ក្រសួងព័ត៌មាន បានលុបចោលអាជ្ញាបណ្ណសារព័ត៌មានរបស់លោក សាន្ត ប៊ុនធឿន លែងឱ្យធ្វើអាជីវកម្មផ្សព្វផ្សាយលើគេហទំព័ររបស់ខ្លួនបន្ដទៀត ដោយសារការប្រព្រឹត្តអំពើអសីលធម៌ប៉ះពាល់វិជ្ជាជីវៈសារព័ត៌មាន។
ក្នុងសេចក្ដីប្រកាសរបស់ក្រសួងព័ត៌មាន ចុះថ្ងៃទី២២ ខែសីហា ឆ្នាំ ២០២២នេះ បានឱ្យដឹងថា ក្រសួងបានលុបប្រកាសលេខ ០៩៨ព.ម.ប្រក ចុះថ្ងៃទី១០ខែមីនា ឆ្នាំ២០២១ ស្តីពីការ អនុញ្ញាតឱ្យ ឬផ្តល់អាជ្ញាបណ្ណអាជីវកម្មផ្សព្វផ្សាយតាមគេហទំព័រ អេសប៊ីធី ផូស(SBT Post) WWW.sbtpost.com ដល់ លោក សាន្ត ប៊ុនធឿន ដែលជាម្ចាស់សហគ្រាស។
ប្រភពដដែលបន្ថែមថា ការលុបចោលអាជ្ញាបណ្ណផ្សព្វផ្សាយ លែងឱ្យម្ចាស់សហគ្រាសបន្ដធ្វើអាជីវកម្មទៀតនេះ ដោយសារការប្រព្រឹត្តអំពើអសីលធម៌ និងប៉ះពាល់វិជ្ជាជីវៈសារព័ត៌មាន។
សេចក្ដីសម្រេចលុបអាជ្ញាបណ្ណនេះ បញ្ជាក់ថា៖« ដោយម្ចាស់អាជ្ញាបណ្ណ បានប្រព្រឹត្តិទង្វើអសីលធម៌ ជេរប្រមាថជាសាធារណៈ ធ្វើឱ្យប៉ះពាល់ដល់សីលធម៌សង្គម និងកិត្តិយស សេចក្ដីថ្លៃថ្នូររបស់អ្នកសារព័ត៌មានអាជីព ដែលជាការបំពានយ៉ាងធ្ងន់ធ្ងរលើវិជា្ជជីវៈ សារព័ត៌មាន និងកិច្ចសន្យាអាជីវកម្មដែលសាមីខ្លួនបានតម្កល់ទុកនៅក្រសួងព័ត៌មាន»។
សេចក្ដីប្រកាសនេះ ធ្វើឡើងស្របពេលអគ្គមេបញ្ជាការកងយោធពលខេមរភូមិន្ទ លោក វង្ស ពិសេន នៅថ្ងៃទី២២ ខែសីហានេះ បានចេញលិខិតមួយជូនទៅរដ្ឋមន្ត្រីក្រសួងការពារជាតិ លោក ទៀ បាញ់ ដើម្បីស្នើលុបឈ្មោះ វរសេនីយ៍ត្រី សាន្ដ ប៊ុនធឿន ចេញពីក្របខណ្ឌកងយោធពលខេមរភូមិន្ទ។
ជាមួយគ្នានេះ លោក វង្ស ពិសេន ក៏បានចេញសេចក្តីសម្រេចមួយទៀត លុបឈ្មោះ អនុសេនីយ៍ឯក ឈ្មោះ ហ៊ត ប៉ូ ដែលគេស្គាល់រហ្សនាមនៅលើបណ្តញសង្គមហ្វេសប៊ុកថា អធិរាជមហាសាច់ ចេញពីក្របខណ្ឌកងយោធពលខេមរភូមិន្ទ ក្រោមហេតុផលថា បានល្មើសច្បាប់ស្តីពីលក្ខន្តិកៈទូទៅយោធិននៃកងយោធពលខេមរភូមិន្ទ។
ការចេញសេចក្តីសម្រេច និងលិខិតស្នើសុំលុបឈ្មោះចេញពីក្របខណ្ឌយោធិនទាំងពីររូបនេះ បន្ទាប់ពីមានសំណើរបស់មេបញ្ជាការដ្ឋានអង្គរក្សជូនលោកនាយករដ្ឋមន្ត្រី ហ៊ុន សែន និងមានចំណារឯកភាពពីលោកនាយករដ្ឋមន្ត្រី ដោយប្រាប់ទៅរដ្ឋមន្ត្រីក្រសួងការពារជាតិឱ្យបណ្តេញពួកគេទាំងពីរនាក់ ចេញពីក្របខណ្ឌកងទ័ពជាបន្ទាន់ ដោយសារពួកគេធ្វើឱ្យប៉ះពាល់ដល់វិន័យ និងកិត្តិយសរបស់កងយោធពលខេមរភូមិន្ទធ្ងន់ធ្ងរ៕
