិទ្ធិទទួលបានការកាន់កាប់ដីធ្លី និងបញ្ចេញមតិ៕